ФИФА кунлари туфайли вужудга келган танаффус тиғиз тақвим остида тўп сураётган футболчиларга бироз ўзларига келиб олишлари, навбатдаги учрашувларгача куч йиғиб олишларига замин яратди. Буни биз билан бўлган суҳбатда «Насаф» ҳимоячиси ғолиб ғайбуллаев ҳам таъкидлади.

- Жорий мавсум жамоангиз қайд этаётган натижалар сизда қандай таассурот қолдирмоқда?

- Суперлига баҳсларида осон ўйиннинг ўзи бўлмаяпти. Турнир жадвалида эгаллаб турган ўрнидан қатъий назар, барча жамоалар ғалаба учун майдонга чиқишяпти. Бу эса учрашувларнинг қизиқарли ва муросасиз тарзда ўтишини таъминлаяпти. «Насаф»нинг ўйини ва қайд этаётган натижаларига келсак, авваламбор, мурабийимиз меҳнати, талабчанлиги эвазига мавсумни ижобий кўрсаткичлар билан давом эттиряпмиз. Эришаётган ютуқларимизда ички муҳитнинг яхшилиги ҳам ўз сўзини айтмоқда.

- Тиғиз тақвим, кетма-кет ўтказилаётган учрашувлар жисмоний томонлама толиқтириши табиий. ФИФА кунлари сабаб юзага келган танаффус пайти бироз нафас ростлашга имкон бергандир?

- Албатта, бундай вазиятда чарчоқ кузатилиши табиий, лекин жамоамизда жисмоний ҳолатга ҳам алоҳида этибор қаратилади. Шу боис, ҳар доим спорт формамизни бир маъромда ушлаб туришга ҳаракат қиламиз.

- «Насаф»да чемпионатни камида учинчи ўринда якунлаш имконияти юқори. Умуман, жамоанинг айни дамдаги мақсад ва вазифалари нималардан иборат?

- Ҳар бир учрашувда ижобий натижага эришиш орқали мураббийимиз ва мухлислар ишончини оқлаш. Чемпионатни имкони борича юқорироқ ўринларда якунламоқчимиз. Айни пайт жадвалда 3-ўриндамиз, лекин ҳали олдинда учрашувлар кўп. Насиб қилса, муносиб тайёргарлик кўриб, янада юқорироқ поғоналар учун курашамиз.

- Ўтган ой тарқалган гап-сўзларга қараганда, «Насаф» футболчиларига беш ойдан буён маош берилмаётган экан...

- Бу рост маълумот. Ҳозирча олдинга силжиш йўқ. Раҳбарларимиз вазиятни ижобий томонга ўзгартириш учун ҳаракат қилишяпти. Аммо биз бу ҳақда кўп ҳам ўйламаяпмиз. Мутасаддиларга ишонган ҳолда, ишимизни давом эттиряпмиз. Натижа ёмон эмас, ўйлайманки, тез фурсатларда бу каби муаммолар ҳам ўз ечимини топади.

- Шундай оғир вазиятга қарамай, жамоанинг кучли учликда бораётгани - шунчаки жасорат. Клуб бўлажак ўйинларга мотивацияни қаердан оляпти?

- Жамоамиз асосини ёшлар ташкил қилади. Шу сабабли бош мураббийимиз моддий масалаларни ўйламасдан, ҳар бир ўйинда ўзимизни кўрсатишимиз, шу орқали хорижнинг кучли жамоаларида ўйнаб кетишимизни, ўзимиздан яхши ном чиқаришимиз кераклигини таъкидлайди. Аслида, ўзини профессионал ҳисоблаган ҳар қайси футболчининг асл мақсади шу бўлиши керак.

- Жамоангиз бу йил ҳисобидан ўтказилган қайси учрашувда тўлиқ потенциалини кўрсата олди, деб ўйлайсиз?

- Ҳали жамоамизнинг тўлиқ потенциалини кўрсата олдик, деб ўйламайман. Биз бунданда мазмунлироқ ўйнай олишимиз мумкин. Одинда учрашувлар кўп, эҳтимол, мавсумдаги энг яхши ўйинимизни кейинроқ намойиш этармиз.

- Тошкентда ўтказилган Ўзбекистон - Эрон учрашувини кўрган бўлсангиз, марказий ҳимоямизда камчиликлар борлиги кўзга ташланди. Бу ҳақда қандай фикрдасиз?

- Ўртоқлик учрашувларида ҳар бир футболчида хатолар учраши табиий. Чунки бундай ўйинларда натижа муҳим аҳамият касб этмайди, қолаверса, турли тактика ва термага номзод футболчилар синовдан ўтказилади. Кимнингдир ўйини ўхшайди, кимникидир эса йўқ. Асосийси - ушбу хатоларни расмий ўйинларда такрорламаслик.

- Сизда ҳам миллий жамоа сафида тўп суриш орзуси бўлса керак.

- Албатта, бор. Агар миллий жамоа таркибида тўп суриш имкониятига эга бўлсам, бор куч-ғайратимни ишга соламан. Чунки Ўзбекистон шаънини халқаро майдонларда муносиб ҳимоя қилиш шарт.

- Профессионал футболчи сифатидаги дебют ўйинингиз ёдингиздами?

- Ҳа, кечагидай эслайман. Наманганда «Навбаҳор»га қарши баҳсда биринчи марта асосий таркибда майдонга тушгандим. Ҳаяжон юқори бўлганди, чунки мухлисларга тўла стадионда кучли жамоага қарши баҳс олиб боргандик.

- Сиз учун қай бири муҳим: кучли жамоанинг бир бўлаги сифатида совринлар ютишми ёки ўртамиёна жамоада яққол етакчи сифатида мувафаққият қозониш?

- Ҳар бир футболчи кучли жамоада тўп суриш, совринлар ютишни хоҳлайди. Айни пайт бу борада кенг имкониятларга эга клубда ўйнаётганимдан фахрланаман. «Насаф»нинг бир бўлаги сифатида жамоа манфаатлари йўлида тер тўкиб, эришилаётган натижаларга ҳисса қўшаётганимдан хурсандман.

- «Насаф»да ҳамиша иқтидорлар етарли бўлган. Уларга қарши муносиб рақобат қилиш учун кимларнинг тавсияларига қулоқ тутасиз?

- Оила аъзоларимдан маслаҳат оламан. қолаверса, ўз устимда тинимсиз ишлашга интиламан. Умуман олганда, рақобат бўлгани яхши. У изланишга ундайди.

Хуршид ЮСУПОВ суҳбатлашди, "ИнтерФУТБОЛ" газетаси.