Бироз аввал хабар берганимиздек, бугун «Локомотив» матбуот анжуманлар залида 2021 йилги мавсум арафасида таркибга келиб қўшилган футболчиларни таништирув маросими бўлиб ўтди.

Тадбирда «Локомотив» ПФК спорт директори Равшан Муқимов ҳамда бош мураббийи Микаэл Секейра ҳам иштирок этди.

Шунингдек тадбир давомида клуб бош мураббийи мавсум олди фикрлари билан ўртоқлашди.

- Икки ой давомида мавсумга биргаликда тайёрланяпмиз. Футболчилар ўзгаришларни тўғри қабул қилишди. Ўзгаришлар сабабли улар ўзларини яхши ҳис қилишмоқда.

Машғулотларда яхши ҳаракат қилишмоқда. Бу эса аста-секинлик билан самарасини беради. Бунинг учун аввало футболчилар барчасини тушуниб етишмоқда.

Ҳар бир мураббийнинг мақсад ва ғоялари бўлади. Масалан, сиз уй қураётганингизда аввало асосни қуйиб олишингиз керак бўлади. Кейинчалик бу босқичма-босқич уйга ўхшатиб, қуриб борилади.

Агар қурилиш учун кетказаётган материаллар яхши бўлса, уй ҳам мустахкам чиқади. Бизда юқори савияли футболчилар кўп. Ишонаманки, биз бу таркиб билан яхши натижалар қайд эта оламиз, - деди мутахассис.