Россия Премьер-лигасида еврофутболда ном қозонган ўйинчилар етарли. Яқинда мамлакат суперкубоги соҳибига айланган «Зенит»нинг бразилиялик ярим ҳимоячиси Малком шубҳасиз, чемпионатнинг бош юлдузлари қаторида. Малком Филипе Сильва де Оливейра (тўлиқ-исми шарифи) яқинда «СЭ» нашрига эксклюзив интервью бериб, бутун фаолият йўлига бирма-бир тўхталди.
Малком ўтган ҳафта Токио Олимпиадасида қатнашадиган Бразилия олимпия термаси ихтиёрига жўнаб кетди. Эслатма, 4 йилликнинг йирик мусобақаси футбол турнири 22 июль куни стартга чиқади.
- Малком, мана, 2 йилдан буён Россияда ўйнаяпсиз. Бу ерга келишдан олдин нималарни кутгандингиз? Умуман, қарорингиз ўзини оқладими?
- «Зенит» таклифини Европа Чемпионлар Лигасида мунтазам ўйнаш ва совринлар ютишни кўзлаган ҳолда қабул қилгандим. Тушунарлики, ҳеч бир футболчи жароҳатланишни истамайди. Афсуски, Россияга келгач, жароҳат ортидан нақ 5 ой майдондан четда қолдим - бу жуда аламли ва қайғули. Шукрки, буткул тикландим ва янги мавсумга ўзгача куч билан киришишни катта иштиёқ билан кутмоқдаман. Дастлаб «Зенит» билан тарих яратиш ва совринлар ютишни ўйлагандим. Биринчи мавсумда Россияда имкони бор барча совринларга эга чиққанимиздан хурсандман. 2019 йили «Барселона» сафида Испания чемпиони бўлгандим, Россияда ҳам олтин медаль қўлга киритиш анъанаси давом этди. Ишонаманки, янги мавсумда ҳам фақат бош соврин учун курашамиз.
- Ростини айтдинг, Россияга кўчиб ўтишдан олдин кўпроқ нималардан хавфсирагандингиз?
- Ҳеч нарсадан! Шунчаки, Питер клуби тарихининг бир қисмига айланиш ва янги саҳифа битишга ҳисса қўшиш ҳақида ўйладим. «Зенит» ва бразилияликлар ўртасида мустаҳкам алоқа шаклланганини жуда яхши билардим. Дейлик, Халк бу клубда кўплаб совринларни қўлга киритиб, ўз ўйини билан ёрқин из қолдирди. Хуллас, бу борада Халкка яқинлашиш, ҳаттоки, ундан ўзиб кетишни мўлжаллагандим. Оддий айтганда, ҳеч қандай қўрқув ёки таҳлика йўқ эди. «Зенит»га шунчаки, шартнома муддатини ўташ учун келмаганман. Мақсад - фақат ва фақат ғалаба қозониш. Бу ҳали ҳам ўз кучини йўқотмаган. Билишимча, «Зенит»да соврин ютиш бобида Халкдан ўзиб кетишга улгурибман. Энди ўйин бобида ҳам ўзимни янада яққолроқ намойиш этишим керак. Ниятим - клуб тарихидаги энг совриндор бразилиялик футболчи бўлиб қолиш.
- Таътил қандай ўтди?
- Ҳар доимгидек дўстларим ва оилам даврасида ҳордиқ чиқардим. Ахир узоқ вақт улардан айро юрдим, шунинг учун ҳар бир лаҳза ва имкониятдан унумли фойдаланишни хоҳладим. Таътилнинг бир қисми Бразилия олимпия терма жамоаси йиғинига тўғри келди - мириқиб ишладим. 10 кунлик йиғин - бу йўқотиш эмас, аксинча, янги дўстлар орттирдим.
- Сардор Азмун таътилда отлар билан шуғулланишни яхши кўради. Сизнинг севимли машғулотингиз нима?
- Аниқ бир хоббим йўқ. Шунчаки, дўстларим билан вақт ўтказиш, пляжда сайр қилиш, ўйнашни хуш кўраман. Бу сафар ҳам қадрдонлар билан пляжда соатлаб ўйнадик.
- Бразилия олимпия жамоаси йиғинида қатнашдингиз. Аввалига кенгайтирилган рўйхатга киритилдингиз, кейин чиқарилдингиз, якунда Токио-2020га борадиган бўлдингиз, барибир...
- Шубҳасиз, Олимпиада мамлакат номидан қатнашиш - шараф. Бу айниқса, мен каби ёши Олимпия чегарасидан ўтган ҳар қандай футболчи учун чинакам орзу ҳисобланади. Аммо орада «Зенит» йиғинларда жамоа билан бирга бўлишимни талаб қилди. Терма жамоага чақирув олганимда, клуб мураббийлари «Зенит» машғулотларида қатнашишим ва Россия суперкубоги учун баҳсдан кейингина Олимпиадага боришим мумкинлигини айтишди. Яъни клуб бу менинг орзум эканлигини тушунди ва қўйиб юборишга рози бўлди. Ҳа, бразилиялик спортчиман, лекин аввало, клуб футболчисиман. Шундай экан, қўйиб юборгани учун «Зенит»дан миннатдорман. Умид қиламанки, биз олимпия чемпиони унвонини муносиб ҳимоя қиламиз ва Санкт-Петербургга олтин медаль билан қайтаман.
- Бразилия термасида «Ред Булл Брагантино» ҳужумчиси Клаудиньо билан ўйнадингиз. Уни бўлажак жаҳон юлдузи сифатида таърифлашмоқда.
- Дарҳақиқат, Клаудиньо ажойиб футболчи, яхши йигит, менинг яқин дўстим. Ўта хотиржам футболчи, у билан суҳбатлашиш ёқимли. Менимча, Клаудиньо мавжуд фазилатларини тўлиқ юзага чиқара олса, яқин орада бутун дунёга танилади. Ўйлайманки, уни олдинда катта зафарлар кутмоқда.
- Клаудиньо билан битта клубда ўйнашни хоҳлармидингиз?
- Албатта, футболчилар ҳар доим энг кучли ижрочилар даврасида тўп суришни хоҳлашади. Клаудиньо айнан шундай футболчи. Агар у «Зенит»га келса, беҳад хурсанд бўлардим. Ишонаманки, бутун жамоа Клаудиньони илиқ кутиб олади. Айниқса, мен, Дуглас ва Вендел. У ҳар қандай клубга катта фойда келтира оладиган футболчи. Умуман, менинг клубимда бразилияликлар сафи қанча кенгайса, шунча яхши.
- «Барселона» вакиларидан ким биландир алоқани сақлаб қолганмисиз?
- Ҳа, кўпчилик билан. Масалан, Бускетс ва Коутиньо билан тез-тез гаплашиб тураман. Улар - яқин дўстларим ва кумирларим.
- ЧЛда «Барселона» билан учрашишни хоҳлармидингиз?
- Рақиб танлаш одатим йўқ. Қайси клуб билан тўқнаш келиш эмас, балки ўз ўйинимиз ҳақида ўйлашимиз керак. Хусусан, Чемпионлар Лигасида ўтган мавсумдагига нисбатан яхшироқ иштирок этишга интилиш мақсадга мувофиқ.
- Умуман, «Зенит»нинг гуруҳдан чиқиши учун нима керак?
- Фақат ўз кучимизга ишонсак, бас. Гуруҳдаги ҳар бир ўйинга ҳаёт-мамот сифатида қараш лозим.
- Кўпчилик учун Чемпионлар Лигаси ўйинлари кучли лигаларга ўтиш учун катта имконият саналади. Сиз учун ҳам шундайми?
- Йўқ, бу ҳақда умуман ўйламайман. «Зенит» футболчисиман ва фақат жамоага максимал наф келтириш йўлларини қидираман. «Зенит» тарихининг бир қисмига айланмоқчиман, бу ерга шунчаки келмаганлигимни исботламоқчиман. Аввало, ўзимга, кейин мухлисларга.
- Танқид сизни асабийлаштирадими ёки руҳлантиради? Хусусан, катта маош олишингизга боғлиқ қарашлар...
- Мотивация - мени пул ҳақида ўйлашга мажбурлайдиган ягона жиҳат. Ҳа, кўп пул оламан. Лекин бу ҳақда гапирадиганлар футболчилик нақадар мураккаб эканлигини ўйлаб ҳам кўришмайди.
- Евро-2020ни кузатдингизми, қайси жамоага мухлислик қилдингиз?
- Шунчаки, чиройли футбол томоша қилишни хоҳлайман. Турнир ўйинларини шу мақсадда кўрдим. Тўғри, Франция ва Испания термаларига бефарқ қарамадим, чунки ушбу мамлакатлар мен учун бегона эмас. Ҳар иккисидан финалга чиқишини кутгандим, бироқ...
- Янги мавсум учун мақсадлар қандай?
- «Зенит» мавсум-2019|2020даги натижасини такрорлаши керак. Ўшанда 3та турнирда ғолиб чиққандик - РПЛ, Россия кубоги ва суперкубогида. Шахсий мақсадга келсак, 10тадан кўп гол урсам, ёмон бўлмасди.
М.ПЎЛАТОВ тайёрлади
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20