- Ўзбекистон клублари футболчиларига жорий мавсум учун ҳайкал қўйиши керак. Улар деярли бутун мавсум бўйи 8 кунга 3та ўйин тартибидан-да тиғизроқ тақвим бўйича ўйнамоқдалар. Кўзда тутилмаган ҳолат юзага келгач, Хитой, Ж.Корея ва ҳаттоки, Қозоғистонда чемпионат форматини ўзгартиришди, шунинг баробарида кубок турнирини бекор қилишди, бироқ ПФЛ бундай йўлдан юришни истамади. Кўринишидан, ташкилотда футболга компьютер ўйинидек қарашга кўникиб қолишди, кунига 5тадан учрашув ўтказиш мумкин ва майдонлар ҳаттоки, декабрь ойи ўрталарида идеал ҳолатда бўлади, деб ўйлашга ҳам.

*******

- ОЧЛ турнирининг «Ғарб» минтақаси ўйинлари якунланганига 1 ойдан ошди, аммо унинг оқибатлари жамоаларни ҳам таъқиб этмоқда. ОФК кечагина мураббийлари ва футболчилари регламентни бузишгани учун жазоланган клублар рўйхатини эълон қилди. Мисол учун, «Ал-Садд» бош мураббийи Хавига «Ал-Айн»га қарши биринчи ўйиндан сўнг матбуот анжуманига киришдан бош тортгани учун 18750 доллар миқдорида жарима солинди. Клубнинг ўзи эса 24375 доллар тўлаши керак. Жарима суммасининг катталиги сабаби шуки, Хави ОЧЛда матбуот анжуманини 5-марта ўтказиб юборди.

«Ал-Дуҳайл»нинг 3 нафар футболчиси учун флэш-интервьюга 4 бора рўйхушлик қилмаслик уларнинг ҳар бирига 10000 доллардан тушди, клуб эса ҳар бир ҳолат туфайли 15000 доллардан йўқотади. Яна бир жазоланган клуб - «Ал-Наср»нинг вакиллари ҳам флэш-интервью ва матбуот анжуманларига беписанд қарашган. Бироқ бош жабр­дийда - бу «Ал-Айн»нинг қозоғистонлик легионери Бауржан Исламхан. У допингдан фойдаланиш масаласида тушди. ОФК айни пайт «В» пробасини текширмоқда, унинг натижасига қараб, қарор чиқаради.

*******

- Ягона Давлат хизматлари интерактив порталига кириб кўрсангиз, АГМК ФК мулкчилик шакли - хусусий. Ваҳоланки, клуб акциялари 100 фоиз Давлат активларини бошқариш агентлигига тегишли. «Кўзларингга ишонма», деган Козьма Прутков қафасдаги фил остидаги «буқа» ёзуви ҳақида. Шунингдек, «Локомотив» шакли ҳам хусусий мулкчилик, гарчи 100 фоиз акцияси айни шу Агентлик тасарруфида бўлса ҳам. Бироқ биласизми, «Локо»ни АГМКдан қандай фарқи бор? Тошкент клуби минг баравар қиммат туради. Қаранг, АГМК ФК устав жамғармаси атиги 3 миллион сўм бўлса,  «Локомотив»ники 3 179 621 647 сўм ва 24 тийинни ташкил қилмоқда.

Алишер НИКИМБАЕВ, «Футболиум»