«Марсель» урбанистикаси, «Милан» санъати ва «МЮ» технологияси. Мавсумлар оралиғи - бу нафақат трансферларга оид гап-сўзлар, қимматбаҳо харидлар, оғриқли хайрлашувлар ва мураббийлар алмашуви вақти, балки янги формалар тақдим этиладиган давр ҳам. Ўзига хос дизайнда тайёрланган футболкалар тўплами аллақачон клубларнинг брендига айланиб улгурган. Ҳар ҳолда, катта жамоалар формалар сотуви воситасида ўз бюджетини сезиларли даражада тўлдирмоқда. Янги мавсум учун тайёрланган либослар орасида ҳам модага яқини, оригинал дизайни билан ажралиб турганлари топилади, албатта. Қуйидаги мақолада шу масалага тўхталиб, ўз талқинидаги энг зўр 10та футболкага эътибор қаратди.

«Марсель»нинг сафар ўйинларига мўлжалланган футболкаси

Таъминотчи: Puma

Тақдимот вақти: 13 июнь

Puma дизайнерларининг «Марсель» формалари устида анча изланишгани кўриниб турибди. Шу тариқа жамоа шаҳарнинг ташқи кўринишини ифода этувчи 2 хил ажойиб футболкалар тўпламига эга бўлди. Айниқса, сафар ўйинларига мўлжалланган форма зўр чиққан - унда Ўрта ер денгизидаги энг йирик порт ра­йоннинг ноёб маданияти акс эттирилган. Марсель тимсоли саналган Нотр-Дам де ля Гарддаги баландлиги 11 метрли оригинал ҳайкал шакли ҳам либосда мужассам.

«Саутгемптон»нинг уй ўйинларига мўлжалланган футболкаси

Таъминотчи: Under Armour

Тақдимот вақти: 8 июль

«Саутгемптон» жорий мавсум давомида ўзининг 135 йиллигини тантана қилади. Клубга узоқ 1885 йилнинг 21 ноябрь куни St Mary~s Y.M.A. номи билан асос солинган. Under Armour шу сана муносабати билан жамоанинг уй учрашувлари учун тайёрланган футболкасига афсонавий кўкрак чизиғини қайтарди. Форманинг пастки қисмида эса тилларанг тусда «135» рақами порлаб туради, ёқанинг ички тарафида шиор бор: «Фақат олға интиламиз».

«Барселона»нинг уй ўйинларига мўлжалланган футболкаси

Таъминотчи: Nike

Тақдимот вақти: 14 июль

Nike дизайнерлари ҳам «Барселона» ўтмишига қараб иш тутишган. Эҳтимол, каталонияликлар янги дизайндаги формаларда навбатдаги зафарли даврни бошлашар... Ижодкорлар бежиз «блауграна»нинг илк ажойиб эраси кузатилган ўтган асрнинг 20-йилларида кийилган либос элементларини қайтаришмагандир, ҳар ҳолда. Хуллас, анъанавий кўк-анорранг вертикал чизиқлар ўз жойида, фарқи шуки, у энди тилларанг элементлар уйғунлигида. Формада яна Саньера — Каталониянинг геральдик тимсоли ва байроғи ҳам бор.

«Ренн»нинг уй ўйинларига мўлжалланган футболкаси

Таъминотчи: Puma

Тақдимот вақти: 16 июль

Ўз тарихида илк марта Лига 1 совриндорлари қаторига кирган «Ренн» энди еврокубокларда оригинал формаси билан ҳам йўқолиб қолмасликка уринади. Дизайнерлар бу футболкани яратишда Ренн шаҳри фахри - етук мозаика устаси Исидор Одорико ижодидан илҳомланишган. Айтиш жоиз, афсонавий рассом ўтган асрнинг 20 йиллари «Ренн»да ўйнаган, кейинчалик эса клубни президент сифатида бошқарган. Қисқаси, жамоанинг янги либосида унинг ижодидан намуна кўриш мумкин.

«Вест Хэм»нинг сафар ўйинларига мўлжалланган футболкаси

Таъминотчи: Umbro

Тақдимот вақти: 17 июль

29 июнь куни «Вест Хэм» ўзининг 125 йиллик юбилейини нишонлади. Шунинг шарафига сафар либоси дизайни Шарқий Лондон клубининг шавкатли тарихи асосида яратилди. Аниқроғи, дизайнерлар ўтган асрнинг 60-йилларига мурожаат қилишган. Кўк тусли ва кўкрак қисмида горизонтал икки чизиқли футболка - чинакам классика. «125» рақами 2та болға билан клуб логотипини безаб туради.

«Милан»нинг уй ўйинларига мўлжалланган футболкаси

Таъминотчи: Puma

Тақдимот вақти: 28 июль

Яна Puma томонидан яратилган санъат. Милан — бой тарих ва бетакрор меъморий ёдгорликларга эга шаҳар. Ижодкорлар «Милан» либосида буни ифода этиш учун классик кенг қизил-қора чизиқлар ва Виктор Эммануил II галереяси нақшларини уйғунлаштиришга уринишган. Оддий айтганда, Puma бунисида ҳам клуб ва шаҳар тарихини бирлаштирган.

«Ювентус»нинг уй ўйинларига мўлжалланган футболкаси

Таъминотчи: Adidas

Тақдимот вақти: 30 июль

Яна бир одатий вертикал чизиқларга қайтиш намунаси. Ҳа, «Ювентус» ҳам Adidas ёрдамида «Барселона» каби тарихга қиё боқишни лозим кўрди. гап шундаки, «кекса синьора»нинг аввалги мавсум кийган либоси ҳаммага ҳам ёқмади. Янги дизайнда қора чизиқлар мўйқалам «доғ»лари билан тўлдирилган. Клуб, ҳомий ва форма таъминотчиси логотиплари эса олтин тусда. «Ювентус» рамзидаги Juventus ёзуви J кўринишида қисқартирилганини ҳам айтиш ўринли.

«МЮ»нинг уй ўйинларига мўлжалланган футболкаси

Таъминотчи: Adidas

Тақдимот вақти: 4 август

Қаранг, Space Dye технологияси ёрдамида яратилган формада «МЮ»нинг герби 3 хил рангда акс эттирилган - қизил, сариқ ва қора. Ўзи манкунианликлар логотипи бутун дунёда машҳур - бу клуб юраги ва эҳтироси белгиси саналади. Дизайнерлар бежиз шу жиҳатга эътибор қаратишмаган.

«Эвертон»нинг сафар ўйинларига мўлжалланган футболкаси

Таъминотчи: Hummel

Тақдимот вақти: 7 август

Даниянинг Hummel компанияси ҳам «Эвертон»га футболка яратишда клуб тарихидан кўз юммаган. Ахир бу мавсум «ирислар»нинг 7-чемпионлик унвонини қўлга киритишганига 50 йил тўлади. Формада алоҳида белги - EFC (ёқа ортида) ретро-ёзувда битилган. «Эвертон» сардори Шеймус Коулмэн бу футболка кўринишидан таъсирланиб, жамоадошларини буюк тарихга муносиб ўйнашга чақирди.

«Порт Вейл»нинг уй ўйинларига мўлжалланган футболкаси

Таъминотчи: Errea

Тақдимот вақти: 7 август

Сток-он-Трент шарафини ҳимоя қиладиган «Порт Вейл»га 1876 йили асос солинган. Бу жамоа ҳозир Англия чемпионатининг 4-даражали дивизионида ўйнамоқда. Шунга қарамай, клуб мавсум-2020|2021га энг оригинал формалардан бири билан киришди. V белгисини эслатувчи одатий қора-оқ-тилларанг тусли либос Италиянинг Errea компанияси ва клуб ходимлари, шунингдек, британиялик таниқли хонанда Робби Уильямс ҳамкорлигида яратилган. Оддий айтганда, шаҳар фахри саналган юлдуз ғояси дизайнерлар томонидан амалга татбиқ этилган.

С.РАҲМОНОВ тайёрлади.