Сўнгги ҳафтада ўзбек футболида 2та аҳамиятли трансфер кузатилди. Иккаласи ҳам Россия Премьер-лигаси гранд жамоаларига. Ҳа, ҳозирда россиялик баъзи экспертлар йигитларимизга қарата танқид тошларини отишмоқда ва уларнинг янги жамоада ўйнаб кетишларига шубҳа билан қарашмоқда. Эсласак, Россия элит лигасида Қосимов ва Фёдоров, кейинроқ эса Аҳмедов анча самарали ўйнашган. Шундан сўнг маълум муддат бошқа бирор футболчимиз рус диёрида «ярқ» этиб кўзга ташланмади. Тўғри, уринишлар бўлди, бироқ... Ҳамдамов қисқа муддатда ортга қайтди, Афонин ўртача савияда ўйнади, Денисов ҳам бирданига ортга кетди. Балки шунинг учун ҳам россиялик мутахассислар ҳозирда салбий фикр билдиришаётгандир. Аммо улар негадир маълум танаффусдан сўнг РПЛда порлаган Шомуродовни унутган кўринадилар...
Ҳа, айнан Элдор Шомуродов эффекти ўлароқ, Россия клубларида ўзбек футболига қизиқиш қайта жонланди, йигитларимизга таклифлар туша бошлади. Мана, «Локомотив» ва «Спартак»дек илғор жамоалар ёш футболчиларимиз билан кўп йиллик ва кўп «лимонли» шартнома тузди. Агар трансфер нархини «осмон» қадар кўтаришмаса, балки Жалолиддин Машарипов ҳам ушбу чемпионатга йўл олармиди? Менимча, «Пахтакор» етакчиси Россиянинг хоҳлаган клубида бемалол ўйнаб кетиш салоҳиятига эга, фақат воситачилар ишлашса, бас.
Жасур Жалолиддинов ва Остон Ўрунов. Бири 18, иккинчиси 19 ёшда Москва грандлари сафига қўшилди. Ўйлайманки, улар Европанинг кучли бешта лигаси томон юришда айни вақтида тўғри йўлни танлашди. Яъни Жасур ва Остон РПЛдаги ўйинлари билан еврофутбол скаутлари эътиборини тортишлари мумкин. Бунда ёш фактори муҳим аҳамиятга эга. Бинобарин, Европанинг кучли жамоалари скаутлари биринчи навбатда, ёш иқтидорларни кузатув остига олишади. Табиийки, барчаси қандай кечишида кўп нарса футболчиларнинг ўзларига боғлиқ, лекин уларнинг трансферларида муҳим роль ўйнаган агентлари ҳам алоҳида ўринга эгалар.
Ўзимизда ҳам футбол агентлари бор, бироқ охирги пайтлар улар салмоқли трансферларни амалга оширмаяптилар. Ҳар ҳолда, футболчиларимиз асосан қўшни Тожикистон, нари борса, Жанубий Кореяга йўл олишди. Боз устига, «К»-лигадаги йигитларимиздан омад юз ўгирмоқда. Мана, Икром Алибоев бу йил «йўқолиб» қолди, умуман, корейс диёридаги легионерларимизда амалиёт ҳам, натижа ҳам яхши эмас. Хитой ва Қатар чемпионатлари эса, яқиндагина старт ёки рестартга чиқди. Таиланд, Индонезия, Бангладеш каби мамлакатларда тўп сураётган вакилларимиз миллий жамоага тортмайдилар. Умуман, Осиё орқали Европага кетиш имконияти деярли нолга тенг. Отабек Шукуров ҳамон Европада ўйнаш истагини айтишдан нарига ўтмаяпти. Ўзи араб дунёси чемпионатларига Европадан футболчи чақириш оддий ҳолга айланган, бироқ қарама-қарши йўналиш жуда кам кузатилади. Эҳтимол, Шукуров вақтида БАА чемпионати эмас, Россия Премьер-лигасини танлаганида, ҳозир Европада тилга тушармиди? Яна бир иқтидоримиз Азиз Ғаниев ҳам узоқ гап-сўзлардан сўнг ниҳоят, легионер бўлди, лекин бундан мухлислар кутган натижа чиққанича йўқ.
Яқин орада жаҳон чемпионати-2022 саралаш ўйинлари давом эттирилади. Бундай паллада терма жамоа учун номзодлар қанча кўп бўлса, шунча яхши. Ажабмас, шу трансферлар бозорининг ўзида Ўрунов, Жалолиддинов, Яхшибоев, Умаровникидан кам бўлмаган яна 3-4та келишув амалга ошса. Бунинг учун умид йўқ эмас - вақт ҳам, футболчилар ҳам, малакали агентлар (хорижлик бўлсада) ҳам, йигитларимизни кузата бошлаган хориж клублари ҳам бор. Фақат ҲАРАКАТ керак.
Орол НОРБОЕВ, "ИнтерФУТБОЛ" газетаси.
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20