Каталониянинг «Барселона» ва Испания терма жамоасидаги ўйинлари билан танилган, «Ал-Садд» бош мураббийи 41 ёшли испаниялик мутахассис Хави Қатар чемпионатининг март ойидаги энг яхши мураббийи деб топилди. Бу ҳақда клуб матбуот хизмати твиттерида хабар берди.

Хави ушбу мавсумда сентябр, октябрь, ноябрь, январь ва февраль ойларида энг яхши мураббийга айланганди, фақат декабрда у ушбу совринни қўлга кирита олмаганди.

Эслатиб ўтамиз, «Ас-Садд» 2020/2021 йилги мавсумда Қатар чемпиони бўлган эди. Хави бошқарувидаги жамоа Қатар чемпионати тугашига 4 тур қолганида чемпионликни расмийлаштиргандилар.

Маълумот учун, Хави «Барселона» тарбияланувчиси ҳисобланиб 1998 йилдан 2015 йилгача клуб шарафини ҳимоя қилган. Каталонияликлар билан собиқ ярим ҳимоячи саккиз марта Испания чемпиони бўлди, уч марта мамлакат кубогини ютди, тўрт марта Чемпионлар Лигасида ғолиб чиқди ва бошқа бир қатор совринларни қўлга киритди. Фаолиятини якунлашидан бироз олдин Хави «Ал-Садд» га ўтди ва футболчи сифатида Қатар чемпионига айланди.