Диего Симеоне бошқарувидаги «Атлетико» ЕЧЛ 1|4 финалида Юлиан Нагель­сманнинг иштиёқи баланд жамоаси - «РБ Лейпциг» тўсиғидан ўтолмади - 1:2. Диққатга сазовор факт: «матрасчилар» аргентиналик мутахассис даврида Европа клуб футболининг бош турнири «плей-офф» раундларида Криштиану Роналдуси йўқ жамоага биринчи марта имкониятни бой беришди. Аниқроқ айтганда, «Атлетико» бунга қадар нақ 5 марта фақат таркибида португалиялик юлдуз ўйнаган клубларга йўл бўшатганди, бу галги мағлубиятида эса, Криштианунинг «имзо»си йўқ...

Диего Симеоне «Атлетико» бошқа­рувини 2011 йилнинг декабрида қўлга олганди. Жамоа шунданг буён ЕЛда 2 марта ғолиб чиқишдан таш­қари, бир бора Испания чемпионати шоҳсупасига кўтарилди. ЧЛда эса икки бора финалга чиқди, аммо якуний ўйинда мағлубиятни тан олишига тўғри келди. Умуман олганда, «матрасчилар» Симеоне бош­қарувида ЧЛнинг ҳар бир мавсумида натижа кўрсатишга уринишди, аммо нуқул Криштиану Роналду жамоаси олдида бош эгишди. Хроникага қаранг:

Мавсум-2013|2014. Финал («Реал»­­дан 1:4 ҳисобида мағлубият, Роналду 1та гол урди)

Мавсум-2014|2015. Чорак финал («Реал»дан мағлубият, 2та ўйиндаги ягона гол Тео Эрнандес номига ёзилди, Роналду эса унга ассистентлик қилди)

Мавсум-2015|2016. Финал («Реал»­дан мағлубият - пенальтилар сериясида)

Мавсум-2016|2017. Ярим финал («Реал»дан мағлубият, Роналду ўйин­лардан бирида «хет-трик»ка эришди)

Мавсум-2017|2018. Барчаси гуруҳ раундида якунланди.

Мавсум-2018|2019. 1|8 финал («Ювентус»дан мағлубият, Роналду ўйинлардан бирида «хет-трик»ка эришди)

Мавсум-2019|2020. Чорак финал («РБ «Лейпциг»дан мағлубият, Роналду дахлсиз)

Симеоне «Атлетико»си учун «РБ Лейпциг» билан ўйин статистика нуқтаи назаридан аномалия (но­одатий) бўлди. Эътиборлиси, Криштиану Роналду бу сафар ҳам «Атлетико»га рўбарў келиши мумкин эди, бироқ «Ювентус» 1|8 финалда «Лион» тўсиғидан ўтолмади. «Атлетико» эса яққол етакчисиз қолган «РБ Лейпциг» (Тимо Вернер Бундеслига мавсуми давом этаётган пайтдаёқ «Челси» билан келишиб олганди)га бас келолмади. 2009 йили тузилган Германия клубининг ўз тарихида илк марта ЧЛ ярим финалига йўл олганини ҳам алоҳида айтиш ўринли. «Атлетико» эса қаторасига 3 мавсумдан буён ярим финал юзини кўраётгани йўқ.