Про-Лигадаги қисқа муддатли иштирокидан кейин ўтган йили катта мақсадлар билан Суперлигага қайтган «Андижон»  жорий мавсум элитада анча қийналмоқда. Жамоа ортда қолган 18та турда атиги 11 очко олди ва турнир жадвалининг 13-қаторида бормоқда. Муҳими, тарқалиб кетиш арафасида турган клубни ўз қўлига олган янги раҳбарият вазиятни бироз бўлсада, яхши томонга ўзгартирди. Ҳар ҳолда, андижонликлар ўтган ой нисбатан ижобий натижалар қайд этишди, жумладан, илк ғалаба қўлга киритилди. «Андижон»нинг айрим футболчилари эса ПФЛ томонидан кетма-кет турлар ва ой лауреатлари қаторида эътироф этилдилар. Хусусан, ҳужумкор ярим ҳимоячи Абдуллоҳ Олимовнинг «Бухоро» дарвозасига жарима зарбасидан урган голи сентябрь ойидаги энг чиройлиси, деб топилди. Шу баҳона футболчининг ўзи билан боғланиб, айрим саволларга жавоб олдик.

- Куни кеча ПФЛ томонидан ойнинг энг яхши голи муаллифи сифатида эътироф этилганингиз билан табриклаймиз. Айтингчи, ўзингиз кимнинг голини шу номи­нация­га муносиб кўрган бўлардингиз?

- Табрик учун раҳмат. Очиғи, сентябрь ойида урилган голларнинг барчасини кўролмадим ва саволингизга аниқ жавоб беролмайман. Менинг голимни энг яхшиси сифатида кўрсатишганини ҳам жамоадошларим айтишди. Тўғриси, буни кутмагандим. Жамоа ғалабаси йўлидаги меҳнатимни эътироф этишганидан хурсандман, албатта. қолган турларда ҳам қўлдан келганча мазмунли ўйнашга ҳаракат қиламан.

- Жамоангиз бош мураббийи Бахтиёр Ҳамидуллаев футболчиларнинг техник имкониятини ривожлантиришга вақт етишмаётганини айтди. Хўш, жамоада мустақил равишда ишлайдиган йигитлар ҳам борми?

- Албатта. қолаверса, бош мураббийимиз ҳар бир машғулотда футболчиларга техник томондан ривожланиш бўйича ўринли кўрсатмалар бермоқда.

- «Андижон»нинг Суперлигадаги иштирокини қандай баҳолайсиз - ҳозирги натижалар жамоанинг асл кучига мувофиқми?

 - Суперлига ўйинларида бизга озгина омад етишмаяпти. Ҳар ҳолда, кўплаб ўйинларда шу туфайли мағлубиятга учрадик ёки дуранг натижа билан чекландик. қисқаси, ўта қимматли очколарни бой бердик. Энди орқага йўл йўқ. Фақат олдинга интилиш ва охирги 8та тур ўйинларига худди финалдек ёндашиш, зарур очколарни йиғиш талаб этилади.

- Бир қарашда, жамоанинг потенциали чакки эмасдек, лекин натижа йўқ. Наҳотки, барчасини омадсизликка йўйиш мумкин бўлса...

- қандай жавоб беришга ҳам ҳайронман. Мавсумга яхши мақсадлар билан, кўтаринки руҳда киришдик. Олдимизга аниқ вазифалар қўйилди. Бироқ кетма-кет салбий натижалар жамоанинг қандайдир руҳий ўрага тушиб қолишига олиб келди. Ўзимизни ўнглаб олишимиз учун 1та ғалаба керак эди. Бироқ айнан омадсизлик ва оддий хатолар ортидан илк ғалабани анча кутишимизга тўғри келди.

- Жамоа тарқалиб кетиши мумкинлиги ҳақида гап-сўзлар тарқалган пайт ички муҳит қандай эди?

- Ўзимиз ҳам ҳайрон қолдик. Чунки шу мазмундаги гап-сўзлар тарқалишидан 2 кун олдин «Пахтакор» билан ўйин учун Тошкентга етиб боргандик. Меҳмонхонада бўлажак учрашувга тактик тайёргарлик кўриб турганимизда, ижтимоий тармоқларда «Андижон»нинг чемпионатдан чиқиб кетиши мумкинлиги ҳақидаги хабарлар чиқди. Табиийки, буни ўқиб, кайфиятимиз тушиб кетди. Озгина вақт ўтгач, жамоа раҳбарлари меҳмонхонанинг ўзида мажлис ўтказиб, жамоа ёпилаётгани ва уйга кетаверишимиз мумкинлигини айтишди.

- Ўша вазиятда хаёлингиздан нималар кечди?

- Бундай ҳолатга ҳеч ҳам тушган эмасдим. Очиғи, аламли, чунки Андижондек катта вилоятда битта жамоани ушлаб туриш имконияти йўқлигига ишониш қийин. қолаверса, андижонлик жонкуяр мухлисларни кўз олдимга келтирдим. Улар бунга лойиқ эмасдилар.

- Янги раҳбарият олиб бораётган ишлар хусусида нима дея оласиз? Футболчиларга яратилаётган шароитлар, имкониятлар...

- Янги раҳбарлар жамоага имкон қадар талаб даражасида шароит яратиб беришмоқда. Бунга жавобан қўлдан келганича ҳаракат қилиб, жамоа­ни Суперлигада олиб қолмоқчимиз. Асосий вазифамиз шу.

- «Андижон»нинг ортда қолган турларда бор-йўғи бир марта ғалаба қозонгани сизларга салбий таъсир қилмаяптими?

- Айтганимдек, биз учун орқага йўл йўқ. Ҳа, 1тагина ғалаба билан Суперлигада қолиш қийин, лекин олдинда ҳали 8та тур бор. Демак, қолган ўйинларга финалдек ёндашиб, имкон борича кўпроқ очко олишимиз шарт. Муҳими, турнир жадвали қуйи қисмида ёнма-ён кетаётган жамоалар очколари ўртасида фарқ унча катта эмас. Агар қолган ўйинларда муносиброқ натижа қайд этсак, Суперлигада қоламиз. Ўйлайманки, жамоамиз бунга қодир.

- Бахтиёр Ҳамидуллаев бош мураббий лавозимига тайинлангач, натижалар ижобий томонга ўзгара бошлади. Агарда аввалроқ ўзгаришга қўл урилганида, жамоа ҳозир юқорироқ ўринларда турган бўлармиди?

- Бу ҳақда аниқ бир нима дейиш қийин. Бахтиёр ака Андижон футболи тарбияланувчиси, жамоа учун чинакамига қайғуради. қолаверса, клуб учун бегона эмас. Эҳтимол, Бахтиёр Ҳамидуллаев эртароқ келганида, ҳозирги ҳолатимиз яхшироқ бўлармиди...?

Хуршидбек ЮСУПОВ суҳбатлашди.