Аллан Окелло 15 ёшида клуб академиясига қўшилиб, бир йилдан сўнг ўзининг профессионал фаолиятидаги дебютини ўтказди ва 2016|2017 йиллар мавсумида CAF Конфедерация кубогида иштирок этди. «КCCА» клубидаги уч йиллик фаолиятида Окелло 112та учрашувда майдонга тушиб, 39та гол урди. Шундан кейин уни Шимолий Африканинг кўплаб гранд клублари, жумладан, Марокаш ва Мисрнинг бир нечта жамоалари нишонга олишди.

Айрим молиявий жиҳатдан жозибали таклифлар тушганига қарамай, ҳужумчи якунда Европада, хусусан, ёшлар академияси туфайли яхши обрўга эга бўлган Жазоирнинг «Paradou Athletic Club» спорт клубини танлади. Дарҳақиқат, 2019 йилда CAF Африка Миллатлар кубогини ютган Жазоир термасининг уч нафар вакили - Юсуф Атал, Ҳишам Боудауи («Ницца») ва Рами Бенсебаини («Боруссия Мёнхенгладбах») «Парадоу» чиғириғидан ўтишган. FIFA.com Уганданинг порлашга интилаётган юлдузи билан суҳбатни у нима учун айнан «Парадоу»ни танлаганини сўрашдан бошлади.

«Барча африкалик футболчилар сингари, орзуим Европада фаолият юритиш. Бироз бошқачароқ йўналишни танлашим мумкин эди, аммо «Парадоу АC» Жазоирдаги бошқа жамоаларга қараганда «кўҳна қитъа» клубларига кўпроқ футболчи сотмоқда. Бу хорижда ўзингизни танитиш учун ажойиб трамплин. Фақат сўнгги икки йил ичида клуб Европа томонларга уч нафар футболчисини сотиб юборди ва шунинг учун мен у ерга бориш учун ҳам навбатдаги ўйинчилар қаторида бўлишга астойдил ҳаракат қиламан».

Кўпгина инглиз тилида сўзлашувчилар сингари, Окелло ҳам араб ва француз тилларида сўзлашадиган мамлакатда қийинчиликларга дуч келди. «Жазоирга келганимда, менга қийин бўлди, чунки ўйин услубига мослашиб, тил тўсиғини енгиб ўтишим керак эди, - деди у. - Энди барчаси яхшиланиб бормоқда. Бир нечта сўзларни ўргандим ва жамоадошларим билан мулоқот қилишни бошладим. Дастлаб ўзимни таништира олмадим ва ҳеч нарсани тушунмадим. Ҳозир эса идеал вазиятдаман, чунки жамоанинг ажралмас қисмиман, ўзимни майдонда яхши ҳис қиляпман ва ўзимга бўлган ишончни кучайтира оламан. Жазоир чемпионати ҳақиқатан ҳам профессионалликка эга. Бу жуда тез ривожланиш имконини беради ва Европа футболига эшик очиши мумкин».

Уганда терма жамоасининг келажаги ҳам Океллоники каби истиқболли кўринади. «Крэйнзлар» ҳеч қачон жаҳон чемпионатига чиқа олмаган бўлишлари мумкин, аммо ҳеч бўлмаганда бу гал Мали, Кения ва Руанда каби ўртамиёналар билан ЖЧ-2022 саралаш гуруҳида ўзларини кўрсатишлари мумкин. «Жаҳон чемпионатига чиқиш ҳақида ўйлашдан олдин Африка чемпионати йўлланмасини ҳал қилиб олишимиз керак, - дейди Окелло. - Шундай экан, қитъа чемпионатидаги иштирокимизни таъминлаш учун астойдил ҳаракат қилишимиз ва шундан кейингина бор эътиборимизни жаҳон чемпионатига қаратишимиз мумкин. Шунга қарамай, барчамиз мундиал финал раундига чиқишни орзу қиламиз. Гуруҳимиздаги рақиблар кучли. Биз аллақачон Мали ва Руанда билан учрашганмиз ва уларнинг қанчалик кучга эга эканликларини биламиз, шунинг учун бу гуруҳдан чиқиш осон бўлмайди. Уганда учун яхши томони шундаки, гуруҳдаги рақибларнинг даражаси бир хил. Ушбу гуруҳ бизга жаҳон чемпионатига чиқиш учун яхши имконият беради.

Агар биз мундиал йўлланмасини қўлга киритсак, миллионлаб угандаликларни хурсанд қилган бўлардик. Биргаликда ушбу орзуни амалга ошириш учун қўлимиздан келганини қиламиз. Мен термадаги энг ёш ўйинчиларданман, таркибда савияли футболчилар кўп. Ўз мамлакатим номидан фахрланаман. Ҳамма фақат менга ишонади, деб айтмаган бўлардим, чунки биз бир жамоамиз. Агар астойдил ҳаракат қилсак ва ҳамма бир хил йўналишда ҳаракат қилса, мақсадларимизга эришамиз».

Океллодан унинг кумири кимлиги сўралганида ноанъанавий жавоб чиқмади: «Аслида бу Иньеста эди, аммо энди менга Месси кўпроқ ёқади. Бироқ фикримча, бугунги кунда энг яхши футболчи - бу Кевин Де Брюйне».

М.ПЎЛАТОВ тайёрлади.