Якунланган мавсум «Аталанта» сафида порлаган словениялик ҳужумчи Йосип Иличичнинг бундан 2 йилча олдин ҳаёт учун курашишига тўғри келганди. Мана, у бу йил 1-2та кўрсаткич бўйича ҳаттоки, Криштиану Роналдуни ҳам ортда қолдирди. Асосийси, словениялик голеадор «Месталья»да «Валенсия»га қарши кечган ўйинда «покер» қайд этиб, ўз жамоасини ЕЧЛ чорак финалига олиб чиқди. Шунинг баробарида бу натижа билан нуфузли турнир тарихидан жой олди - янги рекорд! Бинобарин, шу пайтга қадар ЕЧЛ «плей-офф» босқичлари доирасидаги сафар учрашувида рақиб дарвозасига 4та гол уриш Лионель Месси, Криштиану Роналду ва Роберт Левандовски каби чинакам мерганларга ҳам насиб этган эмасди. Бундан ташқари, Иличич - словениялик футболчилар орасида «хет-трик» ва «покер»га эришган дастлабки тўпурар. Қўшимчасига, у ЕЧЛ тарихида «покер» расмийлаштирган энг ёши катта футболчидир. Хуллас, қуйида эътиборингизга 2 йил муқаддам оғир хасталик билан курашиб, унинг чангалидан омон чиққан 32 ёшли ҳужумчи ҳаётига оид ҳикояни ҳавола этяпмиз.
21 ёшида футболни йиғиштириб қўйишни ўйлаган. Йосип Босния ва Герцеговинанинг Приедор шаҳрида ёруғ олам билан юз кўришди. Бироқ атиги бир ёшга тўлганида отасидан айрилди. Бева қолган онаси у ва акаси Игор билан Словениянинг Кран шаҳрига кўчиб ўтди. Йосип айнан шу ерда маҳаллий «Триглава» клуби ёшлар тизимида шуғуллана бошлади. 7 йилдан кейин эса болакай машғулотларни «Бритов» жамоасида давом эттирди. Иличич ёшлар жамоаларидаёқ мазмунли ҳаракати ва маҳсулдор ўйнаши билан алоҳида ажралиб турарди. Шунга қарамай, у катта футболга ўтишда роса қийналди. Биринчидан, Словения иккинчи дивизионида ўйнайдиган жамоаси - «Бонифика» инқирозга юз тутгач, ёш ҳужумчининг бошқа қўнимгоҳ излашига тўғри келди. Якунда Иличич «Интерблок» сафидан жой олди. Аммо бу клубда вақтини асосан захирада ўтказди, савияли тўп сура олишини исботлаганида эса, уни кучлироқ жамоага қўйиб юборишни исташмади. «Тўғриси, ўша пайт фаолиятимнинг энг мураккаб даврини бошдан кечирдим. Клуб кетишимга қатъиян қаршилик қилди. 21 ёшга тўлганимда, Молдовадан яхшигина таклиф тушди. Лекин шахсий агентим менга нисбатан дурустроқ муомала қилмагани боис, жамоада қолиб кетдим. Ўша паллада ҳаттоки, ҳаммасига нуқта қўйиш ҳақида ҳам ўйладим. Чамаси 2 ҳафта уйда ўтирдим, бошқа бирор касб этагидан тутишни режалаштирдим», - дея хотирлайди ҳужумчи.
Италия сафари ва «Фиорентина» билан совуқ хайрлашув. «Марибор» спорт директори Златко Заховичнинг қўнғироғидан кейин Иличич фаолиятида кескин бурилиш юз берди. Таклифни мамнуният билан қабул қилган ҳужумчи 2010 йилнинг июлида «Марибор» билан шартнома тузди, 26 август куни эса ЕЛ саралаш босқичи доираси «Палермо»га қарши кечган баҳсда чиройли гол муаллифига айланди. Голдан қаттиқ таъсирланган Италия клуби эртасигаёқ шафқатсиз мерган билан бирданига 5 йиллик келишувга эришди. Шундай қилиб, Иличич Палермода 3 мавсум тўп сурди ва бу вақтда 25та гол уришдан ташқари, 18 марта ассистентлик ролини бажарди. Табиийки, бундай натижа кўплаб клубларни бефарқ қолдирмади, ҳужумчи жумладан, «Фиорентина» эътиборига ҳам тушди. Хуллас, «бинафшаранглар» 2013 йилнинг июлида «Палермо»га 9 млн. евро тўлаб, словениялик тўпурарни ўз сафларига қўшиб олишди. Йосип Флоренцияда 4 йил ўйнаган бўлсада, фаолиятининг бу босқичини эсга олишни ёқтирмайди. Чунончи, жамоа бош мураббийлари унга етарли ўйин амалиёти беришмади, мухлислар эса, футболчини беқарорлик ва лоқайдликда айблашди. Ваҳоланки, Йосип 4та мавсумнинг 2тасини «Фио»нинг энг яхши тўпурари мақомида якунлади. Айни салбий муносабатлар таъсирида Иличичнинг «Фиорентина» билан совуқ тарзда хайрлашишига тўғри келди.
Астори воқеасини такрорлашдан чўчиганди... Словениялик футболчи 2017 йилнинг ёзида «Палермо»да танишган ва дўстлашиб қолган устози - Жан Пьеро Гасперинига умид боғлаган ҳолда, «Аталанта»га йўл олди. Бергамодаги дастлабки мавсум Иличич учун рисоладагидек кечди: 41та учрашувда 15та гол ва 10та самарали узатма. Аммо мавсумлар оралиғидаги таътил вақти ҳужумчи кутилмаганда, жиддий хасталик чангалига тушди - унинг нафақат футболчилик фаолияти, балки ҳаёти ҳам хавф остида қолганди. Аниқроқ айтсак, шифокорлар 2018 йилнинг июлида Йосипда лимфаларнинг бактериал яллиғланиши оғир шакли борлигини аниқлашди. Шу сабабли Иличич 2 ой давомида қатъий тартибда, деярли ҳаракатсиз ётган ҳолда дори-дармонлар қабул қилди. «Яширмайман, Давид Астори билан юз берган хунук воқеани анчагача унутолмадим. Ўша хавотир туфайли асло ухлолмасдим. Кечқурун тўшакка ётганимда, «Эрталаб уйғонмасам, нима бўлади, наҳотки, оилам аъзолари ва яқинларимни бошқа кўрмайман?» қабилидаги қўрқув уйқу бермасди. Шу даражага етдики, бошимни ёстиққа қўйишдан ҳам қўрқиб қолгандим. Айрим беморлар бу хасталик таъсирида кома ҳолатига тушиб қоладилар. Чунки хасталик бутун организмни чулғаб олади. Бахтимга, менда хасталик лимфалардан ташқарига чиқмади», - дея тан олганди Йосип Corriere dello Sport нашрига берган интервьюсида. Муҳими, Йосип ваҳима устидан ғолиб чиқиб, хасталикни нари сурди ва одатий ҳаёт маромига қайтди. Янги мавсумнинг дастлабки 3 туридан кейин эса, майдонга ҳам туша бошлади. Энг асосийси, бутун мавсумни аъло даражада ўтказиб, якунда Италия чемпионати рамзий терма жамоасидан жой олди: «Умр жуда қисқа, энди шахс сифатида анча улғайдим, бўлар-бўлмас нарсаларга ғазабланиб, асабимни бузмасликка одатландим. Яқинда ҳаётга қайтишдан бошқасини ўйламаётган, бунинг учун ҳамма нарсага тайёр эдим. Футболни умуман ўйламай қўйгандим. Хайриятки, ҳаммаси ортда қолди».
Иличич иқтидорини Гасперини кашф этди. Якунланган мавсум - Йосип Иличичнинг энг ёрқин ўйинлари гувоҳи. Словениялик тўпурар барча турнирлар ҳисобидан 21та гол ва 5та самарали узатмани маржондек териб қўйди. Бу унинг фаолиятидаги энг сермаҳсул ва мазмунли давр, албатта. Қолаверса, «Аталанта» ҳам Италия чемпионати, ҳам ЕЧЛда катта шов-шув кўтарди. Ҳаттоки, евротурнирнинг ярим финалига чиқишига бир баҳя қолди. Словениялик футболчининг фаолиятидаги космик тараққиёт биринчи навбатда, Гасперини ижодининг самарасидир. Италиялик мутахассис ҳужумкор ярим ҳимоячи позициясида тўп сурадиган Иличични олдинги чизиққа ўтказди, унга кўпроқ эркинлик берди ва зиммасига дарвоза томон олға интилиш, тез-тез зарба йўллаш вазифасини юклади. «Иличич - рақиб дарвозаси олдидаги асосий ижрочи. У дарвозани ўққа тутувчи тўпурар ва жамоадошлари амалга оширадиган комбинацияларни якунловчи куч. Рақиб футболчилари Йосипни тўхтатиб қолиш масаласида анча қийланишлари турган. Айниқса, қаршисидаги озгина бўшлиқдан фойдаланиб, тезлашиб олса, унга ҳеч ким етолмайди», - дейди Гасперини. Мураббий бундан ташқари, шогирдининг марказгача чекинишига ҳам изн берган. Ҳужумчи тўпни айнан марказий ҳудудда эгаллаб олиб, ҳужумлар тезлиги ва самарасига сезиларли ҳисса қўшди. Иличичга бу вазифани талаб даражасида адо этишида универсаллик фазилати қўл келди. Мураббий эса девқомат йигит (бўйи - 190 сантиметр, вазни - 80 килограмм)нинг чаққонлиги ва тезкорлиги сирини ҳанузгача аниқлай олгани йўқ. Афсуски, Йосип мавсумнинг якуний қисмида майдонга тушгани йўқ - унга жароҳат халақит берди. Акс ҳолда, «А» серияда 15та гол билан чекланиб қолмасди. Шунга қарамай, ҳужумчи турли кўрсаткичлар бўйича чемпионат вакиллари орасида муносиб статистика қайд этди: зарбалар сони: 3,6та (1та ўйинда ўртача), кескин узатмалар - 2,5та ва рақибни алдаб ўтиш сони - 2,6та. Ҳужумкорлик савиясини белгилаб берадиган бундай юқори кўрсаткичлар билан мақтана оладиган футболчилар нафақат Италия, умуман, бутун евроаренада ҳам саноқли. Дейлик, Йосип Иличич жароҳатланиб, сафдан чиқишига қадар асосий 5та мезон (гол, самарали узатма, зарба, кескин узатма ва алдаб ўтиш)дан 3таси бўйича Криштиану Роналдудан ҳам олдинда бораётганди. Бу эътиборга молик жиҳат, албатта. Умуман, «Аталанта»нинг мавсум давомидаги муваффақиятлари ҳеч кимни ажаблантирмайдиган воқеликка айланиб улгурди. Биз буюк тарихни яратиш йўлидамиз. Мақсадимиз - эришган натижаларимиз тасодиф эмаслигини исботлашда давом этиш. Бу йўлда янада фаолроқ, ташаббускорроқ ва ғайратлироқ бўлишга ҳаракат қиламиз. Чиройли ғалабалар қўшимча илҳом бериб, куч-қувват бағишлайди», - деганди қаҳрамонимиз «Месталья»даги фантастик ғалабадан кейин.
Умид қиламизки, «Аталанта» Иличичдек фидойи ўйинчилар ёрдами билан кейинги мавсумларда ҳам самарадорликни пасайтирмайди. Ахир футболнинг асосий чиройи - бу гол!
А.ҲАМИДОВ тайёрлади.
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20