Бу сафар футбол даҳоси - бизнинг авлод Марадонаси ҳақида ёзишни кўнглимизга туккандик. Бироқ ўтган шанба ва якшанба воқеалари ҳаммасини ўзгартириб юборди. Буюк Диего мангу уйқуга кетди. Биз унинг хизмати олдида бош эгиб, футболимизда ғафлат уйқусини бузишга қаратилган уринишларга эътибор қаратмоқчимиз.
Тасаввурдаги тантананитополмадик
Газетамизнинг аввалги сешанба сонида «Пахтакор»нинг 13-чемпионлиги хусусида етарли даражада ёздик, жамоани самимий олқишладик. Орадан бир ҳафта ўтди. «Шерлар» бу орада Қаршида, аёвсиз «жанг»да «Насаф»га ютқазишди. Ўша ўйин ҳақида мулоҳаза юритишдан ўзимизни тиямиз. Агар «Пахтакор» чемпион сифатида майдонга тушмаганида, тилимизнинг учида турган гапларни ёзармидик... Якшанба оқшоми эса, «Пахтакор» ниҳоят, чемпионликни нишонлади. Хурсандчиликка нима етсин?! Футболчиларнинг юз-кўзидаги қувончни кўриб, биз ҳам яйрадик. Болажонларнинг тантанада қатнашганлари шукуҳга шукуҳ қўшди. Эфир якунлангач, ўша тантана кайфиятида анча вақт ўтирдик. Очиғи, ўзимиз билан ўзимиз баҳслашдик. Хўш, Ўзбекистоннинг фахри саналмиш «Пахтакор»нинг чемпионлик тантанаси шу тахлит нишонланиши керакми? «Йўқ!» - дея жавоб қайтарди ички овоз бу саволга. «Унда қандай бўлиши керак эди?» - ўша ички овозни саволга тутдик. Тадбир бутунлай бошқача, миллий анъаналар руҳида ташкиллаштирилиши керак эди. «Пахтакор» жамоавий руҳда миллий қадриятлардан тобора узоқлашиб бормоқда. Клубда европача кайфият ҳукмрондек. Тўғри, жамоа бошқарувида турли миллат вакиллари ишлашади. Лекин 5-6 кишининг ҳурматидан бутун бошли миллий руҳ унутилмайди-ку?! Майдон узра ўзбекона шўх куй-қўшиқлар янграса, бундан Дмитрий Адисман, Шота Арвеладзе ёки Драган Черан хафа бўлишармиди? Аксинча ўзбекона экзотика улар учун қизиқарли-ку?! Қолаверса, нафақат «Пахтакор», балки пахтакорлар ҳам мавсумни якунлашди. Жамоа ўша заҳматкашлар номини кўтариб юрибди. Қувончли дамларда пахтакорларнинг «Пахтакор» билан ёнма-ён туришлари мақсадга мувофиқ эмасми? Чемпионлик тантанасини миллий руҳда нишонлаш шунчалар қийинми? «Совуқда, пандемия пайтида ортиқча дабдабанинг нима кераги бор», дейишингиз мумкин. Йўқ, бундай катта тантаналарга миллий руҳият ва тараққиёт гулхани сифатида қарашимиз даркор! Футболимиз йиллар давомида турли баҳоналар таъсирида орқага чекинавериб, мухлисларидан айрилмоқда. Чунки муҳит бегоналашмоқда.
Яна бир мулоҳаза чемпионлик кубогига тааллуқли. ПФЛ вакилининг сўзларидан аён бўлдики, ўтган йилги кубок ҳам, бу йилгиси ҳам «Пахтакор»да қолади. Агар жамоа кейинги йили яна чемпионликка эришса, яна янги кубок. Хулоса қилиш мумкинки, янги мавсумда жамоалар янги чемпионлик кубоги учун курашади. Бу кетишда кубокнинг қадри қоладими?
Чала ҳақиқат - янгиадолатсизлик дояси
Келишилган ўйинлар ҳақида ўнлаб мақолалар ёзганимизни мухлислар яхши билишади. Рустам Мирсодиқовнинг жазоланиши билан боғлиқ «Пахтакор» - «Металлург» учрашуви тўғрисида мутасаддиларга алам қиладиган даражада танқидий мулоҳазаларни ёритганмиз. Кечагидек ёдимизда, охиргисини 2 ойча олдин «Ҳуштагидан қизармасин ҳеч бир ҳакам» сарлавҳаси остида эълон қилгандик. Хайрият, ЎФА ҳам астойдил ишга киришган кўринади. Аслида келишилган ўйинлар ялпи жараён ҳамда ҳозиргача кўриб чиқилмагани тушунарсиз. Ҳакамнинг ўғли ҳакам... Равшан Эрматов футболимиздаги паст-баланд воқеаларни билмайди, деб ўйлайсизми? Йўқ, бундай ўйламайсиз! Минг-минглаб мухлислардан сўранг, улар Равшан Эрматов ҳаммасини билишини айтишади. Билмаслик учун одам фақат ухлаши керак. Равшан Эрматов эса жаҳонни лол қолдирган зукко ҳакам. Бугун унга ўта-ўта қийин. Аксарият ҳакамлар ўзи ва отасининг қадрдонлари ёки уларга алоқадор кишилар. Хуллас, вазият жуда жиддий. Равшан Эрматов душманга ҳам раво кўрилмайдиган ҳолатда. Лекин энди ортга чекиниб бўлмайди. Чунки бир гуруҳ ҳакамларнинг оёқлари ердан узилди. Улар ўйин жонли эфирга узатилаётганини ҳам унутиб, сурбетлик йўлига ўтишганди. Натижада ўзбек футболи мухлислари хўрланишди. Адолатсизлик футболимизни ўлдирмоқда. Бундай тарзда футбол ривожланмайди, униб-ўсмайди. Шунинг учун ҳакамлар билан боғлиқ коррупция ҳолатлари тўла-тўкис очиб ташланиши лозим. Зеро, чала ҳақиқат яна янги адолатсизликка йўл очади. Тўғри, ҳозирча шубҳаларимиз бор, аммо аниқ далил йўқ. Бироқ яқин орада ҳакамлар ёки футболчилар орасидан бирор «Штирлиц» чиқишига ишончимиз комил. Умид қиламизки, футболимизда ҳам найранг-андишалар даври тугайди ахийри...
Муҳаммад ВАЛИ, "ИнтерФУТБОЛ" нашри
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20