Саховатпешалик ва мард­лик, манманлик ва қайсарлик, тилга эътиборсизлик ва менсимаслик, ўзаро хусуматлар ва уларнинг оқибати... Инсонга хос бу хусусиятларни барча миллат ва элатлар вакилларида учратамиз, албатта. Қуйидаги материал сербиялик сер-қирра футбол юлдузлари ҳақида.

Клуб қарорини менсимаган жаҳон чемпиони

2015 йилда 19 ёшли Предраг Райкович «Црвена Звезда» таркибида тўп сурарди. Айни ўша паллада клуб билан Сербия футбол федерацияси ўртасида юзага келган низо туфайли, клуб раҳбарияти футболчига ёшлар ўртасидаги жаҳон чемпионатида иштирок этишни тақиқлаб қўйганди. Бироқ Предраг клуб қарорини писанд қилмади. Натижада у турнирнинг энг яхши дарвозабони унвонига сазовор бўлди, қўшимчасига, сардор сифатида Сербияни ЖЧда шоҳсупага олиб чиқди. Шундан ке-йин футболчи «Маккаби»га йўл олди, ҳозир «Реймс» шарафини ҳимоя қилмоқда. «Нима учун дарвозабон касбини танлагансиз?» деган саволга у қуйидагича жавоб берганди: «Турган жойида йиқилиш имконияти бўлган майдонда у ёқдан-бу ёққа югуришнинг нима кераги бор?»

Матич ҳамқишлоқларини қарзлардан фориғ қилди

Неманья Матич Сербиянинг Врело қишлоғида туғилиб, футболга ошно бўлган. У ерда 1500 киши истиқомат қилади. Футболчи машҳурлик ва бойликка эга бўлгач, жонажон қишлоғи ободлиги ва аҳоли фаровонлиги йўлида хайрия ишларини амалга ошира бошлади:

- маҳаллий футбол клубига моддий ёрдам кўрсатди ва спорт объектларини тартибга келтирди;

- қишлоқдаги кўҳна ибодатхона ва унинг атрофини таъмирлаб, ободонлаштирди, ўзи пичан ўриш кампаниясида фаол қатнашди;

- маҳаллий дўконга ташриф буюриб, қайси ҳамқишлоғининг қарзи бўлса, ўз ҳисобидан тўлади.

Фуқароларнинг айтишларича, Неманья қиморхоналардан қарздор бўлиб қолган ҳамқишлоқларини ҳам хижолатпазликдан фориғ қилган.

Футболчи АПЛ учрашувида ўз либосидаги кўкнор гулини олиб ташлаш орқали эски бир воқеани эслатганди: «Мен учун у 12 ёшли пайтимда Врелода юртимга қарши уюштирилган ҳужумни эслатади. Ватаним 1999 йилда бомбардимон туфайли вайронага айланганди».

Ота ўғлининг паспортини олиб қўйиб, «Ливерпул»га ўтишига йўл қўймади

Бу воқеа 2015 йилнинг декабрида содир бўлган. «Црвена Звезда» сафида ўйнаётган Марко Груйич Европа топ-клубларини қизиқтириб қолганди. Футболчининг «Ливерпул»га ўтиши яқинлашиб қолганида, отаси интервью бериб, клуб ўғлини шартномага тезроқ имзо чекиши учун унга босим ўтказаётганини маълум қилди. Унинг айтишича, клуб ғазнасида пул қолмаган экан. Груйичга кийиниш хонасида ҳам босим ўтказилган. Чунки у ердагиларнинг қарзлардан фориғ бўлиши футболчининг трансфери билан боғлиқ экан.

«Марконинг паспорти менда. Шуни маълум қиламанки, ўғлим ҳеч қаерга кетмайди. У 20 ёшлилар ўртасида жаҳон чемпиони бўлди, «Црвена» билан чемпионликка интилмоқда. Табиийки, бир йилдан ке-йин унинг баҳоси янада қимматлашади», деди футболчининг отаси ва АПЛ Груйичга мос келмаслигини ҳам қўшиб қўйди.

Бироқ трансферни бир йил эмас, атиги икки ҳафта кутишди - январь ойида «Ливерпуль» Маркони харид қилганлигини расман эълон қилди. Ваҳоланки, футболчи клаустрофобия хасталигига чалингани боис, тиббий кўрикдан ўтиши анча қийин кечганди.

Бироқ барча саъй-ҳаракатлар зое кетди - АПЛга мослаша олмаган Груйич ҳанузгача ижаралар «сургуни»да юрибди. Унинг «Ливерпуль» билан амалдаги шартномаси 2023 йилнинг ёзида поёнига етади.

Бир соатдан кўпроқ пачоқ бурун билан

Бу воқеа ЖЧ-2018 саралаш босқичидаги Уэльсга қарши беллашувда юз берганди. Душан Тадич Нил Тэйлор билан тўқнашувда жиддий шикастланиб, пачоқ бўлган бурнидан қон оқиши анча вақтгача тўхтамади. Душан эса ўз ўрнини бўшатишни хаёлига ҳам келтирмади: «Мен нафас олиш жуда қийинлашиб қолгани ва кўп қон йўқотганимга қарамасдан, ўйнаш ва жамоага манфаат келтиришни ўйлардим. Сербияда айнан шундай дейишади: қаеринг синиши ёки шикастланишидан қатъий назар, жамоанг учун охиригача курашишинг шарт. Бизни жасурликка ўргатишади».

Тадичнинг оила аъзолари ўйинни кучли изтироб билан кузатишди: отаси қаттиқ асабийлашди, онаси кўз ёшларини тўхтата олмади, уларнинг набиралари Тэйлор билан Уэльсда орани очиқ қилишни режалаштиришди. Аммо Душан хотиржам эди: «Ҳа, тўқнашув жуда кескин бўлди. Лекин уни муҳокама қилишдан фойда йўқ».

Ўйламай айтилган гап оқибати

ЕЛ саралаш босқичида «Гронинген» «Абердин» майдонига ташриф буюриб, сафардан мағлубиятсиз (0:0) қайтганди. Меҳмонлар вакили Костич қувончдан шундай хитоб қилганди: «Ажойиб натижа! Уйда ғалаба биз томонда бўлади. Вазифанинг 80 фоизини уддаладик».

Бироқ жавоб учрашувида «Гронинген» 1:2 ҳисобида имкониятни бой бериб, мусобақадан чиқиб кетди. «Абердин» вингери Жонни Хэйс Костичга интервьюсини эслатиб қўйди: «Ўша гап бизга нисбатан ҳурматсизлик эди. Шундай экан, унинг оғзини юмиб қўйганимиздан мамнунман».

Клубда мураббий билан муштлашиб, терма жамоадан четлатилди

Бу воқеа 2012 йилнинг майида юз берган бўлсада, ҳанузгача унутилмади. Ўша паллада «Фиорентина» шарафини ҳимоя қилган Адем Ля­йич уни бошқа футболчи билан алмаштирган Делио Россига қарсак чалиш билан «миннатдорлик» билдирганди. Бироздан сўнг футболчи мураббийга нимадир дегач, даҳанаки жанг мушт­лашувга айланиб кетди. Маълум бўлишича, Ляйич серб тилида Россининг онасини ҳақорат қилган экан. Оқибатда футболчи мавсум охиригача дисквалификация қилинди, мураббий истеъфога чиқарилди. Ўша ойда Ляйич Испанияга қарши беллашув арафасида Сербия мадҳиясини куйлашдан бош тортгани учун бош мураббий Синиша Михайлович уни жамоадан четлатди. Отасининг айтишича, Адем мадҳия матнини билмагани учун куйламаган экан. Бироқ Михайлович буни инобатга олмади.

4 йилдан кейин устоз ва шогирд яна учрашдилар - фақат ҳамкорлик «Торино»да давом этди.

Митрович Албания байроғини уриб туширди

2014 йилда Сербия ва Албания терма жамоалари ўзаро куч синашган эдилар. Бу мамлакатлар ўртасидаги муносабат ўта кескин эди. Шундай қалтис вазиятда серблар ҳимоячиси Стефан Митровичнинг майдон устидан учиб ўтаётган квадрокоптердаги Албания байроғини уриб тушириши серблар ва албанлар ўртасидаги можарога сабаб бўлди. Учрашув тўхтатилди, сербларга мағлубият ёзилди, финал босқичига албанлар йўл олишди.

Милинкович-Савичдек юлдуз рад этилди

Сербиялик ноёб иқтидор соҳибига ЖЧ-2018 саралаш босқичида майдонга тушиш у ёқда турсин, ҳатто терма жамоадан таклиф олиш ҳам насиб этмади. Чунки Славолюб Муслин уни таркибга киритишни истамаганди. «Қандай қилиб Сербия шундай футболчини рад этиши мумкин? Жамоа машғулотига ташриф буюриб, унинг ўрнида қайси феноменлар шуғулланаётганини кўриб келсаммикан?» - дея ажабланганди Алессандро Костакурта.

Славолюб Муслин сербларни финал босқичига олиб чиққанди. Лекин Милинкович-Савични қатъиян рад этди. Тез орада мураббийнинг ўзи ҳам ёшларга имконият бермаганлиги учун истеъфога чиқарилди.

Милинкович-Савич эса Младен Крстаич даврида терма жамоага қўшилди. Лекин Россия мундиалида омадсизликка учради. Шунга қарамасдан, у «Лацио»да етакчи ўйинчилардан бирига айланди.

Душан Влахович Контени ғазаблантирди

«Фиорентина» шарафини ҳимоя қилаётган сербиялик футболчи «Интер»ни муҳим 3 очкодан маҳрум этиб, Антонио Контени қаттиқ ранжитди. Боиси, жамоаси 0:1 ҳисобида имкониятни бой бераётган пайтда у ўз ярим майдонидан рақиб дарвозасига яқинлашган ва ажойиб зарба эвазига мувозанатни тиклаганди.

 С.РАҲМОНОВ тайёрлади