Маълумот ўрнида. Маркус Рашфорд 1997 йилда Манчестерда туғилган. Англия фуқароси. Бўйи 180 сантиметр. Майдондаги ўрни — ҳужумчи. Клуби «Манчестер Юнайтед». Рақами — 10. Оилада онаси, уч акаси ва бир опаси бор. 2017 йилда ўзига алоҳида уй сотиб олган. 6 та ётоқхона ва 2 та машинага мўлжалланган гаражга эга бу уй учун 1,85 миллион фунт стерлинг сарфлаган.

Маркус беш яшарлигидан бошлаб футбол билан шуғуллана бошлади. У билан «Эвертон», «Ливерпуль», «Манчестер Сити» ва «Манчестер Юнайтед» клублари футбол академиялари қизиқишди. Асосий кураш «Ман Сити» ва "МЮ” ўртасида кечди. Қизиғи, болакай Маркус шу иккала клуб базасида шуғулланарди. Охир-оқибат 2005 йилда 7 ёшли Маркус «Манчестер Юнайтед»ни танлади.Бунга унинг шу клубга мухлислик қилгани ҳам сабаб бўлган, албатта.

18 ёш 117 кунлигида у «Юнайтед»нинг еврокубокларда гол киритган энг ёш футболчисига айланди. Унгача бу рекорд афсонавий Жорд Бестга тегишли бўлиб, 1964 йилнинг 20 октябрида ўрнатилган эди. Гарчи, 2015/2016 йилги мавсумни тўлиқ ўтказмаган бўлса-да, қаҳрамонимиз «Юнайтед» сафида 18 та ўйинда 8 та гол киритди. Мавсум якунида у йилнинг энг кучли ёш футболчисига бериладиган Жимми Мерфи номидаги мукофотга муносиб кўрилди. Шунингдек, Англия терма жамоасидан ҳам чақирув олди. Айтмоқчи, у миллий терма жамоа сафидаги илк ўйинидаёқ яна бир рекордни ўрнатди. 2016 йилнинг 27 майида Австралия терма командасига қарши кечган учрашувнинг 138 – секундидаёқ гол киритди ва Англия терма жамоасида ўзининг дебют ўйинида энг тез гол муаллифига айланган футболчи сифатида тарихга кирди.

Маркус одатда чап қанот вингери ёки ҳужумчи позициясида тўп суради. Ҳужумдаги шериклари билан позициясини тез-тез алмаштириб туради. Тезлиги юқори. Айниқса, тезкор қарши ҳужум пайтида рақиб ҳимоячилари учун ўта хавфли футболчи саналади.

Биз унинг кўплаб голлар муаллифи эканини таъкидлаган ҳолда айрим ютуқларини эслатмоқчимиз. ”Манчестер Юнайтед” билан Маркус 2015/16 йилда Англия Кубоги соҳиби бўлган. Кейинги мавсумда эса Футбол лигаси кубогини қўлга киритган. 2016 йилда Англия Суперкубогини, 2016 /17 йилги мавсумда эса Европа Лигаси совринини боши узра кўтарган. Англия терма жамоаси билан 2019 йилда УЕФА Миллатлар кубогида 3 – ўринни эгаллаган.

Энди эса Маркус Рашфорднинг бутун дунёни лол қолдирган қойилмақом иши хусусида тўхталамиз. Бутун жаҳонда кузатилгани каби Буюк Британия ҳукумати коронавирус инфекциясига қарши курашиш учун карантин тадбирларини жорий этди. Рашфорд FareShare хайрия ташкилотини қўллаб-қувватлади ва мактаб ўқувчиларининг бепул тушлиги учун 20 миллион фунт стерлинг тўплашга кўмаклашди. Бу лойиҳа дастлаб Катта Манчестер графлигини қамраб олганди. Кейин эса бутун мамлакатга тарқаб кетди. 2020 йилнинг 11 июнида Маркус тўпланган маблағ эвазига бутун мамлакатдаги 3 миллион мактаб ўқувчиси бепул тушлик билан таъминланишини маълум қилди. 15 июнда Маркус Буюк Британияда болалар қашшоқлигига қарши курашиш учун чора-тадбирлар кўришни сўраб Парламент аъзоларига очиқ хат ёзди. Эртасига Британия ҳукумати мактабдаги таътиллар чоғида кам таъминланган оилаларга кўрсатиладиган моддий ёрдам дастури муддати узайтирилишини эълон қилди. Бу қарорнинг қабул қилинишида МаркусРашфорднинг фаол позицияси муҳим роль ўйнади. Орадан бир ой ўтиб, Маркуснинг болалар қашшоқлигига барҳам бериш йўлидаги хизматлари алоҳида эътирофини топди. Ҳали 23 ёшга ҳам тўлмаган қаҳрамонимизга Манчестер университетининг фахрий доктори унвони бериладиган бўлди. Шу тариқа Маркус Рашфорд бу унвоннинг энг ёш соҳиби сифатида ҳам тарихга кирди.

Истам ИБРОҲИМОВ тайёрлади.