«Олимпик»... Кўпчилигимиз бу клубнинг Про-лигада қатнашишини эшитгач, ҳайрон қолганимиз бор гап. Бу қаернинг жамоаси? Бизда шунақаси борми? Кўп ўтмай барчасига ойдинлик киритилди. Бу Ўзбекистон U-20 термасига номзод футболчилардан ташкил топган ва шу ёшдаги жамоа бош мураббийи Темур Кападзе бошқарувидаги клуб экан. Мазкур жамоа ҳақида кенгроқ маълумот олиш мақсадида Кападзе билан боғландик. Қуйида ушбу мутахассиснинг фикрларини эътиборингизга ҳавола қиламиз.
- Темур ака, «Олимпик»ни ташил қилишдан кўзланган мақсад ва бу борада ташаббус кимдан чиққанлиги ҳақида батафсил маълумот берсангиз.
- Ташаббус Ўзбекистон Миллий Олимпия қўмитасидан чиқди ва улар менинг бошқарувимдаги U-20 термасига номзод футболчиларнинг келаси Олимпиадага муносиб тайёгарлик кўришини таъминлаш мақсадида шу лойиҳага қўл уришди. Бунинг фойдали тарафлари кўп, албатта. Чунки терма жамоага номзод аксарият футболчилар энди мунтазам кўз ўнгимизда бўлишади. Биз термага номзод ва ўз клубида ўйнаш имконияти камроқ бўлган футболчиларни «Олимпик»ка чақирдик. Негаки, Суперлига жамоаларидаги термага номзод футболчилар учун агар асосий таркибга кириш имконияти бўлса, ўз клубида қолгани маъқул. Бизнинг мақсадимиз - футболчининг ўсиши учун шароит қаерда яхши бўлса, ўша ерда ўйнатиш. Шунинг учун «Олимпик» таркиби ўз клубларида кам имкониятга эга бўлаётган, ўринбосарлар сафида ўйнаётган ва захирада қолиб кетаётган футболчилардан ташкил топди. Албатта, улар учун бу ажойиб имконият. Агар мана шу футболчилар вақти келиб ўз клубига қайтиш истагини билдирса ёки клублари футболчини қайтаришни сўрашса, биз уни қаршиликсиз қўйиб юборамиз. Ўрнига яна янги номзодлар жалб этилаверади. Юқорида айтганимдек, биз учун футболчи қаерда ўсиш имкониятига эга бўлса, ўша ерда ўйнаши муҳим. Ҳозирда «Олимпик» таркибида Про-лига ва Биринчи лига клубларидан ижарага олинган ва ҳаттоки, айни дамда жамоаси йўқ ёки шартномаси тугаган футболчилар бор.
- «Олимпик»ка футболчи жалб қилишда Суперлига клублари билан қандай иш олиб борилди?
- Мен U-20 терма жамоасига номзод, Суперлига клубларига тегишли футболчиларга 10 февралга қадар тегмай туришни лозим топдим. Сабаби, улар январдан бошлаб ўз клублари йиғинларида қатнашишди. Шундан кейингина клублар мураббийлари билан алоқага чиқиб, футболчининг қаерда ўйнаши, асосий таркибдами ёки ўринбосарлар сафидами, шу каби саволларга жавоб олдим. Айни пайт термага номзод 15-16 нафар футболчи Суперлига жамоаларига тегишли. Уларнинг аксарияти ўз клубларида асосий таркиб аъзолари ҳисобланишади. Шунинг учун бу футболчилар ўз клубларида қолиб, тажрибали футболчилар билан биргаликда шуғулланганлари маъқул. Менинг вазифам эса, юқорида таъкидлаганимдек, камроқ имкониятга эга бўлаётган ёшларнинг ўсиши учун қулай шароит яратиб бериш ва уларни ҳам яхши даражага олиб чиқиш.
- Умуман олганда, бу яхши лойиҳа учун Про-лига ҳам ажойиб танлов...
- Албатта, янги мавсумдан Про-лигада ўйнаймиз. Назаримда, ушбу дивизион савияси ҳам Суперлига даражасидан у қадар паст эмас, элита ҳавосидан баҳраманд бўлган гранд жамоалар бор. Ўйлашимча, бундай рақибларга қарши ўйнаш футболчиларнинг ўсишига олиб келади. Ахир ўринбосарлар сафида юргандан шу яхши-ку. Боз устига, клубларимиз «дублёр» жамоаларини ёшартиришга катта урғу қаратишмоқда. Улар ҳозир 2003-2004 йилда туғилган футболчиларга кўпроқ эътибор қаратишган. Мендаги жамоада эса асосан 2001-2002 йилда туғилган футболчилар жамланган. Олдимизга эса Суперлигага чиқиш вазифаси қўйилган. Шунга яраша шароит ва имкониятлар ҳам ўз ўрнида. Айтайлик, футболчилар учун витаминизация бўладими, фармакология, минераллар ёки озиқ-овқат масаласи, буларнинг бари билан етарли даражада таъминлаш ва футболчиларни кучайтириш, профессионал даражага олиб чиқиш кўзда тутилган. Бу терма жамоа мураббийи сифатида мен учун қувонарли, албатта. Сабаби, кучли ижрочилар қанча кўпайса, рақобат ҳам шунча кучаяди. Терма жамоада ҳар бир чизиқда камида икки нафардан тенг кучли футболчиларга эга бўлолсак, бу бизнинг ютуғимиз бўлади.
- Тушунишимча, «Олимпик»даги селекция ишлари йил мобайнида давом этади ва маъ-қул келган футболчилар таркибга жалб этиб бораверилади, шундайми?
- Биласизми, «Олимпик» бу алоҳида жамоа. Бундан ташқари, имкон қадар ФИФА кунлари U-20 терма жамоаси учун йиғин ташкил қилиб, Суперлигада тўп сураётган футболчиларни ҳам чақираман. Жамоада селекционер мураббийимиз бор. Қолаверса, иқтидорларни излашда ўзим ҳам қараб турмайман. Биз нафақат клубга, балки терма жамоага ҳам ёш ижрочиларни излаш жараёнини тўхтатмаймиз. Албатта, имконият берилиши керак бўлган футболчилар топилса, уларни жамоага таклиф қиламиз, ўсишлари учун ёрдамни аямаймиз. Бизнинг режамиз футболчиларга амалий ва назарий дарс-ларни мукаммал даражада ўтиш ва уларнинг имкониятларини оширишдан иборат. Бу футболчилар назоратимиз остида ҳам тактик, ҳам жисмонан ўсишга эришиши кўзда тутилган. Бир нарсани унутмаслигимиз керак, Олимпиада ўз йўлига, келажакда ушбу футболчилар миллий терма аъзосига айланишлари мумкин.
- Демак, клубдаги фаолиятингиздан ташқари, ўз клубларида ўйнаётган ва термага номзод футболчилар учун ҳам йиғинлар ташкил қиласиз?
- Албатта.«Олимпик»алоҳида клуб, терма жамоа эса алоҳида бўляпти. Терма йиғинига ўз клубларида ўйнаётган футболчилар ҳам чақирилади. Уларга эса «Олимпик»даги муносиб номзодлар қўшилади. Кўриб чиқамиз, эҳтимол қандайдир турнирларда иштирок этармиз. Янги футболчилар жалб этилади. Хуллас, иш аввалгидек кетаверади. Муҳими, термага номзод футболчиларнинг барчаси кузатувда бўлади. Балки кимгадир бу лойиҳа кераги йўқдек туюлиши мумкин, агар клубларимиз ўринбосарларига яратилаётган шароит талаб даражасида бўлганида эди, бу фикрга қўшилсак бўларди. Аммо афсуски, ундай эмас. Биз мазкур клубни ташкил қилиш орқали эътибордан четда қолиб кетаётган ёшларни кенг кўламда бўлмаса ҳам, терма жамоага номзодларни муносиб тарбиялаш ва керакли даражага олиб чиқишга ҳаракат қиламиз.
- «Олимпик»нинг Про-лигадаги натижалари турнир жадвалига таъсир ўтказадими ёки жамоа шунчаки иштирок этадими?
- «Олимпик» расман клуб сифатида иш бошлади. Жамоа регламентга бўйсунган ҳолда фаолият юритади. Шартномаси йўқ футболчилар билан битим тузилади. Ўз клуби билан келишувга эга ўйинчилар ижарага олинади ва уларга ойлик маош белгиланади. Тўғри, эҳтимол катта нархлар белгиланмас, лекин имкон қадар Про-лига ўртамиёналаридагидек бўлишига ҳаракат қиламиз. Про-лигада жамоанинг натижалари ва очколари ҳисобга олинади ва ҳаттоки, юқорида таъкидлаганимдек, клуб олдига Суперлигага чиқиш вазифаси қўйилган. Режага кўра, уй ўйинларимизни «ЖАР» стадионида ўтказамиз. Биласиз, бу аренада шароитлар анча яхши.
- Демак, вақти келиб жамоа футболчиларни трансфер қилиши ҳам мумкин экан-да?
- Агар қайсидир футболчи бош-қа клубга ҳақиқатан керак бўлса, унинг ўша ерда ўсишга эришишига кўзимиз етса, албатта қўйиб юборамиз.
- Сўнгги йилларда турли ёш тоифасидаги термаларимиз халқаро турнирларда кўзланган натижани қўлга кирита олишмаяпти...
- Бунинг турлича сабаблари бўлиши мумкин. Масалан, футболчи машғулотга келиб, 1-1,5 соат шуғулланиб кетгани билан нимагадир эришиш қийин. Чунки унинг индивидуал маҳоратини ўстириш керак, тактик тарафлама тўғри йўналиш кўрсатиш лозим, бунинг учун мураббийда етарли вақт ёки имкон бўлмаётгандир. Бундан таш-қари, витаминизация ёки озиқ-овқат масаласини назоратга олиш ва бир маромга солиш ўсадиган бола учун ниҳоятда муҳим саналади. Эҳтимол, мана шу жараёнда камчилик бордир. Хуллас, бу кўплаб факторларга боғлиқ масала.
- Бу лойиҳага ишонмаганлар ҳам бўлдими?
- Бўлди, албатта. Баъзилар бу каби лойиҳа Европа давлатлари ва Японияда синаб кўрилгани, аммо натижа бермаганини айтишди. Лекин биз ўша давлатлардан фарқли ўлароқ, ўз клубларида ўйин амалиётисиз қолиб кетаётган футболчиларга эътибор қаратяпмиз. Лойиҳа фойда келтиришига ишонаман. Чунки бундай шароитда футболчиларни яхшироқ тайёрлай оламиз.
- «Олимпик»даги машғулотлар давомида футболчилар ўз клубларида кузатмаган жараёнларга дуч келишлари мумкинми?
- Ўйлайманки, машғулот жараёнида қўлланиладиган турли иш услублари, таҳлиллар Суперлига жамоаларида бор. Бироқ ўринбосарлар таркибида шуғулланаётган футболчиларда озиқ-ов-қат, сифатли майдон, машғулотлар вақти, таҳлилий видеоёзувлар борасида имкониятлар катта эмас. Бундан ташқари, уларда назарий дарслар ўтилмайди, анализ кам. Биз эса машғулотларни ҳам видеотасвирга оляпмиз. Буни, албатта, назарий дарс-ларимизда футболчиларга кўрсатиб, йўл қўйилган хато ва камчиликларни таҳлил қиламиз. Уларга шундай вазиятларда қандай йўл тутиш кераклигини ўргатамиз. Ана шундагина футболчи техник-тактик томонлама ўсади. Бу жараён нафақат машғулотларда, балки ҳар бир ўйиндан кейин ҳам амалга оширилади.
- Мураббий сифатида қандай қўлланмалардан фойдаланяпсиз, кимларнинг иш услубини кузатяпсиз?
- Айни дамда тажрибам ва билимимга таянган ҳолда машғулотлар ўтказяпман. Аслида ҳорижнинг яхши жамоаларида малака ошириб келиш режамда бор эди, аммо пандемия сабабли бунинг имкони бўлмай турибди.
Х.ЮСУПОВ суҳбатлашди
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20