Icon нашри «Мадрид дербиси» («Атлетико» - «Реал») олдидан «Қироллик клуби» бош голеадори Карим Бенземадан ихчамгина интервью олди. Алоҳида айтиш керак, франциялик ҳужумчининг якшанба кунги учрашувда иштирок этиши аниқ эмасди, шунга қарамай, у суҳбатлашишга рози бўлиб, Мадриддаги фаолиятига тўхталди. Жумладан, вақтида Криштиану Роналду билан қандай муносабат ўрнатгани ҳақида гапиришдан ташқари, ҳамюрти Зайниддин Зиданни яна бир бора эътироф этди. Эслатиш жоиз, Карим Бензема «Реал» сафига худди Роналду ва Кака қатори 2009 йили қўшилганди. Яъни Флорентино Перес «Қироллик клуби» тепасига қайтганидан кейин биринчи навбатда, шу учликни харид қилганди. Мана, Роналду ҳозир Туринда ўйнамоқда, Каканинг кетганига анча бўлди, Карим эса ҳамон «Реал» билан бирга.

Криштиану Роналду билан ҳамкорлик

- Тўғриси, Криш билан бирга ўйнаган даврда жуда бахтиёр эдим. Иккинчи томондан қараганда, унинг кетиши менинг бош­қа ролни бажаришимга имкон бергани ҳам рост. Умуман, Криштиану йилига 50-60та гол урарди ва айнан унинг ўйинига мослашишим талаб этиларди. Яна бир гап - у ҳамон дунё футболида энг яхшилардан бири, шубҳасиз.

Зайниддин Зидан ишига муносабат

- Зиданга ҳамиша туғишган акамдек қарайман. Мисол учун, у майдон ташқарисида ҳам доимо ёнимда ва керакли маслаҳат беришга тайёр. Қисқаси, беназир мураббий.

Дўстлик тушунчаси

- Ҳаётда ягона дўстим бор. Дўст­лик тушунчаси шахсан мен учун жуда катта аҳамиятга эга.

Совуққонлик юзасидан

- Йўқ, менга ҳеч нарса таъсир қилмайди, деб айтолмайман. Ахир инсонман, ўзимга яраша ҳис-туйғу­ларим бор. Лекин ҳеч қачон заиф томонларимни кўрсатишни истамайман. Фақат баъзи жиҳатларда заиф эканлигимни тан олишим жоиз.

Шахсий характери

- Шароити оғир ҳудудда улғайганман. Ўша вақтлар яхши кийинган ва чиройли автомобилларда юрадиган катта ёшли йигитларни кўрганимда, уларга шунчаки, ҳавас қилардим. Менимча, ҳозирги характерим ўша қийин даврда шаклланган бўлса керак.

Кумир тушунчаси

- Кимгадир кумир сифатида қараган эмасман, лекин мен учун намуна вазифасини бажарган инсонлар бор, албатта. Мисол учун, футболда бразилиялик Роналдони ўзимга «модель» сифатида олганман. Яна афсонавий Майк Тайсонга қойил қолардим. Ҳозир бемалол айтаман, худди Тайсон каби энг қуйидан юқорига кўтарилишга эришдим. Ҳар ҳолда, ҳеч нарса ўзича келиб қолгани йўқ.

Ирқчиликка нафрат

- Ҳаётда ушбу иллатга ўрин йўқ. Ирқчилик - жирканч ва ифлос. Ахир барчамиз тенгмиз.

------------------------------------

P.S.: Карим Бензема «Мадрид дербиси»да тўлиқ вақт ўйнаб, 88-дақиқада «Реал»ни мағлубиятдан қутқариб қолган голга муаллифлик қилди.

М.ПЎЛАТОВ тайёрлади