1979 йилнинг 14 февраль куни «Ноттингем Форест» «Бирмингем»га Англия термаси форварди Тревор Френсис учун рекорд сумма тўлаган, ўшанда илк марта футболчи 1 миллион фунт стер-лингга баҳоланганди. Дунё аҳлини лол қолдирган мазкур воқеага «Советский спорт» батафсил тўхталди.

Фрэнсис катталар футболидаги дебютини 1971 йили «Бирмингем Сити» клубида нишонлаган. 16 ёшу 317 кунлигида бир ўйинда учта гол урганди. Тревор ўшандан буён Англия чемпионати тарихида «хет-трик» муаллифига айланган энг ёш футболчи бўлиб турибди. «Бирмингем»даги 8 йил мобайнида Фрэнсис чемпионатда 250дан ортиқ ўйин ўтказиб, 119та гол урди.

24 ёшга тўлганда «Бирмингем» уни АҚШга бир йиллик ижарага жўнатди. Ўшанда америкаликлар соккерни ривожлантиришга жиддий киришишган, янги футбол лигаси - NASLга асос солишганди. Америка клубларига жаҳон даражасидаги юлдузлар кўчиб ўтишди: Мюллер, Беккенбауэр, Кройф, Неескенс, 70-йиллар ўрталарида Нью-Йоркнинг «Космос» жамоасида кимсан Пеле ҳам ўйнади. Тўғри, юқорида номи қайд этилган футболчилар ўша пайт фаолиятларининг сўнгги дамларини ўтказишаётган, океан ортига «кексалик» учун пул ишлаш мақсадида боришганди. Аммо ёш англиялик футболчи бундай мақомда эмасди, шу боис, камтарона «Детройт Экспресс» таркибига қўшилди.

Фрэнсис бир йил ичида 33та ўйинда 36та гол уриб, ҳар қандай шароитда юқори савияни намойиш эта олишини кўрсатди. Сўнгра Англияга қайтди, «Детройт Экспресс» эса икки йилдан кейин банкрот бўлди.

Қаҳрамонимиз АҚШдан қайтган пайт «Бирмингем» яқиндагина чемпионликни нишонлаган «Ноттингем Форест»дан Тревор бўйича ажойиб таклиф олди. «Форест»га ўша пайт ўзига хос феъл-атвор соҳиби бўлган Брайан Клаф устозлик қилганди. Бир сафар у ўйиндан кейин кийиниш хонасида «МЮ»нинг бўлажак афсонаси Рой Киннинг юзига мушт туширгани билан ёдда қолган. Мураббийга шогирдининг ўз дарвозабонига ноқулай пас узатгани ёқмаган, зеро ўша вазиятда «Ноттингем» гол ўтказиб юборганди. Рой устозига жавоб қайтармади, ноодатий жазони оддий қабул қилди, ўшанда у атиги 20 ёшда эди.

Мазкур трансфер барчани қаноатлантирди: Тревор етакчилардан бирининг таркибида имкониятларини синаб кўришни истади, ўртамиёна «Бирмингем» эса мўмай даромадга эга бўлди. Клаф эса Европа Чемпионлар кубогидаги дебют арафасида ҳужум чизиғини кучайтириш ниятида эди.

Келишув Клафнинг қайсарлиги туфайли барбод бўлиши ҳам ҳеч гап эмасди. Мураббий 999 999 рақамига ёпишиб олиб, бундан бир фунт ҳам ортиқ тўлаш керакмаслигини уқтираверди. Унинг фикрича, клуб шундоқ ҳам футболчи учун катта пул бериб улгурганди. Афтидан, миллион сўзининг руҳий таъсири Клафни қўрқитган кўринади. Эҳтимол, чўчиган фақат у эмасдир. Масалан, бундан икки йил аввал ўша даврнинг энг етук англиялик футболчиси Кевин Киган «Ливерпул»дан «Гамбург»га 420 минг фунт эвазига ўтганди. Аммо охир-оқибат клублар «лимон»ли рекорд рақамда тўхташди. Клафни ёрдамчиси бир амаллаб кўндирди.

Тревор «Форест» офисига тарихий шартномани имзолаш учун ташриф буюрганда, мураббий у ерда эмасди. Футболчи кўнглига шубҳа оралади: Клаф йўқ бўлса, битим остига имзо чекиши керакми? Балки у мураббийга керак эмасдир? Бир соат мобайнида Клафнинг ёрдамчилари Фрэнсисни турли гап-сўзлар билан чалғитиб туришди, мураббий сквош ўйнагани сабабли кеч қолганди.

Клаф матбуот анжуманига ҳам сквош ракеткасини кўтарган ҳолда кириб келган, ўша заҳоти янги футболчига бошланғич таркибдан жой кафолатланмаганини айтганди. Мураббий Фрэнсисни ўзи кўниккан ҳужум марказига эмас, ўнг қанотга қўйди. Қўшимчасига, йирик трансфер туфайли матбуотчилар ва фанатлар босими ҳам кучли таъсир кўрсатди. Натижада Тревор дастлабки мавсумда 20та ўйинда атиги 6та гол урди. Фрэнсис Европа Чемпионлар кубоги баҳсларида қатнаша олмасди: янги клуби таркибига қўшилганидан кейин уч ой ўтиши талаб этиларди.

Ушбу муддат майда - еврокубок финали арафасида тугади. Клаф кутилмаганда жамоа етакчиси Мартин О~Нилни захирада қолдириб, ўнг қанотга Фрэнсисни қўйди. Айнан у «Ноттингем Форест» тарихидаги муҳим голлардан бирига муаллифлик қилди. Англияликлар 1:0 ҳисобида ғалаба қозонишди, клуб ЕЧКда ўзининг дастлабки совринини қўлга киритди.

Бир йилдан кейин «Ноттингем» қаторасига иккинчи марта Чемпионлар Кубогида зафар қучди. Фрэнсис финал арафасида жароҳат олиб, кейинчалик 1980 йили Италияда ўтган Европа чемпионатини ҳам ўтказиб юборди. Шундан сўнг қаҳрамонимиз сермаҳсуллик кўрсата олмади ва 1982 йили 1 млн. фунт эвазига «Манчестер Сити» сафига қўшилди. «Шаҳарликлар» либосида 26 марта майдонга тушиб, рақиблар дарвозасини 12 марта ишғол қилди, кейинчалик клубда молиявий муаммолар бошланди.

Маҳоратли форвард бахтини қидириб Италияга йўл олди ва у ерда 4 йил тўп сурди - дастлаб «Сампдория»да, кейин эса - «Аталанта»да. Фабио Капелло ҳатто Фрэнсисни «А» серияда тўп сурган энг яхши англиялик» сифатида эътироф этганди. Тўғри, Тревор гол уриш бобида «Бирмингем»дагидек порлай олмади. Бутсаларини эса 40 ёшида михга илди.

МАЪЛУМОТ УЧУН

ТРЕВОР ЖОН ФРЭНСИС

1954 йилнинг 19 апрелида Плимут (Англия)да туғилган

«Бирмингем», «Ноттингем Форест», «Манчестер Сити», «Глазго Рейнжерс» ва бошқа клублардаги фаолияти билан ном қозонган.

Италияда «Самдория» ва «Аталанта» шарафини ҳимоя қилган.

Англия термасидаги дебютини 1977 йилнинг 9 февралида Нидерландия миллий жамоасига қарши баҳсда нишонлаган. Умумий ҳисобда, термада 52та ўйин ўтказиб, 12та гол урган.

1982 йилги жаҳон чемпионати иштирокчиси. Мазкур турнирда 2та гол урган: собиқ Чехословакия ва Қувайт термалари дарвозасига йўл топган.

ЖАЪФАРАЛИ тайёрлади