Ўзбекистон футбол ассоциацияси мамлакатимизда мураббийлик соҳасини янада ривожлантириш, мураббийлар малака ва салоҳиятини ошириш бўйича қатор чора-тадбирларни амалга ошириб келмоқда.

ЎФА қошидаги Футбол мутахассисларини тайёрлаш марказида қатор лицензияли ўқув курслари ва семинарлар мунтазам равишда ўтказиб келинмоқда.

Шунингдек, 10-16 сентябр кунлари Қорақалпоғистон Республикаси Халқ таълими ходимларини қайта тайёрлаш ва уларнинг малакасини ошириш ҳудудий марказида ЎФА “D” лицензияси дастури бўйича мураббийлик курслари ташкил этилди.

Ўқув жараёнини тажрибали йўриқчи Зоир Хасанов олиб борди. Қорақалпоғистон футбол ассоциацияси мутахассиси Айбек Нурбоев эса координатор вазифасини бажарди. Амалий ва назарий машғулотларни қамраб олган мазкур курсда жами 24 нафар мураббий иштирок этди.

Мазкур курснинг якуний кунида ЎФА биринчи вице-президенти Равшан Эрматов таҳсил олаётган ёш мураббийлар билан учрашди. Самимий сухбат давомида Равшан Эрматов ёш мураббийлар билан ўз фикр-мулоҳазаларини ўртоқлашди.

Қайд этиш жоиз, мазкур курс якунларига кўра имтиҳондан муваффақиятли ўтган мутахассислар “C” литсензияси бўйича таҳсил олиш имконига эга бўлишади.