Хабарингиз бор, кечадан Фарғонада “Хоким кубоги-2021” мусобақаси старт олди. Бугун Тошкентнинг “Бунёдкор” клуби турнирдаги дастлабки ўйинини “Навбаҳор-Фарм”га қарши ўтказади. Биз мусобақа олдидан "қаодирғочлар" сардори Лутфулла Тўраевнинг фикрлари билан қизиқдик.

- Бу каби турнирда биринчи марта қатнашяпман. Шахсан менга «Ҳоким Кубоги» мусобақаси қизиқ кўриняпти. Кеча машғулотдан олдин мураббийимиз Марат Валентинович бир яхши гапни айтди. Қандай турнирга келишингдан ва рақибинг ким бўлишидан қатъий назар, ижобий натижа билан ортга қайтиш керак. Мусобақага узоқ масофадан йўл босиб келиб, шунчаки қайтиб кетиш керак эмас. Шунинг учун биз ҳам Фарғонага шунчаки келмадик. Мусобақада қатнашиб, кубок билан ортга қайтишни мақсад қилганмиз ва албатта бунинг учун бор имкониятимизни ишга соламиз, меҳнат қиламиз. Футболчиларнинг кайфияти аъло даражада. Машғулотларни бошлаганимизга уч ҳафта бўлди. Бир-биримизни тўлиқ тушуниб олишимиз ва кучли жамоага айланишимиз учун бу муддат кифоя деб ўйлайман. Профессионал футболчига рақибнинг аҳамияти бўлмаслиги керак. Бу ҳаммага тегишли гап, шу қаторда бизга ҳам.  Насиб, ҳаммаси яхши бўлади ва ўйлаган ниятимизга етамиз, - деди футболчи.