Туриннинг «Ювентус» клуби португалиялик ҳужумчи Криштиану Роналдуни таркибига қўшиб олганидан буён у қадар кўп соврин ютмаяпти.

Эслатиб ўтамиз, кеча «кекса синьора» учун Чемпионлар Лигасининг жорий мавсумини эрта якунлашга мажбур бўлди. Туринликлар турнирнинг 1/8 финалида франциянинг «Лион» клуби тўсиғидан ўтолмадилар. Италияликлар жавоб учрашувида 2:1 ҳисобида ғалабага эришган бўлсаларда, дастлабки баҳсдаги 0:1 ҳисоби французлар фойдасига ишлади.

Роналду «Ювентус»га 2018 йилнинг ёзида «Реал»дан ўтганди. Шундан сўнг Турин жамоаси икки марта Италия чемпионига аталган скудеттони қўлга киритди.

Аммо «кекса синьора» Италия кубогида икки марта муваффақиятсизликка учради, шунча марта Чемпионлар Лигаси «плей-офф» баҳсларини эрта тарк этди (ўтган мавсум 1/4 финалда, жорий мавсум 1/8 финалда иштирокини тўхтатди).

Жорий мавсум «бьянконери» шунингдек, Италия Суперкубогини ҳам бой берди (1:3, «Лацио»). Бир йил аввал, аниқроғи, 2019 йилнинг январида Саудия Арабистонида ташкил этилган баҳсда «Ювентус» «Милан»ни мағлубиятга учратган ҳолда (1:0) мазкур соврин эгасига айланганди.