«Рома»нинг янги соҳиби вақтида Кристофер Нолан фильмида самолёт бошқарган. Рим клуби эгаси Жеймс Паллотта 1 йилдан кўпроқ вақт давомида «бўрилар»ни сотиш режаси билан шуғулланди. Аввалига қатарлик бизнесменлар гуруҳи, кейин АҚШнинг қандайдир концерни харидор бўлди. Бироқ музокара жараёни натижасиз тугади. Паллотта шундан кейин чамаси 6 ойни америкалик миллиардер Дэн Фридкин билан келишишга сарфлади, томонлар узоқ вақт нарх борасида бир тўхтамга келолмадилар. Ниҳоят, яқинда келишувга эришилди ва энди «Рома» расман The Friedkin Group тасарруфига ўтади. Америка гуруҳи жамоанинг 86,6 акциясини сотиб олди. Келишув қиймати - 561 млн. евро. Бош директор - Дэн Фридкин, директор ёрдамчиси - Райан Фридкин (Дэннинг ўғли).
Режага мувофиқ, Фридкинлар оиласи декабрь ойига қадар «Рома» бюджетини 100 млн. долларга оширади. Кейинги сармоя кўлами қишга яқин аниқланади. Фридкиннинг бизнес фаолияти: Toyota маҳсулотларини Яқин Шарқда сотиш ҳуқуқи, меҳмонхоналар, нефть... Forbes журнали Фридкиннинг моддий бойлигини 4,1 млрд. долларга баҳоламоқда. Америкалик миллиардер бойлигининг асосий қисмини Форс кўрфазида Toyota савдоси ортидан топган. Умуман олганда, бизнес Дэнга отасидан мерос қолган. Ҳозирги пайт Фридкин Арканзас, Луизианна, Оклахома, Техас ва Миссисипи штатларида ҳам Toyota автомобиллари савдосида мутлақ етакчидир. Фридкиннинг яна бир йўналиши - бу меҳмонхона бизнеси. Унинг бошқарувидаги Auberge Resorts компанияси Шимолий Америка (АҚШ, Мексика) ва Кариб ҳавзаси, Европа ҳамда Африка мамлакатларида 5 юлдузли отеллар қуриш билан шуғулланади. Компанияга 1985 йили Хармонлар оиласи асос солган. Auberge Resorts гуруҳига тегишли дастлабки меҳмонхона эса, орадан 13 йил ўтиб қад ростлаган. Фридкин 2013 йили бу компанияга фаол сармоядор сифатида қўшилди.
Фридкин яна нималар билан шуғулланади?
1. Нефть бизнесига сармоя киритади.
2. Кино саноатига ҳам бефарқ эмас.
Умуман, кино соҳаси Фридкиннинг асосий хоббиси. У шу кунга қадар «Паразитлар», «Дюнкерк» ва «Наркокурьер» каби картиналарда бевосита иштирок ҳам этган. Фридкин - ҳаво киноматографиясини яратиш билан машғул Pursuit Aviation ва Imperative Entertainment кинокомпаниялари соҳиби. Айтганча, «Паразитлар» йилнинг энг яхши фильми сифатида «Оскар» мукофотига лойиқ топилгани АҚШ президенти Дональд Трампни ғазабига сабаб бўлганди: «Паразитлар»ни энг яхши хорижий фильм сифатида кўргандим. Аммо бош совринни негадир шу картинага беришди. Бу кулгули. Уни америкалик молиялаштиргани янада кулгулироқ».
Фридкиннинг яна бир хоббиси бор - самолётлар. У 14 ёшидан буён мустақил равишда ҳам парвоз қилади. Дэн жумладан, Air Force Heritage Flight Foundation жамғармаси асосчиси ва президенти саналади. Шунинг эвазига у ўз намойишларида АҚШ ҳаво кучлари самолётларидан фойдаланиш ҳуқуқига эга. Мамлакатда бундай ҳуқуқ атиги 9 кишига берилган, холос. Фридкин яна қадимий самолётларни коллекция қилади. Шундай ҳаво лайнерларидан бири (Supermarine Spitfire)ни «Дюнкерк» фильми режиссёри Кристофер Ноланга якуний саҳнани суратга олиш учун ижара асосида берганди. Сюжетга биноан, Том Харди талқин этган бош қаҳрамон самолётни пляжга қўндиради. Аслида самолётни Харди эмас, Фридкиннинг ўзи бошқарганди. Бу ижара шартномаси бандларидан бири эди. Фридкин кино саноатига сармоя киритиш билан чекланиб қолмай, ўзи ҳам фильмлар яратмоқда. Дейлик, ўғли билан ҳамкорликда «Сўнгги Вермеер» картинасини суратга олди. Дэн - режиссёр, Райан - продюсер.
Дэн Фридкин иштирокидаги яна бир қатор картиналар:
«Дунёнинг барча маблағи» (режиссёр - Риддли Скотт)
«Наркокурьер» (режиссёр - Клинт Иствуд)
«Мен, Тоня»
«Аполлон 11»
- Кинони қаттиқ севаман. Фильм яратган киши томошабинларга қалбининг бир парчасини совға қилади. Бу пул масаласи эмас. Агар менга томошабин меҳрини қозонадиган лойиҳа беришса, асло рад этмайман. Бу санъат ва ижод, - дейди Фридкин. Айтганча, «Рома» мухлислари Паллоттадан норозилар. Римликлар унга баннер воситасида «миннатдорчилик» билдирдилар: «Паллотта, тоза тўнғизсан. Алвидо, сенсиз ҳаммаси яхшироқ бўлади».
Режага мувофиқ, Паллотта ва Фридкин барча ҳужжатларни сентябрга қадар расмийлаштиришлари керак.
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20