Ўз олдига доим юқори мақсадларни қўядиган Тошкентнинг «Локомотив» футбол клуби португалиялик мураббий билан келишувга эришди.

Шу пайтгача Португалиянинг «Брага» клубида ёрдамчи мураббий сифатида ишлаб келган Микаэл Секейра «темирйўлчилар» билан 2 йиллик битимга имзо чекди. 2011 йил УЕФА Про лисензиясини қўлга киритган мутахассис ушбу мавсумдан «Локомотив» ПФК бош мураббийи сифатида фаолият олиб боради.

Маълумот учун, 47 ёшли мураббий 2006-2008 йилги мавсумларда «Брага» клубининг ёшлар жамоасини бош мураббий сифатида бошқарган. Шунингдек, 2010/2011 йилги мавсумда клуб  бош менежери бўлиб фаолият юритган.

Микаэл Секейра учун Осиё бегона эмас. Чунки португалиялик мураббий 2018-2019 йилги мавсумда Саудия Арабистонининг «Ал Насср» клубида U-21 жамоаси бош мураббийи бўлиш билан бирга асосий таркибда Руи Виториага ёрдамчи мураббий сифатида иш олиб борган.

Мураббий эришган ютуқлар ҳақида шуни айтиш мумкин, Микаэл Секейра «Брага» бош менежери бўлиб ишлаган йил жамоа Европа Лигаси финалида ўйнаган. Осиёдаги фаолиятида эса «Ал Насср» билан Саудия Арабистони чемпионлигини қўлга киритган, қолаверса U-21 жамоаси билан ҳам мамлакат биринчилигида зафар қучган.

«Локомотив» ПФК Микаэл Секейрага «темирйўлчилар» оиласига хуш келибсиз деб қолади ва мураббийнинг Ўзбекистондаги фаолиятига омад тилайди.