Хосе Луис Чилавертнинг Парагвай президентлигига номзод экани ҳақидаги янгиликни эшитдингизми? Йўқ, бу фейк эмас. Ўтмишнинг собиқ дарвозабонларидан бири ҳақиқатан ҳам 2023 йилги сайловга номзодини қўйишини билдирди. Бунга турлича муносабат билдириляпти. Баъзилар Хосе Луисни қўллаб-қувватлаётган бўлишса, бошқалари танқид қилишяпти, ҳатто устидан кулишяпти. Масалан, бир фойдаланувчи фотошоп ёрдамида Чилавертнинг юзини масхарабоз қиёфасига ўзгартирди.
Чилавертнинг ўзи яқинда сўзлаган нутқида шундай деди: «Буюк ишларни бажаришга тайёрман. Футбол билан шуғулланишни хоҳламайман, чунки кўп вақт йўқотганман. Буни олдинроқ қилишим керак эди. Бошқа томондан, мамлакат учун қандайдир фойда келтиришни истайман».
Чилавертга бу нима учун керак?
Хосе Луиснинг асосий эътирози - мамлакатдаги ҳар тармоқда кузатилаётган коррупция. 2018 йилнинг ноябрь ойида The Global Americans Парагвайнинг сиёсий манзарасини тавсифловчи матнни нашр этди. Президент Марио Абдо Бенитес 2018 йилги сайловлардан сўнг дарҳол атрофига янги мутасаддиларни жамлади. Уларнинг аксарияти жиноятчилик билан чамбарчас боғлиқ эдилар.
Бенитес мамлакатни икки йил бошқариш давомида:
- Кейинчалик коррупция схемаси деб тан олинган суд ислоҳотини қўллаб-қувватлади.
- Акасини молия вазири этиб тайинлади.
- Итайпу тўғонидан фойдаланиш бўйича Бразилия билан шартнома имзолади. Итайпу - Бразилия ва Парагвай чегарасида жойлашган йирик гидроэлектр станциясидир. Ушбу келишув туфайли иш деярли импичментгача етиб борди. Кейинчалик Бенитес шартномани бузди.
Чилаверт Бенитесни ва бутун ҳукуматни танқид қилмоқда. Сайлов қарорига бағишланган постида Хосе Луис шундай ёзади: «Жазосизлик, коррупция ва қимматфурушликка чек қўйиш вақти келди».
Қаҳрамонимиз аввалги чиқишларида ҳам ёрқин хитоблар қилганди:
1. «Бойларнинг оддий меҳнаткашларни талаётганларини кўряпман. Одамлар жабр кўришмоқда. Президент ҳам, унинг ёрдамчилари ҳам оддий халққа аҳамият бермайдилар. Фақат ўзларини ўйлашади».
2. «Венесуэла ҳукумати гўзал мамлакатни нотинч ҳудудга айлантирди. Бу одамларнинг севимли Парагвайимни ҳам айни ҳолга солишларини истамайман».
3. «Парагвайнинг камбағал ҳудудларида яшаш? Ноқулайми? Йўқ, аксинча бой бўлиш ва камбағалларга ёрдам бермаслик ноқулай. Уларнинг аксарияти мамлакатимизда шундай яшашади».
Парагвайда Чилавертни яхши кўришади. Ҳали футбол ўйнаб юрган пайтидаёқ мухлислар уни бўлажак президентга чиқаришганди
Чилаверт Парагвайда футболни ривожлантириш учун бутун фаолияти давомида курашган (жуда кўп нутқ сўзларди) ашаддий дарвозабон ва тўпурар эди. Шунинг учун ҳам уни мамлакатда жуда яхши кўришади. Терма жамоанинг уй учрашувларида мухлислар уни бўлажак президент деб аташди.
Бўлажак президентлик тўғрисидаги саволни унга узоқ 2004 йилда, фаолиятини тугатган пайтда беришган, жавоб эса қуйидагича бўлганди: «Билмайман. Тажрибам озлик қилади. Аммо одамлар мендан сўрасалар, тайёр бўлардим. Мен улар учун ишлашга ҳамиша шайман».
Чилаверт ҳали сиёсий фаолиятини бошламаган. Ҳозирча у шунчаки кўп гапиради. Масалан, Парагвай ҳукуматидан Асунсьонда стадион ва болалар футбол лагерларини қуриш учун пул сўраган. Шунингдек, КОНМЕБОЛни ташкилот ичидаги коррупция учун танқид қилган.
Фаолиятини тугатгандан сўнг, у Парагвайда ўзининг футбол дастурини ишлаб чиқди: камбағал ҳудудларга саёҳат қилди, терма жамоанинг собиқ ва ҳозирги футболчиларини бу ерларга олиб келди ва спорт мактаблари, майдончалари қурилишига маблағ киритди. «Парагвайда жуда кучли ёш футболчилар бор. Биз уларнинг ривожланишига ёрдам беришимиз керак».
Чилаверт ҳали сайлов кампанияси ҳақида гапирмаган - унинг сўзларига кўра, келажакда ҳамма тафсилотларни билиб олади. Ҳозирча у фақат ижтимоий тармоқларда ўтириб, Парагвайнинг ҳозирги ҳукуматини фаол танқид қилмоқда.
А.АҲМЕДОВ тайёрлади
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20