«Пари Сен-Жермен» клубининг янги устози Маурисио Почеттино парижликлар бошқарувини қўлга олганидан сўнг, PSG TV вакилларига интервью берди. Таъкидлаш жоизки, аргентиналик мутахассис футболчилик даврида (амплуаси ҳимоячи бўлган) «ПСЖ» таркибида 2001-2003 йилларда тўп суриб, 70та ўйинда майдонга тушгани ҳолда, 4 голга муаллифлик қилганди. Телеканал журналистлари суҳбат давомида ушбу факт-га ҳам тўхталиб ўтишди. Почеттино жумладан, парижлик мухлислар ҳақида фикр билдириб, кейинги бир неча ой учун белгилаган режаларига ҳам тўхталиб ўтди. Қуйида мазкур интервью билан танишишингиз мумкин.

- Маурисио, «ПСЖ»нинг янги устози сифатида нималарни ҳис қиляпсиз?

- Ушбу жамоада эканлигимдан жудаям бахтлиман. Менимча, бу ажойиб имконият ва лойиҳа. «ПСЖ»га буни амалга ошириш учун келганлигим эса шунчаки фантастикадир.

- «ПСЖ»га мураббий сифатида қайтганингиздан кейинги илк таассуротлар қандай?

- Клуб билан ҳамкорликни яна тиклаш мақсадида Парижга ташриф буюрганимдан мамнунман. «ПСЖ» таркибида ўйнаганимдан сўнг, ушбу жамоа иштирокидаги ўйинларни доимо кузатиб келганман, маҳаллий мухлислар билан доимо илиқ муносабатда бўлганман. «Пари Сен-Жермен» жаҳоннинг гранд клубларидан бири ҳисобланади. Афсуски, жамоанинг совринлари сони шунга яраша эмас. Албатта, ғалаба ҳам зарур, лекин буни чиройли ўйин намойиш этиш орқали амалга ошириш лозим. «ПСЖ» таркибидан жаҳоннинг энг яхши футболчилари жой олишган, айнан улар ўйин пайти ҳал қилувчи аҳамият касб этишади. Бироқ ушбу ўйинчилар майдондаги ишларини меҳр билан, сидқидилдан бажаришлари жуда муҳимдир.

- Ўзингизни қандай мураббий деб ҳисоблайсиз?

- Шогирдларим учун яқин устоз бўлишни хоҳлайман. Улардан кўп нарса кутяпман, менга футболчилар ва барча ходимлар билан дўстлашиш ёқади. Клуб, стадион, умуман, мазкур йирик лойиҳанинг муҳим қисми бўлишни истайман.

- Жамоанинг ҳозирги таркиби борасида нима дея оласиз?

- Мазкур клубда доимо мукаммалликка интилиш бўлган. Футболчилар «ПСЖ» футболкасини кийишга лойиқликларини исботлашлари лозим. Менимча, бу фантастик таркиб ва биз клуб ҳамда мухлислар истаётган нарсага эришишимиз, яъни совринларни қўлга киритиш учун ҳаракат қилишимиз керак.

- Мақсадларингиз қандай?

- Асосий ниятимиз - барчанинг бир йўналишда ҳаракат қилаётганига ишонч ҳосил қилиш. Ҳамма ушбу лойиҳада иштирок этиши учун менталитет ва фалсафани қайта кўриб чиқишимиз зарур. Ғоя шундан иборат бўладики, ҳар бир шахс бошқалардан кўра клуб муваффақияти учун кўпроқ жон куйдириши шарт.

- «ПСЖ» мухлислари учун нима дея оласиз?

- Ушбу жамоада тўп сурган пайтларим, «Парк де Пренс» стадионида, мухлислар қаршисида ўтказилган ўйинлардан илиқ хотиралар қолган. Мазкур аренада яна ишқибозлар билан учрашишни, уларни ғалабалар билан қутлашни интиқлик билан кутяпман.

P.S. «ПСЖ» қаторасига 8-марта Франция Суперкубогини қўлга киритди...Франция Суперкубоги учун баҳсда Лига 1 нинг амалдаги чемпиони ва мамлакат кубоги соҳиби «ПСЖ» ҳамда ўтган мавсумда 2- ўринни қўлга киритган «Марсель» баҳс юритишди. 

Почеттино эса «ПСЖ»даги 3-ўйинидаёқ кубок ютишга эришди.

Франция Суперкубоги
ПСЖ — Марсель 2:1
13 январь, «Боллар-Делелис» (Ланс)
Голлар: Икарди (39), Неймар (85, пенальти) — Пайет (89).