Лондоннинг «Арсенал» клуби ярим ҳимоячиси Месут Озил коронавирус пандемияси даврида маошининг қисқаришига нима сабабдан кўнмаганлигини тушунтирди.

Эслатиб ўтамиз, германиялик футболчи шу йилнинг март ойида, яъни COVID-19 билан касалланиш кўпайган паллада молиявий чекловлар бўйича берилган таклифга рад жавобини берганди.

«Барчамиз жараёнга ўз ҳиссамизни қўшмоқчи эдик, бироқ биз кўпроқ маълумотларга эга бўлишни истадик, зеро кўп саволлар жавобсиз қолаверди. Мавҳумлик даврида тўловларнинг кечиктирилишига ҳеч ким қарши эмасди. Агар ўша вазиятда шаффофлик таъминланганда, маошимнинг сезиларли қисқаришига ҳам тайёр тургандим. Бунинг ўрнига бизга ортиқча муҳокама қилинмаган фактларни тақдим этиш билан чекланишди.

Бундай ҳолатда пулларимиз қайси мақсадларда сарфланаётганини билиш ҳуқуқига эга бўлишимиз керак. Биз эса деталлардан воқиф эмасдик, шунчаки, ўз қароримизни чиқаришимиз лозим эди. Ҳаммаси жуда тез содир бўлди, бизга босим уюштиришди. Бу адолатсизлик, айниқса, ёш футболчиларга нисбатан. Охир-оқибат мен рад жавобини бердим. Уйимда фарзандим бор, қолаверса, Туркия ва Германияда ҳам мажбуриятларим борлигини унутмаслик керак», - деди Озил The Athletic нашрига берган интервьюсида.

Аввалроқ «Арсенал» Озил билан хайрлашиш ниятини билдириб, бунга унинг маоши миқдори кўп эканлигини сабаб сифатида кўрсатганди.