Евро-2020 иштирокчи жамоалари таркибининг неча фоизи миллий чемпионат вакилларидан шакллантирилган? Бу борада Россия термаси энг «уйсимон» жамоалар қаторида. Уэльс термаси сафида эса миллий лигадан бирор вакил йўқ. Евро-2020 стартга чиққан бўлсада, иштирокчилар «заявкаси» бўйича таҳлил ишлари давом этмоқда. Gol.ru сайти бу сафар жамоалар ўз мамлакати миллий чемпионати футболчиларига қанчалик таянаётганига эътибор қаратди. Эслатиш керак, навбатдаги Европа чемпионати «заявкаси»га жами 622 нафар футболчи киритилган.

***    Англия термаси таркибида атиги 3 нафар легионер бор: Жейдон Санчо, Жуд Беллингем («Боруссия» Д.) ва Киран Триппьер («Атлетико»).

***    Россия термаси миллий лигага таяниш бўйича кучли 3таликда. Станислав Черчесов таркибга атиги 4 нафар легионер қўшди. Булар - Денис Черишев, Фёдор Кудряшов, Алексей Миранчук ва Александр Головин.

***    Испания термаси бош мураббийи Луис Энрике «заявка»га 24 нафар футболчи қўшиш билан чекланди (унинг рўйхатида «Реал»дан ҳеч ким йўқ).

***    Венгрия миллий жамоаси мамлакат лигасидан 12 нафар футболчи жалб қилди. Умуман олганда, венгрлар таркибида 10та мамлакат чемпионатидан вакил бор. Ҳаттоки, АҚШ, Кипр ва Туркия лигаларидан ҳам.

***    Польша термаси жароҳатланган Аркадиуш Милик ўрнини ҳеч ким билан тўлдирмади. Поль­яклар Европа чемпионатида Бундеслига-2, АҚШ, Украина ва Россия лигаларида ўйнайдиган легионерлар хизматидан фойдаланишлари мумкин.

***    Чехия термаси таркиби 8та мамлакат чемпионати вакилларидан шакллантирилди. Унда РПЛ иштирокчиси «Спартак»дан ҳам футболчи бор - Алекс Крал.

***    Уэльс термасида ўз миллий лигасидан БИРОР ФУТБОЛЧИ йўқ - бу Евро-2020даги ягона ҳолат. Қолаверса, уэльсликлар фақат 2та мамлакат (Англия ва Италия) чемпионати вакилларини чақиришган. Бу энг паст кўрсаткич. Англия лигаларида ўйнамайдиган ягона футболчи - бу Аарон Рэмзи («Ювентус»).

***    Словакия ва Финляндия жамоаларида ўз мамлакати чемпионатидан 1 нафардан ўйинчи бор - тегишлича Владимир Вайсс ва Даниэль О`Шонесси.

***    Финляндия термаси таркибни 15та мамлакат чемпионатидан чақирилган футболчилардан тузган. Бу энг юқори кўрсаткич. Финнларда АҚШ, Кипр, Шотландия, Греция, Польша лигаларида ўйнайдиган йигитлар бор. Словаклар таркиби 13та мамлакат чемпионати аралашмасидир.

***        Бельгия термаси таркибида Япония чемпионатидан ҳам вакил бор - «Виссел Кобе» ҳимоячиси Томас Вермален.