Ўтган мавсум «Шеффилд» Англия футболида сенсация яратганди. «Норвич» қуйига шўнғиётган, «Астон Вилла» «жон» сақлаш учун курашаётган бир паллада Крис Уайлдер бошчилигидаги жамоа ҳатто Чемпионлар Лигасига чиқиш имкониятига ҳам эга бўлганди. Карантиндан кейин «шамширлар»нинг натижалари салбий тус ола бошлади - ҳатто Европа Лигасига чиқишни ҳам уддалай олмадилар. Аммо 9-ўрин қониқарли кўрсаткич сифатида қабул қилинди.
Ёзда ҳам «Шеффилд»нинг ўйинида хавотирли жиҳатлар кўзга ташланган, аммо бу ҳолатни кондицияларнинг умумий пасайиши ҳамда асосий ҳимоячи Жек О~Коннеллнинг жароҳати билан изоҳлаш мумкин эди. Ўша даврда ҳам «шамширлар» чиройли ўйинлар кўрсатишди - «Челси» ҳамда «Тоттенхэм» устидан қозонилган ғалабалар шулар жумласидан. Ўшанда Уайлдернинг инновацион тактикалари эвазига жамоа янада ёрқинроқ иштирок этиши кутилганди, аммо...
Янги мавсум мутлақо қониқарсиз бошланди. 17та ўйин ўтказган «Шеффилд» атиги 2 очко билан жадвалнинг сўнгги поғонасига жойлашган. Жамоанинг ҳозирги ўйинидан келиб чиқилса, яқин орада вазиятнинг яхшиланишига умид кам.
Янги дарвозабон қутқара олмаяпти
«Шеффилд»нинг ўтган йили мудофаа чизиғида ажойиб натижаларга эришишида «МЮ»дан ижарага олинган дарвозабон Дин Хендерсон катта роль ўйнаган, мавсум якунларига кўра, энг яхши киперлар сафидан жой олганди. Гарчи «шамширлар» ҳимоячилари кўп вазиятларда рақиб жамоа ҳужумларини ўтказиб юборишсада, Хендерсон уларнинг жонига оро кирар, пенальтиларни қайтариб, қойилмақом севйларни амалга оширарди.
Мавсумлар оралиғида Дин «МЮ»га қайтди, Уайлдер эса унинг ўрнига «Борнмут»дан Аарон Рамсдэйлни олиб келди. Ўтган мавсум дурустроқ ўйин кўрсатган кипернинг «Шеффилд»да ишлари юришмаяпти. Кўплаб хатоларга йўл қўймоқда - хусусан, «Челси» билан ўйиндаги ҳаракатларини асло оқлаб бўлмайди. Дарлоу, Жонстон ва Поуп сингари киперлар бор кучлари билан жамоаларини қийин вазиятдан олиб чиқаётган паллада «Шеффилд» посбони шунчаки номинал дарвозабон вазифасини бажариш билан чекланмоқда. Унинг зарбаларни бартараф этиш фоизи лигада энг ўрта кўрсаткичлардан бири бўлиб турибди. Кўринишидан чиройли ҳаракатлар очиқ-ойдин хатолар билан уйғунлашмоқда - «Брайтон»га қарши баҳсда Рамсдэйл жамоасини бир неча марта муқаррар голдан сақлаб қолди, аммо тўпга чиқишда жуда ёмон ўйнади.
Бундан кўринадики, ҳимояда муаммоси бор Англия жамоалари («Шеффилд» ўтган мавсум ҳам бу борада ўта мукаммал эмасди)га савияси юқори дарвозабон керак экан. Мавсум-2019|2020да «Ньюкасл»да Мартин Дубравка қандай ўйнагани, «Вест Бромвич»даги Сэм Жонстоннинг ҳозир намойиш этаётган ўйинларига бир қаранг. Бундай посбонлар якка ўзи жамоани қутқариб қолиши мумкин, бироқ Хендерсон билан солиштирганда, Рамсдэйлнинг ҳозирги ўйини ўртача даражада бўлмоқда. Демак, «шамширлар» асосий дарвозабонга ўринбосар топишда янглиш қарор чиқаришган.
Ўтган йилги тактика энди иш бермаяпти
Хендерсоннинг йўқотилиши ва янги кипернинг келиши - «Шеффилд» муаммоларининг бир қисми, холос. Мавсумнинг дастлабки қисмидаги кескин кўтарилиш нафақат ижарага олинган дарвозабоннинг ишончли ҳаракатлари, балки мураббий танлаган ўзига хос тактиканинг ҳам маҳсулидир. Зеро, АПЛнинг аксарият жамоалари бу услубга қарши чора топишга қийналишди. Уайлдер ва «Шеффилд»нинг энг катта ютуғи - 5-3-2 схемасини танлагани бўлди. Унга кўра, қанот ҳимоячилари ҳужумларга қўшилиб, рақибни мураккаб аҳволга солиб қўйишарди.
«Шеффилд» ақлли ўйин кўрсатар, танланган тактика эвазига таркибдаги футболчилардан максимум кучни талаб қиларди. Ваҳоланки, «асосий»дагиларнинг аксарияти Премьер-лигада тўп суриш тажрибасига эга эмасдилар (ҳатто Ландстрем ҳам «Шеффилд» билан бирга тўртта дивизионни босиб ўтганди), шу боис, «шамширлар»нинг ўтган мавсумдаги иштирокларини катта кўрсаткич сифатида баҳолаш мумкин.
Мавсум-2019|2020да фақат «Бёрнли»даги Шон Дайч бошланғич таркибга камроқ ўзгаришлар киритганди - «Шеффилд»да барқарор, бир-бирини тушунадиган футболчилардан иборат таркиб шаклланганди. Мудофаа чизиғидаги Балдок-Бэшэм-Иган-О~Коннелл-Стивенс бешлигининг майдонга туширилишини эса Англия футболига бефарқ бўлмаганлар ёддан билишарди. Айнан шу ҳимоячилардаги бирдамликка айрим топ-жамоалар ҳам ҳавас қилишгандир, балки.
Бироқ Жек О~Коннеллнинг жароҳатидан кейин ушбу механизмда нуқсонлар кўзга ташланди. Ўтган мавсум ушбу футболчи ёзги 5та ўйинни ўтказиб юборди - уларда «Шеффилд» атиги 4 очко жамғарди. Янги кампанияда Бэшэм-Иган-О~Коннелл учлиги биргаликда 83 дақиқа тўп суришди, «Астон Вилла» билан ўйиндан (2-тур) кейин эса О~Коннелл тиззасидаги жароҳати сабабли операция столига ётди ва мавсум охиригача сафдан чиқди. Крис Уайлдер ушбу йўқотишни «Ливерпул»нинг Виржил ван Дейкни йўқотишига қиёслади.
Дастлаб О~Коннеллнинг ўрнини Жек Робинсон эгаллади. Ушбу футболчилар ўртасидаги фарқ яққол кўзга ташланди - О~Коннелл ҳужумларга фаол қўшилар, майдоннинг чап қисмидаги тартибга жавобгар эди. Бундан ташқари Жек ҳимоядаги «тозалов»ни ҳам қойиллатарди - уни АПЛнинг ўтган мавсумида энг яхши марказий ҳимоячилардан бири сифатида эътироф этишгани ҳам бежиз эмас. Энди О~Коннелл таркибда эмас, «Шеффилд» эса янги шароитга мослашишга қийналмоқда. Кадрлар муаммоси сабаб «шамширлар» жуда кўп ўйинларда очко йўқотишди.
Жамоанинг ҳимоявий ҳаракатларидаги шиддат бўйича ҳам саволлар бор. Уайлдер ҳеч қачон юқори прессингга амал қилмаган, «Шеффилд» рақибларига ўз жарима майдончасига яқинлашишларига имкон яратиб беради. Ваҳоланки, «шамширлар» олдинроқда рақибга босим уюштиришганда, улар яратган хавфли вазиятлар сони ҳам ортганди. Шунга қарамай, «Шеффилд» ўзига келишга қийналмоқда, мавсум стартида савияси нисбатан ўзиникига тенг бўлган рақиблар билан ўйинларда ҳам очколар йўқотди.
Ҳужумда ҳам омадсиз
«Шеффилд»га тааллуқли яна бир муаммо - имкониятлардан фойдалана олмаслик. Умуман олганда, бундай бўлиши олдиндан тахмин қилинган, ўтган мавсум Макберни ва Макголдрик биргаликда жуда кўп қулай вазиятларни кўкка совуришганди. Шундай паллада ҳимоячилар ёрдамга келишган, айниқса, Флек ва Ландстрем бу борада анча фаоллик кўрсатишганди. Жамоа ихтиёрида техникаси юқори Лис Муссе ҳам бор эди, бироқ у мавсум бошида жароҳат олиб, сафга яқиндагина қайтди. Макголдрик ва Макберни тўпурар ҳужумчилар ролини яхши бажара олишмаяпти. Шунингдек, Билли Шарп ҳам бор, аммо «Шеффилд»нинг афсонаси ва рамзига айланган ушбу футболчининг ёши ўтиб қолди, тўлиқ куч билан ўйнашга қодир эмас.
Мавсумлар оралиғида «шамширлар» «Ливерпул»дан 23,5 млн. евро эвазига Райан Брюстерни сотиб олишди. Аммо ҳозирча ушбу харажат ўзини оқламаяпти. Ҳужумларни якунлаш бўйича аввалги жамоаларида мақтовга лойиқ натижаларга эришган Брюстерни асосий таркибдан Оливер Берк сиқиб чиқарди. Айнан Берк рақиб ярим майдонида прессинг ишлатишда фаол («МЮ» билан ўйинда айнан шу футболчининг босими натижаси ўлароқ Макголдрик гол урганди).
Шундай экан, жамоа тўпурар форвардга эҳтиёж сезмоқда. Ярим ҳимоячиларда ҳам мўлжал «қочган» - дейлик, Ландстрем ҳозирча рақиб дарвозасини ишғол қилмади («Астон Вилла» билан ўйинда пенальтидан фойдалана олмаганди). Демак, айни пайт Макголдрик 2та гол билан жамоанинг энг яхши тўпурари бўлиб турибди. Умуман, форвард излаш ҳар қандай клуб учун мураккаб вазифа саналади, бироқ «Шеффилд» мавсумлар оралиғида ҳам ушбу муаммони ҳал қилишга унчалик жиддий қарамади.
Алоҳида таъкидлаш ўринлики, «шамширлар» таркибидаги беқарорлик фақат мудофаа чизиғи билан чекланмайди - Уайлдер янги мавсумда марказий ярим ҳимояда ҳам камчиликларга дуч келмоқда. Ўтган кампанияда Ландстрем-Флек-Норвуд учлиги яхши ҳаракат қилган бўлса, ҳозир бу позицияни оптималлаштириш устида ҳам бош қотирмоқда. Бунинг учун жамоага янги қўшилганлар - Осборн ва Ампадунинг хизматларидан фойдаланмоқда. Мавжуд муаммо ҳам «Шеффилд»нинг омадсиз иштирокига сабабдир.
Ниҳоят, сўнгги жиҳатга тўхталсак. Крис Уайлдернинг айтишича, стадионларда мухлисларнинг йўқлиги ҳам футболчиларнинг руҳий ҳолатига салбий таъсир кўрсатмоқда: «Фрэнк Лэмпард «Лидс» билан ўйинда жамоаси гол урганидан сўнг ишқибозлар томон югурганда, унга ҳавас қилдим. Трибуналарда 2000 нафар томошабин бўлса ҳам, уларнинг қўллаб-қувватлашини, мададини сезиб турасиз». Июнда ҳам «Шеффилд» устози мухлислар йўқлиги ҳақида қуйидагича фикр билдирганди: «Жамоага жаҳоннинг энг яхши мураббийини бош қилиб қўйишингиз мумкин, бироқ ғолиблик менталитети жамоанинг ичидан келиб чиқиши лозим. Бунда ҳис-ҳаяжонлар билан футболчиларга қувват бағишлайдиган ишқибозларнинг ҳам алоҳида ўрни бор. Ҳозир бизга айнан шу нарсалар етишмаяпти».
Хендерсонга муносиб ўринбосар топилмагани, кадрлар муаммоси, рақибларнинг «Шеффилд» тактикасига мослашгани ва вазиятлардан фойдалана олмаслик «шамширлар»ни турнир жадвалининг энг қуйи поғонасига тушириб юборди. Албатта, шундай мафтункор ва етарли шароитга эга клубнинг инқирозга юз тутгани ачинарли, бироқ Уайлдерга ишонч сўнмаган. Ҳозирча «Шеффилд»нинг ҳолати мураккаб, аммо яқин орада яхшиланиши мумкин - «шамширлар» ўзларининг жанговар характерга эга жамоа эканликларини аллақачон исботлаб улгуришган. Лекин жарликдан чиқиб кетиш учун вақт етармикан, ҳамма гап шунда.
Ў.УМАРОВ тайёрлади
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20