Қайднома

Қидирув

Криштиану Роналдуни "Юве"дан ҳайдаш керак?

Криштиану Роналдуни "Юве"дан ҳайдаш керак?

  01.04.2021 02:20
  0
  273
Криштиану Роналдуни

«Ювентус»нинг собиқ президенти Жованни Коболли Жильи жамоа раҳбариятини бош юлдуз Криштиану Роналдуни таркибдан ҳайдашга чақирмоқда. Қаранг-а, ғалати, жуда ғалати эмасми? Ҳар ҳолда, португалиялик юлдуз ҳозир ҳам «кекса синьора» етакчиси саналади. Лекин собиқ раҳбар ўз гапини кучли далил билан асослади - унинг иддаосига кўра, Криштианунинг 1та голи 1 миллион еврога тушаётган экан. Шундан сўнг таҳлилчилар дарров текшириб кўришди ва Жильининг гапи деярли тўғри чиқди...

Роналду жуда қиммат...

«Ювентус» Европа Чемпионлар Лигаси 1|8 финалида нисбатан «юмшоқ»роқ туюлган рақибга дуч келганига қарамай, мусобақадан чиқиб кетди. Яъни туринликлар 2та ўйиннинг умумий натижасига кўра, камтарин «Порту»га йўл бўшатишди. Шу билан Криштиану Роналдунинг «кекса синьора» билан ЧЛдаги учинчи уриниши ҳам омадсиз хотима топди. «Реал»нинг кетма-кет «шалпангқулоқ» олишига катта ҳисса қўшган португалиялик юлдуз 3 мавсум давомида «бьянконерлар» билан Европа клуб футболининг энг нуфузли турнирида лоақал ярим финал юзини ҳам кўргани йўқ. «Ювентус» 2019 йили чорак финалда ёш ва жасур «Аякс» томонидан тўхтатилган бўлса, ЧЛнинг ўтган мавсумида Италия гранди йўлига «Лион» тўсиқ қўйди. Мана, энди Сержиу Консейсао бошқарувидаги «аждарлар» ҳам «Аякс» ва «Лион»дан кам эмасликларини исботлашди. Аввалги мавсумлар «плей-офф» босқичида «Юве» сафида фақат Роналду гол урганди, бу сафар у «Порту» дарвозасини нишонга олиш мис­сиясини бажаролмади. Турин клубининг 2та ўйиндаги 4та голидан 3таси Федерико Кьеза, яна бири Адриан Рабьо ҳисобига ёзилди.

Хуллас, жамоа ЧЛ илк «плей-офф» раундидан кейиноқ четга чиққач, энг жиддий танқидлар айнан Роналдуга қаратилди. Кўпни кўрган мутахассислар ҳаттоки, «Ювентус» раҳбариятига 36 ёшли португалиялик билан тезроқ хайрлашиш кераклигини уқтиришмоқда. Яъни бу ишни келаси ёздан кейинга қолдирмаслик керак эмиш. Хусусан, «Ювентус»нинг собиқ президенти Жованни Коболли Жильи барчасини қўполроқ оҳангда баён этди. У Роналду трансферини «жуда қимматга тушган хато» сифатида баҳолади ва буни тезроқ тузатиш шартлигини алоҳида таъкидлади.  «Аслида Роналду билан шартнома тузиш мутлақо нотўғри бўлди. Криштиану Туринга келган куниёқ бу ҳақда баралла гапирган эдим. Ҳа, биламан, Роналду - қойилмақом чемпион. Аммо у жуда қимматга тушади. Энди ҳаммаси «Ювентус»га боғлиқ. Ахир клуб Роналдунинг 1та голига 1 миллион евродан тўламоқда. Андреа Аньелли ўзига танқид кўзи билан қарасин, унинг атрофида муносиб мутахассислар йўқ. Ҳозирги омадсизликларда Пирлони асло айбламайман, ўзим ҳам вақтида тажрибасиз Феррарани ишга ёллаган эдим. Ушбу тайинловимга ижобий баҳо бериш мушкул. Аньелли ҳам таваккал қилиб кўрди. Чунки Саррини жамоада ортиқ кўришни истамади ва Пирло вариантига кўнди. Билишимча, Паратичи ва Недвед уни бу иш беришига қатъий ишонтиришган. Энди «Ювентус» тезроқ тикланиши керак. Ўйиндан кейин Недведнинг асабий ҳолда жазавага тушгани? Уни буюк чемпион сифатида билардим, аммо аён бўлдики, «Ювентус» вице-президенти лавозимига муносиб эмас экан. Қисқаси, раҳбарият Павелнинг клубдаги ролини обдон ўйлаб кўриши керак. Дейлик, Недвед собиқ мураббий Аллегри иштирокидаги сўнгги матбуот анжуманига ташриф буюрмади ва бундай муносабат менга сира ёқмади. Биламан, иккиси унча чиқишолмасди, аммо клубга катта хизмати сингган кишига ҳурмат бажо келтириш керак, барибир. Павел ўша пайт чет элда бўлганини айтиб, ўзини оқлади, аммо бу ёлғон: у Италияда эди. Менимча, Недвед «Ювентус» услуби ва нуфузига мувофиқ эмас.

Асосий хулоса битта - клуб мавсум охирида Роналдуни сотиши ва Паратичини ҳам ишдан бўшатиши керак. Эҳтимол, Аньелли уни кейинчалик четлаш учун атайин лавозимини кўтаргандир... Бундай сценарий чиндан ҳам, ҳақиқатга яқин», - деди Жильи.


1та голи чиндан ҳам, 1 миллион евроми?

Келинг, энди Жильи жаноблари ҳақиқатни гапиряптими ёки рақамларни бўрттириб юборган - шуни аниқлайлик. Кришнинг «Юве»даги йиллик маоши 31 миллион еврони ташкил қилади. 2,5 мавсум давомидаги статистикаси - 121та ўйинда 92та гол (охирги 2та ўйиндаги натижаси қўшилмаган). Турин клуби бу даврда Роналдуга жами 73,7 миллион евро миқдорида маош берган (дарвоқе, португалиялик футболчи ўтган йилнинг март ойида юзага келган COVID-19 пандемияси билан боғлиқ ин­қироз туфайли иш ҳақини камайтиришга рози бўлиб, 3,8 миллион евродан воз кечган ва бу умумий суммага киритилмаган). Хуллас, қолгани математиканинг иши - 73,7ни 92га бўламиз ва 0,8 миллион евро келиб чиқишини кўрамиз. Қисқаси, «Ювентус» ЧЛ-2020|2021дан тушиб кетган вақтгача Криштиануга ҳар бир голи учун тўлаган сумма шу. Демакки, Жованни Коболли Жильи рақамларни бирозгина ошириб кўрсатган бўлса-да, фикрида жон бор: Роналду ҳақиқатан ҳам, «кекса хоним» учун ҳаддан ташқари қимматбаҳо «ўйинчоқ»дек кўринмоқда. Ҳар ҳолда, унга тикилган маблағ натижа бобида ўзини оқламади. Зеро, португалияликни жамоани айнан Чемпионлар Лигаси «плей-офф» босқичларида ўз ортидан эргаштириши учун харид қилишган. Бинобарин, «Юве» ички биринчиликда унингсиз ҳам мақсадга эришарди катта эҳтимол. Бироқ Криш амалда фақат «Атлетико» билан қарама-қаршиликда ўз даражасини кўрсатди, ке­йин сукунат домига чўмди...

Криштиану Роналду ва «Ювентус» ўртасида расмийлаштирилган 4 йиллик шартнома 2022 йилнинг ёзида якунига етади. Эҳтимолки, футболчининг ўзи яна бир йил Туринда қолишни хоҳлар - бу унинг учун якуний уриниш. Ҳар ҳолда, Криш «бьянконерлар» билан ҳам «шалпангқулоқ» кубокни ютиш асносида бутун дунёга буюк эканлигини яна бир марта исботлашни хоҳлайди. Бироқ танганинг иккинчи томонини ҳам унутмаслик керак - Аньелли эҳтимолки, аллақачон ҳаммасини ҳал қилиб қўйгандир. Бинобарин, унинг яқин келажакда клубда глобал қайта қуриш ишларини бошлаши ҳақида гап-сўзлар тез-тез қулоққа чалинмоқда...

А.АҲМЕДОВ тайёрлади


Манба: interfutbol.uz


InterFutbol.uz нинг Telegram даги саҳифасига уланинг – энг сўнгги янгиликлар, қизиқарли блоглар ва таҳлилий материаллар энди бир тўпламда.

Оммабоп мақолалар

Хабарингиз борми

Чемпионатлар

тўлиқ жадвал »
  • Вадим Абрамов миллий терма жамоамизни ЖЧ-2022 олиб чиқишига ишонасизми?


«ИнтерФУТБОЛ» газетасининг расмий сайти.
Гувоҳнома № 0149. Берилган санаси: 25.06.2008 Муассис: «ИНТЕРФУТБОЛМЕДИА» МЧЖ.
Бош муҳаррир: Аҳадхон АБДУҲАМИТОВ.
Таҳририят манзили: 160400, Косонсой шаҳри,Чорбоғ кўчаси, 17-уй.
Электрон манзил: info@interfutbol.uz