Икки юрак, юзлаб татуировка, 4та ит ва кўл бўйида қад ростлаган уй. Бундан ташқари, баланд овозда мусиқа ва футбол тўпи. «Портлатувчи», ёқимли ва нафис. Тео Эрнандес ва Зое Кристофолининг ҳаёти шундай гўзал. Ўтган асрнинг 90-йиллари охирида туғилган «россонерлар» ҳимоячиси ва унинг вероналик 20 ёшли қаллиғи эркинликдан роҳатланиш-япти, лекин баъзи хавотирлари ҳам йўқ эмас. Тео курашувчан, Зое сабрли. Улар ўтган ёзда топишишди. Тео Марселда туғилган ва «Бавария»даги акаси Лукас билан отасиз улғайган. У испан тилида сўзлашади, аммо Франция миллий жамоасида ўйнашни орзу қилади, яна Ибрагимович, Роналду ва Рамосга ҳайрат билан қарайди, лекин фақат ва фақат ўзига эътибор қаратади. Ўзига эътибори шу даражада баландлигидан Зое нуқул шикоят қилади...
- Биринчи учрашув ва биринчи қадам...
Тео: - Миланда умумий дўстимиз уйида кечки тамадди пайти учрашганмиз. Зое ўшанда бир оғиз ҳам гапирмаганди. Эртаси куни «Инстаграм» орқали хат ёздим, лекин жавоб келмади. Кейинги икки ҳафта роса қийналгандим.
Зое: - Ҳеч қачон жавоб бермайман, чунки йигитлар билан ижтимоий тармоқларда танишишни хоҳламайман. Ҳеч қачон бундай қилмаганман.
Тео: - Аммо мен билан алоқага чиқдинг-ку, барибир. Зоени аввалига ресторан, кейин рақсга таклиф қилдим ва якунда мақсадга эришдим.
- Бир-бирингизга тааллуқли 3та сифат...
Зое: - Тео жуда қатъиятли, шубҳасиз. Бироз худбинроқ ҳам, яхши маънода, албатта. Гарчи бу унга ярашсада, шахсий ҳаётда сал камтарроқ бўлишини хоҳлардим. Қисқаси, мен билган яхши ва энг ёқимли инсон. Тео ҳеч қачон кимгадир зарар етказмайди. Ҳа, баъзида ақлдан озиши ҳеч гап эмас, лекин дейлик, рақибига атайин жароҳат етказишни хаёлига ҳам келтирмайди.
Тео: - Зое ақлли ва мени ҳамиша қўллаб-қувватлайди. Яна чиройли, лекин ҳар доим эмас, эрталаб бироз... Баъзан мулоқотга киришишда қийналаман. Умуман олганда, қаллиғим - мукаммал.
- Зоенинг рашки ёмонми?
Тео: - Ҳа, бироз. Лекин уни шундайлигича қабул қилишдан бошқа чорам йўқ.
Зео: - Рашк яхши-ку, ахир у севгилим. Бошқача бўлганида, қандай ғамхўрлик қилардим?
- Теода нуқсон ҳам борми?
Зое: - Мен билан келишиш қийинлигини жуда кўп таъкидлайди. Шу холос.
- Комо кўли бўйидаги уйда яшаш қандай?
Зое: - Янги уйга яқинда кўчиб ўтдик. Ҳали ҳам атроф турли қутилар билан тўла, аммо катта оила эканлигимиздан бахтиёрмиз.
Тео: - 4та итимиз бор. Аслида менга Милан ёқади, лекин шаҳар ташқарисида яшашни афзал кўраман. Дастлабки йили ёлғизликдан қийналдим, энди Зоедан мамнунман. Зеро, у ўзимни уйдагидек ҳис қилишимни таъминлаяпти.
- Оилада ким бошлиқ?
Тео: - Тенгмиз, лекин мен бироз юқоридаман, барибир.
Зое: - Ҳар биримиз ўзимизга хос тарзда масъулмиз.
- Дейлик, таомни ким тайёрлайди?
Тео: - Ҳеч ким. Зое песто ва макаронли таом тайёрлашни яхши билади. Фақат шу.
Зое: - Тео ҳам ошхонада чакки эмас.
- Куннинг энг яхши вақти...
Тео: - Оддий кунни назарда тутяпсизми? Унда кундузги ибодат. Яна Playstation ўйини вақти. Бу ўйинга Браим Диас ва мадридлик дўстларим билан 5-7 соатлаб шўнғишим мумкин.
Зое: - Мен учун куннинг энг яхши лаҳзаси - бу Теонинг уйга қайтгани.
- Тео, ўйинда ўз жамоанг дарвозасига товон билан чиройли гол уриб қўйдинг. Буни қоплаш керак...
Тео: - Имкон туғилиши билан Зоени кечки овқатга таклиф қиламан. Одатда диван ва Netflix лавҳаларини афзал кўраман. Зое эса ҳар доим шаҳар марказида овқатланиб келишни хоҳлайди.
3ое: - Бироқ ҳозир унда баҳона бор - COVID-19.
- Ҳамиша шундаймисизлар - ит билан мушук, кулги ва ғазаб...
Тео: - Ҳа, ҳамиша қувноқман.
Зое: - Фақат ғазабланган ҳолатлари бундан мустасно.
Тео: - Уйда атиги бир неча марта ғазабланганман...
- Дербида «Интер»га 0:3 ҳисобида ютқазганинглардан кейинми?
Тео: - Шубҳасиз.
Зое: - У бепарво аҳмоқ ролини ўйнаса, кулса ёки ҳазиллашса, ҳаммаси жойида эканлигини сезаман. Агар нимадир ёқмаса ёки безовта қилса, ҳаммасини ичига ютади. Шунчаки, гаплашмайди ва ташқарига чиқиб кетади.
- Бой берилган дерби ўз йўлига, қайғу нимани англатади?
Зое: - Қайғу? Бу мени ҳамиша қўллаб-қувватлайдиган онам Маргаританинг ёнимда эмаслиги.
Тео: - Онам ва акамдан узоқлаштирган, оддий ҳаёт кечиришга имкон бермаётган COVID-19 ҳам қайғудир.
- Бахт ҳақида нима дейиш мумкин?
Зое: - Ҳар куни оддий нарсаларда ўзингизни яхши ҳис этишингиз, яқин одамлар қадр-қимматини тушунишингиз - бахт.
Тео: - Оилам тинчлиги, Зое билан бирга бўлиш ва «Милан»да юксакларга интилиш.
- Мағрурлик нима?
Тео: - «Милан»нинг ғалабаси мени қаттиқ ғурурлантиради.
Зое: - Теонинг ютуқлари ва ўзимнинг олдинга ташлаган қадамларим. Шу кунга қадар кўп ишладим: энагалик ва официантлик қилдим, механик бўлдим ва ресторанда қўшиқ куйладим, муҳими, ғурурни ҳеч қачон йўқотмадим.
- Қурбонликлар ўз самарасини бердими?
Тео: - Ҳали ҳам қурбонликлар йўқ эмас. Болалигимда пулимиз йўқ эди ва акам билан кўп ишлаганмиз. Энди бахтлимиз, албатта.
- Ҳар куни эрталаб юксакликка чиқишни орзу қилмасанг, мақсадинг рўёбга чиқмайди.
Зое: - Тўғриси, Теонинг ҳар куни шу қадар қаттиқ машқ қилишга қаердан куч топаётганини билмайман.
Тео: - Аслида баъзан ўрнимдан туришни хоҳламайман, шунда Зое руҳлантиради: «Қани тур, ишлашимиз керак!»
- Кўпчилик сени ақлдан озган йигит ўрнида кўради.
Тео: - Тўғри телбароқман, лекин у даражада эмас. Масалан, бу борада Саму (Кастильехо)га етолмайман. Иккимиз ва Браим Диас ажралмас дўстлармиз, ҳар гал Мадриддан бирга қайтамиз ва италияликлар билан ҳазиллашишни ўрнига қўямиз.
- Ҳазилларингиз ҳақида гапириб бера оласанми?
Тео: - Саму физиотерапия столига ётганида, унинг ички кийимини массаж креми билан тўлдириб қўйганман. У бунга жавобан бутсамни мандаринга тўлдирганди.
- Тео, ҳаётга тўпни қабул қилиш ва рақиб дарвозасини нишонга олиш каби ёндашасанми ёки...?
Тео: - Қандай бўлса, шундай қарайман. Эришганим билан асло кифояланмайман. Табиатан шундайман.
- Веронада, Ромео ва Жульетта балконида бўлганмисизлар?
Тео: - Ҳа, у ер жуда зўр. Аслида яёв юришга тоқатим йўқ, кўпроқ дам олишни хоҳлайман, аммо Зое ундаса, сайрга чиқаман, барибир.
- Зое «офсайд» нималигини биладими?
Зое: - Жамоадошлари йўқлигида дарвозани нишонга олишга уринган ўйинчи...
Тео: - Қара-я... Агар тўп узатсам, жамоадошим қаерда туриши керак - рақиб ҳимоячиси олдидами ёки ортида?
Зое: - Ортида.
Тео: - Олдинда бўлсачи?
Зое: - Унда «офсайд»...
- Зое, ўйинларни қандай кузатасан?
Зое: - Озгина ҳаяжон билан.
Тео: - Аммо онамчалик эмас. У ҳар ўйинда даҳшатли 90 дақиқани бошдан кечиради, худди менга оғриқли зарба берилаётгандек.
Зое: - Чунки ўйинга шунчалик важоҳат билан киришасанки, худди бўлакларга бўлиниб кетадигандек кўринасиз.
- Дарвозани нишонга олганингда, нима ҳақда ўйлайсан?
Тео: - Табиийки, гол уриш ёқимли. Яна камида 8та гол уришим керак, шунда ўтган йилги натижам яхшиланади. Яхшики, Пиоли мунтазам олдинга бориш ва рақибга босим ўтказишимни сўрайди, албатта, ортга қайтишга улгуришим шарт. Кўпинча жарима майдони ичига кириб, зарба йўллайман. Аммо у ерда Ибра ҳам бор - бақирганча тўп сўрайди.
- Демак, Ибра дарҳақиқат, бақироқ...
Тео: - Асосийси, Златан бизга жасорат бағишлайди, кўп маслаҳат беради, баъзида танбеҳ ҳам. Таътилдан қайтгач, мени тўхтатди: «Ҳой, 90 килограмм юк билан қаерга кетяпсан?» Шу луқмасидан кейин бироз ўзимга келиб олдим. Ибра яна яхши эканлигим ва янада зўрроқ бўлишим кераклигини айтди.
- Пиоли ҳукмронми? У Зидандан яхшироқми?
Тео: - Ҳа, у кучли мутахассис. Зидан ҳам чакки эмас, лекин камроқ гапиради.
- Мальдинининг сени ишонтиришига қанча вақт кетди?
Тео - Бир стакан қаҳва кифоя қилди. У Ибицада олдимга келди. Кўзларимга ишонолмадим, чунки Мальдини мен учун абадий афсонадир. Унинг ҳар бир сўзи вазнга эга, худди «Реал»даги Марселоники сингари.
- Чемпионат чиройли, мураккаб ва олдиндан айтиб бўлмайдиган даражада ўтмоқда. Ёки ҳаммаси аллақачон ҳал бўлдими?
Тео: - «Интер» бор, шунингдек, «Милан», «Рома», «Юве»... 2 йил олдин скудеттога биргина «Ювентус» даъвогар эди. Албатта, охиригача курашамиз. «Интер»да яхши таркиб бор, «Ювентус» доим кучли. Йўқ, ҳали ҳеч нарса ҳал қилинмади, чемпионлик масаласи ҳамон очиқ. Бошидан катта устунлик билан пешқадамлик қилган жамоанинг шоҳсупани бошқасига бўшатиб бергани ортда қолди. Умуман, жорий мавсум «кичик» жамоаларга қарши ўйинлар қийин кечди. Жадвал катта роль ўйнамаяпти.
- Скудетто, ЧЛ йўлланмаси ёки ЕЛ кубоги - қай бирини танлардинг?
Тео: - Ҳаммасини!
Зое: - Ҳа, у ҳар доим ҳаммасини хоҳлайди.
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20