Футболчи Фижи оролларидан Ҳиндистонга бориш йўлида 3 бора карантин муддатини ўтади - жами 40 кун. Рой Кришна - Ҳин­дистоннинг «Мохун Баган» клубида ўйнайдиган фижилик футболчи. У аввалги мавсум ҳинд лигасининг 21та ўйинида қатнашиб, 15та гол урганди. Бундан 2 йил олдин Австралияда фаолият юритган Кришна «яшил қитъа»да ҳаттоки, мавсумнинг энг яхши футболчиси сифатида эътироф этилганди.

Хуллас, таътилни Фижида ўтказган Рой Кришна ҳордиқ муддатини одатдагидан анча қисқартиришга мажбур бўлди. Чунки унинг коронавирус пандемияси туфайли Ҳиндистонга етиб олиш йўлида 3та мамлакат (!)да 1 ойдан кўпроқ вақт карантинда ўтиришига тўғри келарди. Кришна пандемиядан олдин ҳам «Мохун Баган» ихтиёрига 4та рейс билан етиб борарди. Лекин битта фарқ­ли томони шуки, 4та парвоз 2 кунга чўзиларди.

Энди Рой Кришнанинг кузги саргузаштига эътибор қаратинг:

***Фижи халқаро аэропортидан рейс. Кришна 3 соатлик парвоздан кейин Янги Зеландиянинг Окленд шаҳрига борди. Футболчини у ерда 2 ҳафталик карантин кутиб турарди. «Қоидаларга қатъий амал қилдим. Доимий равишда дезинфекция, спиртли салфетка билан артиш, масофа сақлаш...», - дейди Кришна. Хуллас, у Оклендда карантин учун мўлжалланган бинода яшади ва умуман ташқарига чиққани йўқ, ваҳоланки, сайр қилиш тақиқланган эмасди. Карантин муддати тугаши билан футболчи шаҳардаги қариндошлари уйига борди (ўзи ҳам Янги Зеландия паспортига эга) ва яна бир ҳафта улар билан қолди: гольф ўйини ва пляжлар бўйлаб сайрдан роҳатланди. Лекин ўз ихтиёри билан эмас - Австралияга бўладиган навбатдаги рейсни кутишга маҳкум эди. Қарангки, бир ҳафталик кутишдан сўнг Кришнани самолётга қўйишгани йўқ. У тиббий протоколни нотўғри тўлдирган эди. Шу тариқа Рой яна бир неча марта тест топширишга мажбур бўлди. Шундан кейингина унинг Сидней рейсига чиқишига рухсат беришди.

***Австралияга парвоз 3 соатни олди. Бунга қўшимча тарзда 2 кунлик карантин.

***Кейин Деҳлигача яна 13 соатлик парвоз ва бир оқшом карантин.

***Ниҳоят, Кришна «Мохун Баган» клуби ўйнайдиган Гоа штатига етиб олди. Аммо у ерда ҳам маҳаллий лига талабига мувофиқ, икки ҳафта изоляция шароитида яшади. Фижилик футболчи бу вақт оралиғида мустақил равишда шуғулланиб, клубдошлари билан скайп орқали гаплашиб турди. Умумий ҳисобда айтсак. бечора Рой биринчи рейсга ўтиришидан нақ 40 кун ўтибгина жамоавий машғулотларга қўшилди (3 ноябрь куни «Мохун Баган» ихтиёрида бўлди). Кришнанинг ўзи бу борада чуқур ҳўрсинади: «Карантин муддати тугагач, биринчи қилган ишим - жамоадошларим билан кўришишга югурдим. Шунингдек, кўчада жим турганча Гоанинг тоза ҳавосидан тў­йиб-тўйиб нафас олдим. Худдики, узоқ ва машаққатли сафардан уйга қайтгандек бўлдим». Шу тариқа Рой Кришнанинг карантин-саргузаштлари тугаб, у 27 ноябрь куни «Мохун Баган» ўйинида иштирок этди.

А.АҲМЕДОВ тайёрлади