Қачонлардир 10 ёшли болакай эдим. Тенгдошларим қатори футбол ўйнардим. Соч турмагимни 2002 йилги жаҳон чемпионатида порлаган Роналдоникига ўхшатишга интилардим, Германия устидан қозонилган ғалабадан қувонардим. Ўшанда чемпионлар дарвозабони Маркоснинг жаҳон юлдузи бўлгани учун эмас, балки ўз мамлакатида тенгсиз эканлиги сабабли миллий жамоада тўп сурганини ҳозирга келибгина тушуняпман. Бу билан нима демоқчиман? Қуйидаги мақолада мазкур саволга жавоб олишингиз мумкин.
Ўша кезлари ўзбек футболида Илёс Зейтуллаев номи кўп янграганди. Ушбу футболчининг ташқи кўриниши қандайлигини тузукроқ билмасдим ҳам, аммо унинг «Ювентус» таркибига қўшилганининг ўзи етарли эди, мен учун. Тасаввур қилинг, ўзбек футболчиси сиз ҳар куни телевизорда томоша қиладиган юлдузлар тўп сурадиган чемпионатга ўтди. Зейтуллаевнинг аксарият ўйинчилар сингари нега яхши ўйнаб кетолмагани сабабини улғайгач англадим. Бу ҳаммага ҳам насиб қилавермайди. Эҳтимол, буни ҳамма ҳам хоҳлайвермайди. Шахсан мен Зейтуллаевни паспортдаги ёшини кичрайтирганини тан олганидан сўнг яхшироқ таний бошлагандим. Ўзбекистонда бундай нарсаларга иқрор бўлиш кам кузатилади. Умид Аҳмаджонов бошқарган даврда айрим футболчиларнинг дисквалификация қилингани мустасно, албатта. Аммо ўшанда ҳам ўзига хос мантиқ мавжуд эди. Тушунарсиз бўлсада бор эди.
Ҳозир Илёс эркин ҳаёт тарзи билан яшамоқда, Италияда мураббийлик курсларига топширган. «А» сериядаги фаолияти ўхшамагани унинг шахсий иши. Аммо факт фактлигича қолади. У топ-чемпионатда ўйнаган дастлабки ўзбек футболчиси. Буни ундан ҳеч ким тортиб ололмайди.
«Узбекская кухня» блоги орқали асосан икки мавзуда чиқишлар қилганман:
1. Ўзбекистон термаси қачон жаҳон чемпионатига чиқади?
2. Қачон маҳаллий футболчилар Европа лигаларида тўп суришади?
Гарчи РПЛ ўзбек футболчиларига тез-тез эътибор қаратсада, барибир, бу бошқа даража. Россия чемпионатига ўтиш нисбатан осонроқ. Тил билан боғлиқ муаммо йўқ, қолаверса, Gucci халталарини тўлдириш учун Москвадаги йирик дўконларга кирса ҳам бўлаверади. Умумий тарихий воқеалар ҳақида гапириш шартмас. Аммо Ғарб томонларда тўп суриш ҳаммага ҳам насиб қилавермайди. Аввалги мақолаларимда футболчиларимизнинг қачондир топ-лигаларда тўп суришларини айтиб, бунга ишонганман. Шартли «Саутгемптон», «Ницца» ва «Реал Сосьедад» мухлислари ҳурматини қозониб, у ерда узоқ муддат қолиб кетишлари аниқлигини айтганман. Яқинда бу ишни Сардор Рашидов амалга оширишга уриниб кўрди, аммо унинг Ғарбга саёҳти кечроқ бошланди. Кетишга тўғри келганда эса Қатарни танлади.
Энди Шомуродов ҳақида. Элдор 15та голсиз ўйиндан иборат серияни қайд этди ва ушбу нохуш анъанага Исроилнинг «Маккаби» клубига қарши баҳсда чек қўйди. Валерий Карпин жамоасининг салбий ҳолатини пандемиядаги карантинлар билан боғлади. Умуман, ўзбек футболини оладиган бўлсак ҳам, аввалги мавсумдан фарқли равишда, Элдор бу сафар «Йил ўйинчиси» номи учун яққол етакчи эмас.
Эндиликда муҳими - Элдор ўзига ишониши керак. «Женоа» ўз-ўзидан идеал жамоа эмас. Бу клуб «А» серия ўртамиёнаси ҳисобланади. Аммо генуяликлар Шомуродовга у хоҳлаётган нарсани беришлари мумкин - шоулар иштирокчисига айланиш ва асосий таркибда тўп суриш. Жорий мавсум арафасида клубни уч нафар форвард тарк этди: Кристиан Куамэ «Фиорентина»га ўтди, Мино Райола мижози - италиялик Андреа Пинамонти «Интер» сафига қўшилди, Жанлука Лападула эса эндиликда «Торино» аъзоси. Энрико Прециози ўша ҳужумчилар гуруҳи голлари билан ёрдам беролмаслигини яхши тушуниб турибди. Горан Пандев эса эртами-кеч нафақага чиқади.
Факт шуки, Элдор Италияга бироз бўлсада чиниққан ҳолда боради. Ҳатто, Жасур Жалолиддинов билан солиштирганда, Шомуродов «Ростов»га анча кеч йўл олганди. Кўп ҳолларда ўйин амалиёти камлигидан қийналди, ўйини ўхшамади. Валерий Карпин қўл остида Элдор нималарга қодирлигини кўрсата бошлади, ўзига ишончи ортди, ҳужумнинг ҳар бир қисмида ўйлаб иш кўришни ўрганди. Шунга қарамай, Италияда унга осон бўлмайди. Албатта, ушбу мамлакат футболи 90-йиллардаги каби ҳимоявий эмас. Бироқ қаршиликлар даражаси сезиларли ўсган. Агар Шомуродов ривожланишдан тўхтамаса, Ўзбекистон термаси ҳақиқий юлдузига эга бўлади.
Мақола бошидаги мавзуга қайтсак. Бунга қадар «Женоа»да бир ўзбек футболчиси тўп суриб улгурган. 12та ўйин ўтказган. Айни пайт Самарқанддаги бозорда аёллар нонларини мақташгани сингари, мен ҳам италияликларга ҳамюртимизни реклама қилишни хоҳлаяпман. Шундан кейин блогимдаги бошқа мавзу - жаҳон чемпионати ҳақида гаплашсак бўлаверади. Мундиалга чиқамиз. Чунки таркибимизда Шомуродов ҳам тўп суради.
Евдоким РАИМОВ, Sports.ru сайтининг «Узбекская кухня» блоги
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20