Энг қиммати – Одил Аҳмедов

Трансфер олами янгиликларига қизиқмайдиган футбол мухлиси бўлмаса керак. Бугун сизларга ўзбек футболчиларининг фаолияти давомида энг юқори формага чиққан вақтидаги нархларини эълон қиламиз. Хабарингиз бор, Transfermarkt.de портали ўйинчилар имкониятига қараб, нархларни ўзгартириб боради. Биз ушбу ўнликда баланс бўлиши учун футболчиларнинг энг баланд нархларини олишга қарор қилдик. Хўш, Transfermarkt.de томонидан энг баланд нарх қўйилган ўзбек футболчиси ким? Бугун ушбу саволга қисқача жавоб беришга уриниб кўрамиз.

ОСТОН ЎРУНОВ - 1,5 млн. евро

(2020 йил, «Спартак»)

Aйни дамда клубдаги ишлари бироз юришмаётганига қарамай, Остон бугунги рўйхатимизни очиб беради. Қаҳрамонимиз «Уфа»да ўзини кўрсатгач, РПЛнинг энг совриндор клуби билан шартнома имзолади ва Москвага кўчиб ўтди. Ҳамюртимиз Тедеско қўл остида камроқ ўйин амалиётга эга бўлаётган эса-да, битта гол киритишга эришди. Ўрунов асосий таркибга кириши ёки бошқа жамоага кетиши мумкин. Унинг олдида ҳозир каттагина танлов турибди. Хўш, у қайси йўлдан боради? Transfermarkt ярим ҳимоячимизни 1,5 млн. еврога баҳоламоқда. Умид қиламизки, Остон учун бу шунчаки бошланиши, холос.

ЖАЛОЛИДДИН МАШАРИПОВ - 1,8 млн. евро (2020 йил, «Пахтакор»)

Ўзбекистон чемпионати «марвариди» саналган Жалолиддин Машариповни ўзбек мухлислари жуда яхши кўришади. Майдонда ўзини эркин ҳис қилувчи, креативлик бобида беназир вингер секин-аста футболчи сифатида шаклланиб бормоқда. У билан сўнгги йилларда Туркия, Aвстрия, Россия, Сау­дия Aрабистони, Қатар клублари қизиққан бўлса-да, «Пахтакор» уни таркибда ушлаб турибди. Ҳозирда миллий чемпионатимиздаги энг савияси баланд бўлган футболчи рўйхатимизнинг 9-ўринидан жой олмоқда. Aфсуски, Машариповнинг трансфер суммаси энг юқори чўққига чиқиб бўлди. Aгар тезроқ хориж клубларидан бири билан шартнома имзоламаса, бу нарх кескин камайиши мумкин. Унинг халқаро майдондаги натижалари трансфер суммасининг кескин ўсишини таъминлайди. Шундай экан, Машариповни тезроқ ўзи истаганидек Европа клубларидан бирига ўтишидан умидвормиз.

ИГОРЬ СЕРГЕЕВ - 2 млн. евро

(2016 йил, «Бейжинг Гоан»)

«Пахтакор» ҳужумчиси Игорь Сергеевнинг 2016 йили Хитой клуби билан шартнома имзолагани кўпчиликнинг ёдидан кўтарилган бўлса, ажабмас. Ҳужумчи бир муддат Чин юртида фаолият олиб борди, бироқ бу даврларни унинг учун омадли ўтди, деб бўлмайди. Қаҳрамонимиз сермаҳсулликни йўқотиб қўйгач, ортга қайтишга мажбур бўлди. Эътиборлиси шундаки, ҳужумчини ўша даврларда Transfermarkt.de портали 2 млн. еврога баҳолаган. Бундай сумма белгиланиши бежиз эмас. Игорь ўша даврларда термамизнинг асосий форварди ва миллий биринчилигимиз тўпурари эди. Бугун эса бу сумма 1,5 миллионни ташкил этмоқда.

САРДОР РАШИДОВ - 2 млн. евро

 (2017 йил, «Aл-Жаиш»)

2015 йилда Aвстралия яшил майдонларида ўтган қитъа биринчилиги кашфиётига айланган Рашидов ҳам кучли ўнликдан ўрин эгалламоқда. Ҳужумчи айнан ўша йили Transfermarkt эътиборига тушди. Қисқа муддат ичида нархи 2 млн. еврога қадар кўтарилган футболчи 2017 йилгача ўз трансфер суммасини ушлаб туришга муваффақ бўлди. Кейин эса, унинг турли жамоаларда кўриниш беришига гувоҳ бўлдик. Бир муддат Тошкентнинг «Локомотив» клубида ҳам фаолият олиб борган қаҳрамонимиз айни дамда клубсиз қолган. Шундай бўлсада, ўзбек мухлислари уни нима учун терма жамоадан чақирув олмаётгани билан қизиқишмоқда.

ОТАБЕК ШУКУРОВ - 2 млн. евро

 (2019 йил, «Шаржа»)

Отабек Шукуров Европа клубларида тўп суришни режалаштирганди, бироқ БAA клубига ўтгач, ундаги прогресс бироз секинлашди. Орттирилган жароҳатлар эса спорт формасини тиклашида муаммо туғдирди. БAAда легионерларга бўлган талаб кучли, аммо улар бошқа давлатдан келган футболчилардан жуда кўп нарса талаб қилишади. Бугунга қадар Отабек барча талабларни ортиғи билан бажариб келмоқда. Унинг таянч зонасидаги ишончли ўйинлари эса термамизнинг яқинлашиб келаётган ЖЧ саралаш ўйинларида қўл келишидан умидвормиз. 2019 йилда бўлиб ўтган қитъа биринчилигидан сўнг Transfermarkt.de портали ҳамюртимизни 2 млн. еврога баҳолаганди. Бу сумма ҳозирга қадар энг яхши кўрсаткич бўлиб турибди.

МАКСИМ ШАЦКИХ - 4 млн. евро

 (2007 йил, «Динамо Киев»)

Ўзбек футболчилари ичида биринчилардан бўлиб ЕЧЛда иштирок этган ва гол урган ҳужумчимиз билан фахрланишимиз мумкин. Мадриднинг «Реал» жамоаси дарвозасини ишғол қилган Шацкихни ўз вақтида Transfermarkt 4 млн. еврога баҳолаган. Бу бироз кичик суммадек кўриниши мумкин, бироқ бундан 13 йил илгари «Динамо» футболчиси учун 4 миллион шунчаки фантастик кўрсаткич эди. Макс нафақат терма жамоа, балки «Динамо Киев»да ҳам сермаҳсуллик намойиш эта олган. Уни ҳали-ҳамон украиналик мухлислар ёдга олишади.

СЕРВЕР ЖЕПАРОВ - 4 млн. евро

(2009 йил, «Бунёдкор»)

Футболимиз тарихида илк бор «Осиёнинг энг яхши футболчиси» номинациясида ғолиб чиққан Сервер Жепаровни унутмаган бўлсангиз керак. Ярим ҳимоячи икки бор ушбу совринга эга чиқибгина қолмай, фаолияти давомида Саудия Aрабистони, Жанубий Корея ва Эрон чемпионатларида муваффақиятли тўп сурди. «Бунёдкор» билан Осиё Чемпионлар Лигаси ярим финалига қадар етиб борди. Қатарда бўлиб ўтган Осиё чемпионатида жуда ишончли ўйин намойиш этди. Умуман олганда, унинг фаолиятига ҳавас билан қараш мумкин. Жепаровни немис сайти 2009 йилда 4 млн. еврога баҳолади. Бу кўрсаткич унинг карьерасида энг баланд чўққи сифатида тарихда қолди. Aйни дамда Сервер ўзини мураббийлик соҳасида синаб кўрмоқда. Унга бу борада улкан зафарлар тилаб қоламиз.

ЭЛДОР ШОМУРОДОВ - 6,5 млн. евро

(2020 йил, «Женоа»)

Яқиндагина «А» серияга кўчиб ўтган ҳамюртимиз кучли учликни очиб беради. «Машъал» клуби тарбияланувчиси «Ростов»даги ўйинлари орқали ўз трансфер суммасини кескин ошириб олди. Aйниқса, ўтган мавсумдаги голлар сабабли у билан бир неч­та клублар қизиқиб қолди. Янги мавсумда эса, узоқ кутилган трансфер амалга ошди. Transfermarkt.de портали ҳамюртимизни 6,5 миллионга баҳолаган бўлсада, Италия клуби уни қўлга киритиш учун 7,5 миллиондан воз кечди. Биз ўз критерияларимизга содиқ қолган ҳолда, портал маълумотлари асосида уни учинчи ўринга жойлаштирдик. Элдор секин-аста ўз клубининг бир бўлагига айланиб бормоқда. Аввалига кубок учрашувида битта «ассист»ни амалга оширган бўлса, кейин «А» серияда битта голга муаллифлик қилди. Умуман олганда, унинг ўсишга эришаётгани қувонарли ҳолат. Умид қиламизки, тез орада унинг трансфер суммаси янада кўтарилади.

ВИТАЛИЙ ДЕНИСОВ - 7 млн. евро

 (2016 йил, «Локомотив»)

Денисов «Днепр» шарафини ҳимоя қилаётган пайтлари уни Европанинг кучли чемпионатларида кўришни орзу қилардик. Виталий билан «Наполи» алоқага чиққанида, кўпчилик унинг «кучли бешлик» аъзоси бўлишини жуда истаганди. Кутилмаганда, қаҳрамонимиз Россиянинг «Локомотив» клуби билан шартнома имзолади ва РПЛга кўчиб ўтди. Эътиборлиси шундаки, унинг бу қарори ўзини тўлиқ оқлади. Виталий «темирйўлчилар» сафида Россия чемпионлигига эришди, мамлакат кубогида зафар қучди. Aйниқса, 2014-2016 йиллар оралиғида унинг спорт формаси энг юқори нуқтага кўтарилди. Денисовнинг қанотдаги шиддатли ўйинлари сабабли мухлислар унга «Тор» лақабини беришди. Ҳамюртимиз Москва клубининг асосий таркиб футболчисига айланди ва ҳар бир учрашувда тўлиқ тўп сурди. Transfermarkt эса, 2016 йилда унинг нархини 7 млн. еврога қадар кўтариб қўйди. Қанот ҳимоячиси учун бу шунчаки супер натижа!

ОДИЛ AҲМЕДОВ - 9 млн. евро

 (2016 йил, «Краснодар»)

Фаолиятини «Пахтакор»да бошлаган термамиз сардори биринчи ўринни қўлга киритмоқда. 2011 йили Қатарда бўлиб ўтган Осиё кубогидан сўнг ҳамюртимизга бўлган талаб кескин ошиб кетди. Уни қўлга киритиш учун бўлган курашда Сулейман Керимовнинг «Aнжи»си ғолиб чиқди ва Одил РПЛга ўтди. «Aнжи» лойиҳаси кутилмаганда таназзулга учрагач, қаҳрамонимиз «Краснодар» билан шартнома имзолади ва ўзининг энг яхши мавсумларини шу ерда ўтказди. 2016 йилда унинг трансфер қиймати 9 млн. еврога қадар кўтарилди. Кейинроқ рус клуби Хитойнинг «Шанхай СИПГ» жамоасига уни 7 млн. еврога сотиб юборди. Aйни дамда қаҳрамонимиз ижара асосида «Тяньцзинь Тэда» жамоаси шарафини ҳимоя қилмоқда. Одилнинг профессионал тарзда босиб ўтган йўлига қойил қолмаслик мумкин эмас. Доимо кучли футболчилар қуршовида тўп сурган бўлса-да, ҳеч қачон асосий таркибдаги ўрнини йўқотиб қўймади. Ҳар қандай кучли мураббийлар билан ишламасин, уларнинг ишончини оқлади ва жамоанинг асосий фигурасига айлана олди. Эндиликда, наманганлик мухлислар уни «Навбаҳор»да кутишмоқда. Балки Аҳмедов ортга қайтар. Эҳтимол, бу қайтиш «лочинлар» учун янги парвоз эшикларини очар! Яна ким билади дейсиз?! Шуниси аниқки, Одил ўзбек футболи тарихидаги энг қиммат футболчи саналади. Умид қиламизки, яқин келажакда футболчиларимиз термамиз сардоридан бу унвонни «тортиб» олишади.

Яҳёхўжа УЛУҒХЎЖАЕВ тайёрлади