Фахрий ҳужумчи Эдинсон Кавани Sodre (Уругвайда кўнгилочар тадбирлар ва маданият, жумладан, балет тараққиётига масъул давлат органи) рекламасида суратга тушди. Унда футболчи балет гуруҳида рақс тушган. Мақсад - ёш ўғил болаларга балет билан шуғулланиш уят эмаслигини кўрсатиш.

Ҳозирда озод агент мақомига эга Кавани роликда йигитларга мурожаат қилган: «Футбол ва рақс бир-бирига ҳамма ўйлаганидан ҳам кўпроқ ўхшайди. Ҳар иккиси оддий қизиқиш билан бошланади ва якунда муваффақиятли фаолиятга айланиши мумкин. Муҳими, икки йўналишда ҳам 100 фоиз профессионал бўлишингиз талаб этилади: режа асосида шуғулланиш, яхши таомланиб, яхши дам олиш ва катта тажрибага эга кишилар гапларига қулоқ солиш керак».

Sodre вице-президенти эркаклар спортида ном қозонган Каванининг роликда кўриниш бергани катта аҳамият касб этишини алоҳида таъкидлади: «Ўғил болалар одатда яқинлари ёки дўстлари таъсирида балетдан юз ўгиришади. Кавани иштирокидаги ролик - бақалоқ амакиларнинг «Бу балет сенга нима беради?» қабилидаги но­-ўрин ҳазилларидан азият чекаётган болаларни тетиклаштириш манбаи».