Куз фаслининг дастлабки кунлари Бергамодаги «Гевисс» стадионида сўнгги ўзгаришлар амалга оширилди. Арена деворларига илинган байроқчалар, суратлар ва янги фасад унинг кўркига кўрк қўшди. «Аталанта» қаторасига 2-марта Европанинг энг нуфузли клуб турнирини қабул қилишга тайёргарлик кўраётганди. Аслида янги мавсумга ҳозирланиш учун вақт деярли қолмаганди. Зеро, августда «ПСЖ» ва «буюк» Шупо-Мотинг «Аталанта» майдонига ташриф буюрди, октябрда эса янги мавсумнинг гуруҳ босқичи старт олди ва бергамоликлар дебютант «Мидтьюлланд» устидан қозонилган ғалаба (4:0)ни чинакам совға сифатида қабул қилишди...

***

Гап шундаки, Бергамо пандемия даврида кўплаб мусибатларни бошдан кечирди - шаҳарда михланган тобутлар ва вафот этганлар сони битилган совуқ рақамлар ҳали унутилмаган. Коронавируснинг илк хуружи бошланган февралда «Аталанта» мухлислар қалбини ром этишда давом этаётган ва тўхташни хаёлига ҳам келтирмаётганди. Ломбардия ва Бергамо коронавируснинг Италиядаги дастлабки ўчоқлари бўлди. Ҳа, вируснинг қабиҳ юриши айнан мамлакат шимолидан бошланди. Қурбонлар сони кун сайин ошиб, май ойигача 16000 кишига етди. Папа Иоанн ХХIII госпитали бош шифокори Фабио Пеццоли - «Аталанта»нинг ашаддий мухлиси. У юз бераётган воқеа­лардан «шок» ҳолатига тушиб қолганди: «Бергамо фуқароси сифатида тобутлар ортилган ҳарбий машиналарни кузатишим қийин. Бу даҳшатли азоб-уқубат... Ўзим ҳам оиламиз аъзосидан айрилдим».

***

«Аталанта» «Сан Сиро»да «Валенсия» устидан 4:1 ҳисобида устун келганида, доктор Пеццоли ҳам стадионда эди. 19 февраль оқшомида бўлган ўша учрашувни стадионда 45000 мухлис кузатди. Испания клуби батамом маҳв этилди, Бергамода байрам бошланди. Ғалаба сурури яшин тезлигида бутун шаҳарга ёйилди, бироқ вирус янада кучли тезлик олди. Эртакнамо оқшом даҳшатли фожиага уланиши, минглаб мухлисларни бахтиёр қилган ўйин «биологик бомба» мақомини олиши ҳеч кимнинг хаё­лига келмаганди. Хуллас, «Аталанта» - «Валенсия» ўйини Бергамони пандемия марказига айлантирди. «Даҳшатли воқеалардан кейин ўта ноқулай ҳолатга тушиб қолдим. Айбдор бўлганимиздан ўзимиз бехабар эдик. Стадион беихтиёр заҳарланиш ўчоғига айланди. Лекин... «Аталанта» ЧЛда майдонга тушганида ўйинни қандай ўтказиб юбориш мумкин?» - дейди доктор Пеццоли куйиниб.

***

Ўша оқшом 30 ёшли Николо Манклосси ҳам стадионда эди. У болалигидан «Аталанта»нинг бирор уй учрашувини ўтказиб юбормаган, доимо отаси ҳамроҳлигида стадионга ошиққан. «Аталанта» «В» серияда ўйнаган, юксак савиядан жуда йироқда бўлган вақтда ҳам. «Аталанта»ни ЧЛда кўриш - бу азалий орзусидан ҳам катта нарса. Шу боис ўн минглаб фанатлар Бергамодан Миланга йўл олишди. Бундай оммавий сафарга ҳеч дуч келмагандим. Чинакам мўъжиза. Қандай фалокат юз берганини эса ўйиндан кейин англадик. Қисқа вақт ичида хурсандчиликдан асар ҳам қолмади. Ҳаёт тўхтаб қолгандек эди, гўё...», - дейди Николо.

***

Италия бош вазири Жузеппе Конте 8 март куни Бергамо ва унга туташ ҳудудларда карантин ҳолати жорий этилганини маълум қилди. «Аталанта» жумладан, «Валенсия»га қарши жавоб учрашувини бўм-бўш «Месталья»да ўтказди. Аммо 8:4 кўринишидаги якуний ғалаба Бергамода юз берган фожиа туфайли ҳеч кимга татимади. Ўйин ниҳоясига етгач, футболчилар либосларидаги ёзувларни кўрсатган ҳолда, жонажон шаҳарларини қўллаб-қувватладилар: «Бергамо - бу сен учун. Таслим бўлма!» Тез орада футбол мажбурий танаффусга чиқди. Муҳими, шу ўта оғир вазият шаҳар ва клуб ўртасидаги мус­таҳкам риштани яққол кўрсатиб қўйди. «Аталанта»га мухлислик қилиш - Бергамо фуқаросининг ёзилмаган мажбурияти. Карантин даври бирор футболчи шаҳардан чиқмади, халқ ташвишига шерик бўлиб, қўлидан келганича ёрдам берди», - дейди маҳаллий Eco di Bergamo газетаси муҳаррири Андреа Валезини.

***

Фанатлар ёқимтойига айланган жамоа сардори Папу Гомес шифохоналар билан бирдамлик ҳаракатини йўлга қўйиб, шаҳар ва «Аталанта» ўртасидаги алоқани янада мустаҳкамлади. Шунингдек, тиббий асбоб-ускуналар, ниқоблар харидига пул ажратиш асносида пандемияга қарши курашда фаоллик кўрсатди. Унинг ҳаракати жамоадошлари ва мухлислар ҳисобига аста-секин кенгайиб борди. Тез орада улар дала госпитали қурилишига ҳисса қўшдилар, 200 ўринга мўлжалланган махсус муас­саса 10 кун ичида беморларни қабул қила бошлади. Хуллас, Италияда фанатлар мавқеи унча юқори бўлмасада, улар шифохоналар ва тиббий ходимларга яқиндан ёрдам бердилар. 38 ёшли Марко Пировано ихтиёрий равишда госпиталларга ҳафталаб озиқ-овқат ва керакли анжомларни ташиди: «Шаҳар эҳтиёжини қондиришдек хайрли ишга ҳисса қўшганимдан мамнунман. Қийин кунларда кўмак бериш - одамийликнинг ёрқин белгиси».

***

Умуман, бергамоликлар ўзларини «Аталанта»нинг ажралмас аъзоси, деб биладилар. Айниқса, «Аталанта»нинг собиқ футболчиси, маҳаллий бизнесмен Антонио Перкасси 2010 йили 2-марта клуб президенти лавозимини эгаллаганидан кейин бундай туйғу янада кучайди. Ўшанда жамоа «В» серия­сида тўп сураётган ва иқтисодий муаммолар исканжасида қолганди. Мана, охирги 10 йилликда «Аталанта» қаддини ростлаб, Европа грандларига муносиб қаршилик кўрсатадиган жамоага айланди. «Биз Бергамога муносиб «Аталанта»ни қайтаришга ваъда бергандик. Бу оилавий тарих», - деганди Перкасси фарзандларининг клуб директорлар кенгашидан ўрин олишганига изоҳ тариқасида. У президент сифатида иш бошлаганидан кейин шаҳар ва жамоа ўртасидаги муносабатлар мислсиз даражада мустаҳкамланди. Перкасси кўрсатмасига биноан, шаҳардаги туғруқхоналарда чақалоқларга «Аталанта» либосларини совға қилиш йўлга қўйилди.

***

«Аталанта» тараққиётига энг катта ҳисса қўшган шахслардан бири сифатида жамоа бош мураббийини эътироф этиш жоиз. Жан-Пьеро Гасперини ўзининг севимли 3-4-3 тактик схемасини таркибида юлдузлари йўқ камтарин жамоада татбиқ этиш орқали аутсайдерни етакчи тўртликка даъвогарлар қаторига олиб чиқди. Бергамо кўчаларидаги манзара маҳаллий аҳоли «Аталанта»ни қаттиқ ҳурмат қилишидан далолат беради. Қаерга қарасангиз, қора-кўк рангли байроқчалар, клубга оид суратлар ва баннерлар... Бергамо клуби жорий мавсум ҳам чакки кўринмаяпти. Тўғри, ЧЛдаги ёрқин дебютга «Ливерпул»дан қабул қилинган йирик ҳисобли мағлубият (0:5) бироз соя солган бўлсада, мухлислар жамоага тўлиқ ишонадилар ва ундан ёрқин ғалабалар кутадилар. Нуфузли турнирдаги узоқ танаффус туфайли Бергамо муросасиз баҳсларни соғиниб қолгани аниқ. Мухлисларнинг навбатдаги ҳар бир баҳсни сабрсизлик билан кутишлари ҳам бор гап. Ҳа, учрашувлар ҳозирча ёпиқ стадионларда ўтмоқда, лекин телеэкран қаршисида ўйинни кузатиш имкониятини мухлислардан ҳеч ким олиб қўёлмайди. Чунки уйдаги томоша трибуналардаги тўс-тўполонлар ва бўсалар, энг муҳими, хавфли вирус билан заҳарланиш эҳтимолидан холи...

Д.АЛИМОВ тайёрлади