У вақтида Руи Рамос, Хидетоши Наката, Дуайт Йорк, Томас Скухрави, Патрик М`Бома ва Парк Жи Сун каби юлдузлар билан жамоадош эди. Буюклик даражасига кўтарилган бу футболчилар ҳозир нафақадалар. Казуёши Миура эса 26 февраль куни 54 ёшини қаршилаганига қарамай, ҳамон майдонда. Қаранг, жаҳон футболи рекордчиси 2021 йилги мавсум олдидан «J»-лигада яна «Йокогама» учун ўйнаш ниятида. Асосий факт битта - 5та ўн йилликни уриб қўйган дунёнинг амалдаги энг ёши катта профессионал футболчиси айнан Миурадир. У Бразилияга бориб, «Сантос» билан дастлабки профессионал шартномани расмийлаштирган пайт Япония ЖЧ мезбонлик ҳуқуқини олишга бел боғлаган номзод эди, Майкл Жордан эса МБАда 2-мавсумини бошлаганди. Миуранинг рекордларию, натижалари бир дунё, улар Гиннес рекордлар китобининг бутун бир нашрига етиб ортади. FIFA.com сайти янги мавсум арафасида «Қирол Казу»ни туғилган куни билан табриклаб, ундан эксклюзив интервью олди.
- Яқинда «Йокогама» билан шартномани яна янгиладингиз. Бу борада қарор чиқаришда қийналмадингизми?
- «Йокогама»дан таклиф тушган пайт ҳали ўйнашдан чарчамаганим, фаолиятимни давом эттиришни хоҳлаётганимни ҳис қилиб тургандим. Шунинг учун ҳам бир тўхтамга келишда иккиланмадим. Албатта, ўзимдан анча ёш футболчилар билан шуғулланишим кераклигини тушунаман ва якуний қарор чиқаришда фақат ички сезги эмас, балки онгим ва организмим амрига ҳам қулоқ солдим.
- Пандемия пайти нималарни кашф қилдингиз, хусусан, ўзингизга тааллуқли қандай янгиликларни билиб олдингиз?
- Коронапандемия шахсан менга спортнинг қадр-қиммати ва ўйинлар фақат томошабинлар билан чиройли эканлигини эслатди. Хориж лигаларида ҳанузгача мухлисларсиз ўйналмоқда, Японияда эса стадионларни ярмига томошабин қўйилмоқда. Менимча, бу японларнинг интизом ва жиддийлик бобида олдинда эканликларидан далолат.
- 54 ёшда юқори даражада футбол билан шуғулланаётганингиздан ўзингиз ҳам ҳайрон бўласизми?
- 18 ёшда Бразилияда биринчи профессионал шартнома остига имзо чекканимда, фаолиятим шунча узоқ чўзилишини тасаввур ҳам қилмаганим тайин. Амалда йиллар аро шу ёшга келдим. Бунда қандайдир сир йўқ. Фақат бор кучимни футболга сарфлашимни айта оламан, холос.
- Ўтган мавсум ҳақида алоҳида тўхталсак: сиз ва жамоангизга қайси воқеа энг яхшиси бўлди?
- Жамоа билан шартнома тузганимни тилга ололмайман, чунки клуб хоҳламаса, таклиф билан чиқмасди. «Йогокама» ҳамкорликни давом эттиришни истадими, демак, мендан ҳали наф бор. Шуниси кўпроқ қувонтиради. Албатта, жамоанинг ғалабаларига ҳисса қўшиш учун ҳаммасига тайёрман.
- Яқинлашиб келаётган мавсумга доир мақсад ва тахминларингиз қандай? Албатта, «Йокогама» билан...
- Табиийки, асосий таркибда иложи борича кўпроқ майдонга тушишни кўзлаяпман. Жамоанинг мақсади - маҳаллий лигада юқори ўнликка кириш. Бунда «Йогокама»га қўлдан келганича ёрдам берсам, бас.
- Фаолиятингизнинг Бразилиядаги босқичи футболчи ва шахс сифатида шаклланишингизда қандай ўрин тутди?
- Бразилияга 15 ёшда кўчиб бордим ва орадан 3 йил ўтиб, шартнома туздим, яхшигина клубда ўйнадим. Асосийси, у ерда профессионалликни ўргандим. Яна майдонда нима қилиш кераклигию, ўз ҳақимда ўйлашни ҳам.
- Ўзингизни етакчи сифатида кўрасизми?
- Бошқа футболчилардан ёшим анча катта. Фарқ - ота ва ўғил ёши даражасида. Шунинг учун уларнинг менга қандай қарашлари муҳим. Агар тўғри муносабатда бўлишса, уларга майдондаги хатти-ҳаракатлар билан футболга нисбатан иштиёқни сақлаб қолишни ўргата оламан, менимча. Ахир бошқаларга қараганда анча кўп ўйнаганман, тажрибам катта.
- Бутсаларни михга илганингиздан кейин мураббийлик ишига ўтасизми ёки ҳаммасига чек қўясиз?
- Ҳозирги босқичда мураббийлик касби ҳақида ўйлаётганим йўқ. Шунингдек, қачондир футболдан воз кечаман, деб ўйламайман. Қачон кетишимни ҳам билмайман. Оддий айтганда, у ёки бу даражада ўйнашда давом этаман, барибир. Аммо қанча вақт? Буниси номаълум. Эҳтимол, эртага тўхтатарман, балки 2-3 йилдан кейин...
- Ҳозир ҳам глобал пандемия марказида эканмиз, футбол мухлисларига нима демоқчисиз?
- Ҳа, коронавирус пандемияси туфайли дунёда вазият ҳали ҳам жуда оғир. Муҳими, кўплаб одамлар саъй-ҳаракатлари ҳисобига футбол давом этяпти, ҳамон ўйиндамиз. Бу - буюк неъмат. Ишончим комил, агар биргаликда ҳаракат қилсак, инқирозли даврдан ҳам чиқиб кетамиз. Мухлислар стадионларга талпинадиган кунлар яқинлигига ишонаман. Унгача футболчилар мухлисларнинг бевосита далдаларисиз ишлашда давом этишади. Кун келиб, голлар ва ғалабаларни яна бирга нишонлашимизга шубҳам йўқ. Ўзингизни авайланг ва бахтиёр ҳаётдан завқланинг.
МАЪЛУМОТ УЧУН
Казуёши МИУРА
Туғилган санаси ва манзили: 1967 йил 26 февраль (54 ёш), Сизуока (Япония)
Лақаби: «Қирол Казу»
Фуқаролиги: Япония
Бўйи: 177 см., вазни: 72 кг.
Позиция бўйича: ҳужумчи
Профессионал фаолияти
1986: «Сантос» (Бразилия) - 2та ўйин
1986: «Палмейрас» (Бразилия) - 0
1986: «Мацубара» (Бразилия) - 0
1987: КРБ (Бразилия) - 0
1987—1988: «XV де Жау» (Бразилия) - 0
1989: «Коритиба» (Бразилия) - 21та ўйин, 2та гол
1990: «Сантос» (Бразилия) - 11та ўйин, 3та гол
1990—1998: «Верди Кавасаки» (Япония) - 192та ўйин, 100та гол
1994—1995: «Женоа» (Италия) - 21та ўйин, 1та гол
1999: «Кроация» (Хорватия) - 12та ўйин
1999—2000: «Киото Санга» (Япония) - 41та ўйин, 21та гол
2001—2005: «Виссел Кобе» (Япония) - 103та ўйин, 24та гол
2005—...: «Йокогама» (Япония) - 272та ўйин, 27та гол
2005: «Сидней» (Австралия) - 4та ўйин, 2та гол
1990—2000: Япония футбол термаси - 89та ўйин, 55та гол
2012: Япония футзал термаси - 6та ўйин, 1та гол
Казуёши Миура - Осиё кубоги-92 чемпиони
М.ПЎЛАТОВ тайёрлади
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20