Ўзбекистон терма жамоасига номзод футболчи - Олег Зотеев олдин хабар берилганидек, аввалги ҳафта Жанубий Кореянинг «Чоннам Драгонс» клуби билан шартнома тузди. «Локомотив»да 5,5 мавсум тўп сурган моҳир ҳимоячи «темирйўлчилар» билан илиқ хайрлашиб, Жанубий Кореяга йўл олди ва энди фаолиятини «Чоннам»да давом эттиради. Маълумот учун, ушбу клуб мамлакат «K»-2 лигасида иштирок этади. Футболчи янги жамоа билан шартнома тузгач, «Локомотив» матбуот хизматига махсус интервью берди.

- Олег, Жанубий Корея клуби варианти қандай юзага келди?

- Агентим Рауль хизматимга Жанубий Корея клуби қизиқаётганини айтгач, фаолиятимни хорижда давом эттиришни хоҳладим. Албатта, ҳар бир футболчи ўз салоҳиятини четда синаб кўришни орзу қилади. Хуллас, шундай имконият юзага келгач, ундан фойдаланишни маъқул кўрдим.

- Икки ҳафталик карантин тартибидан кейин шартнома остига имзо чекдингиз. Келишув муддати қанча?

- Шартнома 1,5 йилга мўлжалланди. Уни расмийлаштиришдан олдин тиббий кўрикдан ўтдим ва барчасини клуб билан келишиб олдик.

- Янги жамоа билан танишишга улгурдингизми?

- Ҳа, «Чоннам»нинг машғулотида ҳам иштирок этдим. Ҳаммаси яхши - футболчилар ва мураббийлар илиқ кутиб олишди. Бундан хурсандман, албатта.

- 31 ёшда легионерга айландингиз. Кейинги мақсад қандай?

- Яхши савол. Насиб этса, 5 июль куни 31 ёшга тўламан. Мақсадим? Янги жамоада ҳам ўзимни кўрсатиб, мухлислар ва мураббийлар ишончини қозониш ҳамда кўп йиллар легио­нер сифатида ўйнаш.

- Қайси рақамни олдингиз?

- 33-рақам бўш экан. Бу мен учун айни муддао. Ҳар ҳолда, 2013 йилдан буён фақат шу рақам остида ўйнаяпман.

- «Локомотив» мухлисларига тилакларингиз.

- Аввало, мени тўғри тушуниб, кетишимга қарши чиқмаган клуб раҳбариятига миннатдорчик билдираман. «Локомотив»да ажойиб даврни ўтказдим, клубда ҳамма яхши муносабатда бўлиб, ягона оилага айланган эдик. «Локо» мухлисларига ҳам алоҳида раҳмат. Улар жамоани тинмай қўллаб туришди, ўз навбатида, биз ҳам яхши ўйин кўрсатишга ҳаракат қилдик. Бемалол айтишим мумкин, фао­лиятимнинг энг яхши дамлари «Локомотив»да ўтди. Ҳамиша аҳил коллектив сифатида кўплаб унутилмас баҳсларда елкама-елка туриб, ҳаракат қилдик. Ҳаммага яна бир бора раҳмат, клубга эса кейинги ишларида омад.