2008 йили «Сток Сити» уэльслик мураббий Тони Пьюлис қўл остида 23 йиллик танаффусдан кейин илк марта АПЛга чиқди. Ўшанда жамоага Чемпионшипда «Вест Бромвич»ни қувиб ўтиш учун атиги 2 очко етмаганди - «Сток» иккинчи ўринни эгаллади. Стаффордшир графлигидаги саноат шаҳарларидан бири ҳисобланган Сток-он-Трент аҳолиси бундан ортиқча ташвишланмади - асосийси, 1997 йилда қуриб битказилган «Британия Стэдиум» яна элита ўйинларини қабул қилиш ҳуқуқини қўлга киритганди. Бу аренага ташриф буюрадиган жамоаларни ҳақиқий синов кутиб турганди.

Тони Пьюлис мураббийлик фаолиятини 1990-йиллар аввалида бошлаган, «Борнмут»да Гарри Реднаппга ассистентлик қилганди. Уэльслик собиқ ҳимоячи «Сток»ка илк бор 2002 йилда ташриф буюрди - орадан уч йил ўтиб, Пьюлис раҳбарият билан келишолмай, клубни тарк этди, аммо президентлик постини Тони Коутсе эгаллагач, ортга қайтди. Пьюлисга футболчилар танловида эркинлик берилди ва тез орада «Сток» жадвалда юқорилай бошлади. Охир-оқибат, «лонгболл» ва жисмоний устунликка асосланган британча футболни қўллаган Пьюлис натижага эришди.

Тўғри, 2008 йилнинг ёзида «Сток»нинг ўйин қобилиятидан фақат Чемпионшипдагилар хабардор эдилар. Пьюлис АПЛдаги стартни «Болтон»га қарши баҳсдаги мағлубият (1:3) билан бошлади. «Сток» шу заҳоти элитани тарк этишга номзодлар рўйхатига киритилди: кўп сонли баланд бўйли футболчиларига таянган ҳолда, узун паслар билан ўйнайдиган тушунарсиз жамоа.

Таъкидлаш жоизки, Пьюлис қўл остидаги футболчиларнинг ўртача бўйи 184 см.ни ташкил этар, «заявка»да камида 190 см. бўйга эга 11 нафар ўйинчи (улар орасида фақат Томас Соренсен дарвозабон эди) номи қайд этилганди. Умумий статистикадаги чатишиш Лиам Лоуренс (бўйи 178 см.) сингари қанот футболчилари туфайли вужудга келар, уларнинг вазифаси оддий эди - тез югуриб, жарима майдонига узатма бериш. «Британия Стэдиум» деворлари ичида Пьюлис тузган таркиб ҳар қандай мудофаа чизиғи учун ҳақиқий даҳшатга айланарди.

«Сток Сити»нинг уйдаги учрашувларига стадионнинг ҳам таъсири бор эди. Арена 1997 йили қурилган бўлсада, эскича кўринишга эга. Иншоот ичкарисида шамол жуда кучли эсади. «Тоттенхэм» билан ўйинда Дэнни Хиггинботам пенальти тепишдан олдин тўпни уч марта нуқтага қайта қўйишга мажбур бўлди. Думалоқни шамол учириб кетаверди.

Умуман, «Британия Стэдиум»га сафар уюштириш АПЛ жамоалари учун ҳақиқий синовга айланиб қолди. Бу ерда «Эвертон» аранг (3:2) ғалаба қозонганди. Дэвид Мойес ўша учрашув ҳақида шундай деганди: «Бугун жуда ғалати кун бўлди. Янги футболчиларимизнинг кўпи инглизча гапирмайди, шу боис, бундай рақибга қарши қандай ўйнаш кераклигини уларга тушунтириш осон бўлмади».

Ирландиялик хавбек Рори Делап ўшанда 32 ёшда эди. У «Сток»дан аввал «Карлайл Юнайтед», «Дерби», «Саутгемптон» ва «Сандерленд»да ўйнаганди. Баъзан Ирландия термаси ўйинларида ҳам қатнашарди. Делап оддий қанот ярим ҳимоячиси бўлган - меҳнатсевар, аммо ортиқча техник қобилиятсиз. Тўғри, битта нюанс ҳам йўқ эмасди. Мактаб давридаёқ Рори ўз минтақасида найза улоқтириш бўйича чемпионликка эришганди. Узоқ вақт Делапнинг ўзига хос жиҳатларидан қандай фойдаланиш кераклигини билмасди. Тони Пьюлис эса уддалади.

Унинг кузатувларидан аниқ бўлдики, Делап «Дерби»да ўйнаган пайтларидаёқ аутдан тўпни жуда узоққа узатган - форвардлар Ванчопе ҳамда Кристи уни эгаллаб олишган. «Сток»даги машғулотлар пайти Пьюлис Делапдан сўради: «Тўпни тўғридан-тўғри жарима майдончасига улоқтира оласанми?». Футболчи «Албатта» дея жавоб қайтарди. У 30 ёки 40 метр узоқликка тўпни етказиб бера оларди, тўп эса ҳимоячиларга ноқулай траекторияда ҳаракатланарди - пастдан ва юқори, тахминан соатига 60 км. тезликда учарди. Пьюлис эндиликда «Сток» даҳшатли ва кутилмаган қуролга эга эканлигини тушунди.

«Челси»нинг ўша пайтдаги мураббийи Луис Фелипе Сколари «Британия Стэдиум»га сафар уюштириш чоғида «Сток» унда ёрқин таассурот қолдирганини алоҳида таъкидлаганди: «Эҳтимол, улар жозибали футболчи кўрсатишмас, аммо ҳаракатлари самарали чиқмоқда. Пьюлис ўз жамоаси имкониятларидан оқилона фойдаланмоқда. Менга ушбу мураббий ва «Сток Сити»нинг ўйин услуби ёқади, зеро у бошқаларникидан ажралиб туради. Делап? Ушбу футболчи тўпни оёғига нисбатан қўлида яхшироқ ўйнайди, бу шунчаки фантастика».

Қизиғи, Рори «Челси»га қарши баҳсни елкасидаги жароҳати сабаб ўтказиб юборди - «Сток» 0:2 кўринишшида ютқазди. Сўнгра Делап қайтди ва «Сток» ўз майдонида «Сандерленд», «Тоттенхэм» ва «Арсенал»дан устун келди. Мағлубиятдан кейин Арсен Венгер жиғибийрон бўлганди: «Бу футбол эмас, бу регби». «Канонирлар» дарвозасига урилган ҳар икки гол Рорининг аутни ижро этганидан сўнг амалга оширилганди. Венгер кейинроқ аутлардан бу тариқа фойдаланишни тақиқлашга уринди, FAга «Британия Стэдиум»даги майдон ҳолати бўйича шикоят йўллади. «Арсеннинг регби ҳақида айтганларини эшитиб, қувондим. Демак, биз ҳаммасини тўғри бажирибмиз», - дея эслаганди Пьюлис кейинчалик.

Шундан сўнг аксарият жамоалар Сток-он-Трентда меҳмон бўлишга алоҳида тайёргарлик кўришга одатланишди. Аммо «Мидлсбро»ни бошқарган Гарет Саутгейт бошқа бир муаммога йўлиқди: «Биз аутлар пайти тўғри ҳимояланишга уриндик. Лекин сафимизда Делап сингари тўпни узоқ масофага ирғита оладиганлар йўқ эди». Рорига ҳақиқий жангни «Халл Сити» эълон қилди – ўйинларнинг бирида дарвозабон Майхилл тўпни атайин аутга эмас, бурчак томонга чиқариб юборди. «Халл»нинг майдон четида машқ бажараётган захира ўйинчилари эса Делапга халал беришди - форвард Дин Виндасс ҳатто сариқ карточка ҳам олди. Чиндан ҳам, «Сток Сити»дан қўрқишаётганди.

Нафақат Рорининг аутларидан чўчишганди. Пьюлиснинг футболчилари жуда кўп фол ишлатишарди, кескин тўқнашувларга чиқишарди, ҳар гал рақибга жисмоний босим уюштиришарди. Энг ёрқин ва машҳур эпизодлардан бири 2010 йили «Арсенал»га қарши баҳсда кузатилган, Райан Шоукросс Аарон Рэмзининг оёғини синдирганди - бу воқеа «Сток Сити» ўйин услуби сабабли вужудга келганди.

АПЛдаги дебют мавсумида «Сток» 12-ўринни эгаллади. 45та очкодан 35тасини жамоа «Британия Стэдиум»да қўлга киритди. Чемпионшип ғолиби «Вест Бромвич» сўнгги поғонани эгаллади. Ушбу фактдан қувонган «Сток» мухлислари уларга хайрлашув қўшиғи куйлашди: «Лонгболл, сизлар лонгболл ўйнашингиз керак эди».

Пьюлис қўл остида «Сток» Премьер-лигага мустаҳкам жойлашди, ҳатто 2011 йили Англия кубоги финалигача етиб борди, Европа Лигаси йўлланмасини қўлга киритди. Шу вақт ичида «Сток» ўз услубини сақлаб қолди - 4-4-2 схемаси, кўпсонли юқоридан йўлланадиган узатмалар, басавлат футболчилар кўп ўтмай, 10 млн. фунтга Питер Краучнинг сотиб олиниши ҳам мантиқан тўғри бўлганди), кексаяётган Делап ижросидаги аутлар } агрессив футбол.

2010 йилнинг ноябрида шарҳловчи Энди Грей «Реал»га қарши баҳсда Лионель Мессининг ўйинига изоҳ бераркан, шундай деди: «Лео - ажойиб, лекин у Стокдаги совуқ ва ёмғирли оқшомда ҳам шундай қойилмақом ўйин кўрсата олармиди?». Бу сўзлар дарҳол мемларга сабаб бўлди, машҳурликка эришди. Стокдаги совуқ ва ёмғирли оқшом чидамлиликни синовдан ўтказишни англатарди. The Telegraph ҳатто, Грейнинг айтганларини энг барқарор иқтибослар рейтингида иккинчи ўринга жойлаганди.

Пьюлис бошчилигидаги «Сток Сити» эртаги 2013 йили якунланди - жамоа ўсишдан тўхтади, мураббий ўзаро келишувга кўра шартномани бузди, жамоани Марк Хьюзга топширди. Унинг қўл остида «Сток» регби эмас, кўпроқ футбол жамоасига ўхшарди. Шунга қарамай, «Британия Стэдиум» эгалари «регбичилар» тамғасидан қутула олишмади. «Сток» бир неча мавсумни муваффақиятли ўтказди ва 2018 йили аутсайдерлар сафига тушиб кетди.

Стокдаги совуқ ва ёмғирли оқшом ҳақидаги гаплар эса ҳамон «тирик» - Суперлига ғоясига қаршилик қилган «Арсенал» фанатлари мемни эслатувчи плакатлардан кўп фойдаланишди. Уч йил аввал Кевин Де Брюйне «Манчестер Сити» «Сток» устидан ғалабага эришганда (2:0), Энди Грейнинг «Твиттер»даги машҳур сўзларини ёдга олди.

Лионель Мессининг ўзи ҳам бир неча йилдан кейин журналист Гильем Балаге билан суҳбат чоғи Грейнинг саволига жавоб қайтарди: «Улар Росариода қандай майдонларда тўп сурганимни кўришмаган». Ўтган йилнинг ноябрида жамоаси билан «Штутгарт»ни мағлуб этган Томас Мюллер Стокдаги оқшом ҳақида гапирди: «Британиялик нима дейишарди? Стокдаги ёмғирли ва совуқ оқшомда ўзимизни кўрсатишимиз керакмиди? Бугун шамол бўлмади, қолаверса, Штутгарт бу Сток эмас, эҳтимол, уларнинг жамоаси яхшироқ бўлиши мумкин».

Умуман, Сток ибораси кўп янграйди - кўпчилик «ПСЖ» нима сабабдан Шупо Мотингни сотиб олганини тушунмаслигини таъкидлаган, ушбу футболчи эса мавсум-2017|2018да айнан «Сток Сити» шарафини ҳимоя қилганди. Ўтган йилги ЧЛ чорак финалида «Аталанта» дарвозасига урилган ғалаба голидан кейин Гари Линекер оммага маълум ва машҳур саволни такрорлади: «Шупо-Мотинг ғалаба голини урди. Бу ишни сешанба куни, совуқ ва ёмғирли Стокда ҳам амалга ошира олармиди?»

«Сток Сити» анчадан буён Чемпионшипда, аммо Тони Пьюлиснинг баҳайбатлар жамоаси ҳеч кимнинг эсидан чиқмаган. Тўғри, жамоанинг АПЛга қайтиши яна кечроққа сурилди. Пьюлиснинг ўзи «Сток»дан кейин «Кристал Пэлас», «Вест Бромвич», «Мидлсбро»да ишлади. Ўтган йили эса «Шеффилд Уэнсдей»ни тарк этди ва ҳозир ишсиз юрибди. Рори Делап эса 2013 йили фаолиятини якунлади.