Футболчилик фаолиятининг якуний босқичини ўтказаётган аргентиналик даҳо хорижлик касбдошимиз билан бўлган суҳбатда Барселонада ўтган ҳаёти ва келажак режалари хусусида фикр билдирди.

«Барселона» ҳақида

- «Барселона» - менинг борлиғим. Бу ерда 13 ёшимдан бери истиқомат қиламан. Клубда ва шаҳарда бирдек улғайдим. Нимани ўрганган бўлсам, шу ерда ўргандим. «Барса» менга ҳамма нарсани муҳайё этди, мен унинг равнақи учун бор кучимни сарфладим. Бизни кучли муҳаббат боғлаб туради. Чунки бу ерга келганимдан бери ҳамма нарсани ўртада баҳам кўрдик. Шаҳар ва клуб билан алоқадор жиҳатларни ўзимники, деб биламан. Фарзандларим шу заминда дунёга келишди. Ҳозир ҳаммаси жойида. Тўғри, ўтган мавсум якунида ва ёзда ўзимни жуда ёмон ҳис этдим. Кейин бир қатор нохуш воқеаларни бошдан кечирдим. Бюрофакс ва шунга ўхшаган кўргиликларни. Жорий мавсум стартида кайфиятим талаб даражасида эмасди. Бироқ ҳозир отдекман ва совринлар учун курашишга тайёрман. Биламан, клуб ўта мураккаб даврдан ўтмоқда. Лекин мен порлоқ келажакни сабрсизлик билан кутяпман. Спортдаги муаммолар туфайли йиғламадим, аммо кўп азоб чекканим рост. Тафсилотларга тўхталиб ўтирмасликни афзал кўраман.

Бартомеу ҳақида

- Кетишни истагандим, лекин уни самимий тарзда амалга оширмоқчи эдим. Клуб президенти мени ёмон отлиққа чиқаришга урина бошлади. Аммо мен унақа йигит эмасман. Қарорни қабул қилиш осон эмасди. Мен учун Барселонадан яхшироқ шаҳар бор, деган фикрдан йироқман. Оилам ҳам кетишга қарши эди. Ўзим эса шундай қилиш кераклигини ҳис этгандим. Чунки энди даврим поёнига етаётганди. Клубнинг собиқ президенти Бартомеу анчадан бери мени турли йўллар билан алдаб келди. Кетиш қарори бирданига пайдо бўлгани йўқ, у анчайин узун қисса. Агар судга мурожаат қилганимда, ҳақ эканлигим исботланарди. Бироқ бу ишни ўзимга раво кўрмадим. Ҳақиқат шуки, ўз тақдиримга етарлича аҳамият бермадим. Чунки клубда бундан муҳимроқ жараёнлар кўп эди. Қачондир MLSда ўйнашни орзу қилгандим, аммо бу амалга ошиш-ошмаслигини ҳозирча айта олмайман. «Атлетико» ёки «Реал»га ўтишни истамайман. Мақсадим - жамоа билан дўстона хайрлашиш ва клуб тизимига қайтиб, унинг равнақи йўлида хизмат қилиш. Футболчиликдан кейин ундан узоқлашмаслик ниятидаман. Лекин ўзимни мураббий ролида тасаввур этолмайман. Балки спорт директори вазифасида ишларман. Ҳа, жамоа оғир даврни ўтказаётганини яхши биламан. Аввалги муваффақиятларни такрорлаш осон эмас. Мавсум охирига қадар бошқа клублар билан музокарага киришмайман.

Неймарнинг қайтиши ҳақида

- Агар Неймарни қайтаришса, клубда қоламанми? Таркибга янги футболчиларни жалб этиш осон бўлмайди. Чунки бунинг учун пул керак, у эса йўқ. «ПСЖ» Неймарни қўйиб юборадими? Ҳар ҳолда, текинга бўлмаса керак? Янги президент мушкул вазифани ҳал этишига тўғри келади. Мувозанатни йўқотмаган ҳолда кўплаб ўзгаришларни амалга ошириш учун анчагина тер тўкиш лозим. Неймарнинг гаплари? У бирга ўйнаймиз, демаган, балки бирга ўйнашни истайман, деган. Собиқ трио ўртасида тез-тез мулоқот бўлиб туради.

Суареснинг кетгани ҳаҚида

- Клуб мутасаддиларининг Луис Суаресни бериб юборишгани менга бемаъниликдек туюлди. Уни совринларга даъвогарлик қиладиган азалий рақибга текинга беришди.

Гризманн билан муаммолар ҳақида

- Бу жамоадошим билан яхши муносабатдаман. Кийиниш хонаси ёки сафар чоғида кўпинча биргаликда мате ичиб турамиз. Ҳеч қанақа келишмовчилик йўқ ва бўлган ҳам эмас. ОАВдаги унинг трансферига қарши бўлганим ҳақидаги хабар ҳам уйдирма.

Шахсий ҳаёти ҳақида

- Рождество таътилини Аргентинада, оилам билан ўтказаман. Болалик чоғимда доимо футболга боғлиқ буюмларни, футболка, тўп, бутсалар олиб беришларини сўрардим. Ота-онам мени хурсанд кўришни ёқтиришарди. Лиганинг расмий тўпини совға қилишгани ҳанузгача ёдимда. Мен ОАВдан кўра, ўзимга яқин кишилар билан гаплашишни ёқтираман. Барселонага кўникиш мен учун жуда қийин кечган. 13 ёшимда ҳаммаси олисда қолганди - ватаним, ўртоқларим... Нотаниш ўлкада ҳеч кимни танимасдим, улар ҳам мени билишмасди. Бунинг устига, жуда тортинчоқ эдим. Ўша пайт фақат ўз олдимга қўйган мақсадга эришиш ҳақида ўйладим. Ҳозир ўзимни яхши ҳис этяпман. Сабрсиз, ғалабага чанқоқ йигитман, мавсумда барча совринлар учун курашишга шайман. Шахсий ҳаётим бошқаларникидан фарқ қилмайди. Баъзан зерикарли дамлар ҳам бўлиб туради. Уйғонгач, нонуштадан сўнг болаларни мактабга олиб бораман, машғулотга бориб, уйга қайтаман. 10 йилдан бери Кастельдефельсда яшаяпмиз, бу ердаги ҳамма нарса таниш, албатта.

Бартомеуга қилинган ҳазил ҳақида

- Бартомеунинг Нобитуга ўхшашлиги борасида ҳеч қачон ҳазил қилган эмасман, аммо шунақа ҳазилкашлар йўқ эмас.

Марадона ҳақида

- Мени Марадонадек дафн этишларини хоҳлайманми? Умуман, ўлим ҳақида ўйлаганманми? Йўқ-йўқ, бу фикр хаёлимга ҳам келган эмас, бу мавзуда мулоҳаза юритишни истамайман. Марадонанинг вафоти ҳақида отам хабар юборди, кейин ТВдан янгиликларни кузатиб бордим. Аввалига ҳеч ким, жумладан, мен ҳам бунга ишонмадим. Диего ўлимидан кейин 4 кун ўтгач, «Осасуна» дарвозасига гол ура олишимга аминмидим? Ҳа, «қуруқ» серия чўзилиб кетган бўлсада, ўша оқшом гол уришимни сезгандим. Охир-оқибат, йўқ жойдан гол юзага келди.

Шармандали мақлубият ва COVID оқибатлари ҳақида

- 2:8? Бу барчамиз учун ўта оғир зарба бўлди... Ўйиннинг қандай ўтгани ҳам, шармандали мағлубият ҳам... Ҳамма мағлуб бўлиши мумкин. Мен ҳам кўп мағлубиятларга дуч келганман. Бироқ бу галгиси... Учрашувдан кейин руҳшунос қабулида бўлишим керак эди. Аммо мен бормадим. Ҳамма боришимни тавсия этди. Унинг кўмагига муҳтожлигимни ўзим ҳам билардим, бироқ ҳеч қачон унга мурожаат қилмаганман. Бўм-бўш стадионда ўйнаш - даҳшат. Авваллари лиқ тўла «Камп Ноу»га келиш рақибларимиз учун даҳшат эди. Ҳозир ҳамма бир хил шароитда. Трибуналарда ҳеч ким йўқ... Шафқатсиз тақвим? Ҳеч ким футболчиларни ўйламайди. У ерда натижадан кўра иқтисодий манфаат муҳимроқ. Мен дунёдаги энг яхши футболчи бўлиш учун ўйнамайман, зафарларга эришиш ва ҳаммасини жамоага бериш учун ўйнайман.

Гвардиола, Куман ва бўлажак сайловлар ҳақида

- Охирги мулоқотим қанча вақт давом этганидан бехабарман. Лекин Гвардиола билан гаплашиб тураман. Биз навбатдаги ҳамкорлик хусусида мулоқот қилмадик. Мен учун Пеп - энг зўр мураббий, унда қандайдир ўзига хослик мужассам. У ва Луис Энрикедан жуда кўп нарсаларни ўргандим. Куман сифатли ишларни амалга оширмоқда. У туфайли савиямиз кўтарилмоқда. Агар Хави келса, «Барса»да қоламанми? Билмадим, аввал июнда қандай воқеалар юз беришини кўрайлик-чи. Тускетс мени сотиб юборишини айтганмиди? Ўтиб кетган ишларни гапиришдан маъно йўқ. Қайсидир номзодни қўллаш ниятидан йироқман. Мен бизни зафарлар йўлига, айнан биз бўлишимиз лозим бўлган йўлга қайтара оладиган киши келишини хоҳлайман.

А.АБДУВАЛИХЎЖАЕВ тайёрлади