«Милан» ҳужумчиси Златан Ибрагимович «Ювентус»га қарши кечган баҳс (4:2) таассуротлари билан ўртоқлашди. Мазкур учрашувда швед пенальтидан гол уриб, битта самарали узатмани амалга оширди.

«Қаридим, яширмайман! Аммо ёш — бу шунчаки рақамлар. Яхши ишлаяпман, бугун ҳам аввалги ўйиндан кўпроқ тўп сурдим. Рости, ўзимни яхши ҳис қиляпман, жамоамга ёрдам беришга интиляпман. Мен президентман, футболчиман, мураббийман! Ягона минус шуки, фақат футбол ўйнаганим учун маош беришади. Агар «Милан»да мавсум бошидан ўйнаганимда, биз скудеттони қўлга киритардик. Кейинги мавсум ҳам жамоада қоламанми? Кўрамиз. Олдинда футболдан баҳра олиш учун яна бир ой бор, бироқ вазият ҳозирча тушунарсиз. Чиндан «Милан»даги ўйинимдан қониқяпман. Майдонда фойда келтирмасам, ўзимга ноқулай сезаман. Бу ерга жамоа рамзи бўлиш учун келмаганман. Аксинча, жамоадошларим, клубим ва ишқибозларга ёрдамлашиш мақсадида ташриф буюрганман», — деди Ибрагимович DAZN вакилларига берган интервьюсида.

Эслатиб ўтамиз, Ибрагимович 2020 йилнинг бошида фаолиятида иккинчи марта «Милан»га ўтди. Мавсум-2019/2020да Златан «А» серияда 11 та ўйин ўтказиб, 5 та гол ва 3 та самарали узатма расмийлаштирди. Унинг амалдаги шартномаси жорий йил августигача амал қилади.