Мартин Брэйтуэйт «Барселона»нинг охирги 3та ўйинида 4та гол урди, жумладан, «Камп Ноу»да ҳам ниҳоят, рақиб дарвозасига йўл топди. Тўғриси, ҳеч ким ундан бундай кескин ўзгаришни кутган эмасди.

Мартин Брэйтуэйт - «Барселона» сафига ўтган қишда қўшилган истиқболли ҳужумчи. Эсласангиз, Каталония клуби унинг трансферини шошилинч равишда амалга оширган эди. Яъни Усмон Дембеле ва Луис Суарес жароҳат туфайли четга чиқишгач, клуб Испания чемпионати регламентидаги муайян банддан фойдаланиб, «Алавес» вакилини трансферлар бозори ёпилганидан кейин сотиб олди. Бироқ катта умидлар билан таклиф этилган Брэйтуэйт гол борасидаги статистикаси билан ҳеч кимни ортиқча ажаблантиролмади. Рақамларда айтсак, у мавсумнинг иккинчи ярмида «Барса» учун атиги 1та гол урди, ваҳоланки, Примеронинг ўзида 11 марта майдонга тушди.

Деярли ношудга чиқарилган ҳужумчи янги мавсумни ҳам жуда сокин бошлади, лекин охирги ўйинларга келиб, бирдан ўзини намоён этишга тушди. Мана, Брэйтуэйтнинг голли сериясига қаранг:

***Киев «Динамо»сига қарши кечган ЧЛ ўйини - 2та гол ва самарали узатма.

***«Осасуна»га қарши кечган Ла Лига ўйини - 1та гол. Бу Мартин учун «Камп Ноу» стадионида урилган биринчи гол!

***«Ференцварош»га қарши кечган ЧЛ ўйини - 1та гол. Ҳужумчи бунга қўшимча тарзда пенальти ишлади ва ундан Усмон Дембеле унумли фойдаланди. Яна бир факт: Мартин биринчи бўлимда «Барселона»нинг тўпга энг кам тегинган майдон ўйинчиси бўлди.

Мартин Брэйтуэйт жорий мавсум барча турнирлар доирасидаги 10та ўйинда қатнашиб, жами 4та гол урди.

А.АБДУВАЛИХЎЖАЕВ тайёрлади