Ўтган мавсум кичик танаффусдан сўнг Суперлигага қайтган Муборакнинг «Машъал» жамоаси учун мўътадил кечди. Тўғри, жамоа мавсумни 10-поғонада якунлади аммо элитада ўз тарбияланувчилари ва ёшларга таяниб иштирок этган клуб учун бундай дебютни муваффақиятли деса бўлади. Бироқ энди оз бўлсада тажриба тўпланди.
Табиийки, жорий мавсумда натижалар ҳам олдингисига қараганда юқорироқ бўлиши керак. Яқинда «Машъал» ҳужумчиси Ҳумоюн Муртазоевни суҳбатга чорлаб, шу ва бошқа мавзулардаги саволларимизга жавоб олдик.
- Янги мавсумга тайёргарлик жараёнидаги таассуротларингиз билан ўртоқлашсангиз.
- Тараддуд жуда яхши ўтмоқда. Кайфият аъло... Йигитлар билан бўлажак мавсумда кўнгилдагидек иштирок этиш учун маш-ғулотларга зўр берганмиз.
- Жамоани мавсумга тайёрлаётган бош мураббий Серхио Маринангели билан кутилмаган вазият юз берди. Унинг ўрнини яна Дилявер Ваниев эгаллади. Айтинг-чи, мавсум бошланишига саноқли кунлар қолганида мураббий алмашиши футболчиларга қўшимча ноқулайликлар келтириб чиқармайдими?
- Асло йуқ. Жамоамизда барча профессионал футболчилар йиғилган. Қолаверса, янги бош мураббийимиз ҳам биз учун бегона эмас.
- Серхио Маринангелининг иш услуби ҳақида гапирсангиз.
- Маринангелининг услуби маҳаллий мутахассисларникидан бироз фарқланар экан. Унинг кўмагида биз етарли даражада жисмоний ҳолатимизни тиклаб олдик.
- Жамоа негадир ўртоқлик учрашувларига кам эътибор қаратди. Бунинг сабаби нима?
- Нега энди? Биз етарли даражада назорат ўйинлари ўтказдик. Ўйлашимча, 8та «ўртоқлик» кам эмас.
- Дебютини асосан ўз тарбияланувчилари билан ўтказган «Машъал» учун ўтган мавсум чакки бўлмади. Бу йилги мақсадлар қандай?
- Янги мавсумда янги марраларни кўзлаяпмиз. Жамоамизда профессионаллар йиғилган. Клуб раҳбарияти қийинчиликларга қарамай, бизга қулай шароитлар яратиб бермоқда. Бош ҳомийимиз - «Ўзбекнефтегаз» миллий холдинг компаниясига миннатдорчилигимизни билдирамиз.
- 2019 ва 2020 йилларда ижара асосида «Насаф» ва «Бунёдкор» жамоаларида ўйнадингиз. Хўш, қайси клубда кўпроқ ўсишга эришдингиз?
- Ҳар икки жамоада тажриба орттирдим. Футболчи қаерда бўлмасин, ўз устида ишлаб, бирга тўп сураётган жамоадошларидан ўзи учун керакли ниманидир ўзлаштириб бориши керак. Сиз айтиб ўтган жамоалар юртимизда номдор ҳисобланади. Уларнинг таркибида Суперлиганинг кўзга кўринган футболчилари тўп суришади. Шундай экан, улар билан бирга ўйнаш орқали кўп нарсаларни ўргандим.
- Сизга бошқа клублардан таклифлар бўлаётгани ҳақида кўп эшитамиз. Айтинг-чи, нима учун «Машъал»дан кетмайсиз?
- Агар клубга фойдам тегадиган бўлса, кетаман. Ҳозир Осиё клубларидан қизиқишлар бор. Очиғи, Европада ўйнашни хоҳлардим.
- Ўтган йилги Суперлига баҳсларида жамоангиз қайси клубга қарши ўзининг ёрқин ўйинини кўрсата олди, деб ўйлайсиз?
- Ўтган мавсум ҳар бир жамоа сингари биз учун ҳам оғир ўтди. Аммо шунга қарамай, «Навбаҳор», «Насаф», «Бухоро», «Сўғдиёна», «Металлург», «Локомотив» каби жамоаларга қарши чиройли ўйинлар намойиш этдик.
Х.ЮСУПОВ суҳбатлашди
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20