Швециялик юлдуз Златан Ибрагимович жароҳатидан тузалиб, сафга қайтди ва дарҳол ўзига хос шоуларни бошлаб юборди...

«Лацио» билан ўйин пайти у бутсасининг ипларини боғлаш билан банд эди, лекин «Милан»нинг ҳужуми кескин тус олаётганини кўргач, ҳали ишини якунлашга улгурмай, жараёнга қўшилди ва Анте Ребичнинг узатмасини голга айлантирди. «Милан»нинг «Твиттер»даги саҳифасида ушбу ҳолат акс этган видеони бир сутка давомида 600 минг киши томоша қилди.

Шунингдек, мазкур учрашувда Златан можарога мойиллигини яна бир карра исботлади: ўйин охирида икки жамоа вакиллари ўртасида тортишув бошланиб кетди, Сарри эса қизил карточка ҳам олди.

Златан бунгача тўрт ой майдонга тушмаганди. Майда «Ювентус»га қарши баҳсда жароҳат олгани сабаб Еврони ҳам ўтказиб юборганди. Маълумот учун, швециялик 3 октябрда 40 ёшни қаршилайди. Ҳозиргача у 24та турли мавсумларда ўз ҳисобига гол ёздириб қўйган. Ажойиб!

Златан қайтганидан сўнг нима қилди? «Инс­таграм»даги саҳифасига фалсафий пост жойлаб, ҳаётни яна бир бор жониворлар олами билан солиштирди: «Фотосуратда кимнинг тезкор эканлигини аниқлаш мақсадида уюштирилган итлар ва гепард иштирокидаги пойгадаги ҳолат тасвирланган. Гепарднинг ўрнидан қимирламагани кўпчиликни ҳайрон қолдирди. Пойга координатори эса вазиятни қу­йидагича изоҳлади: «Баъзан энг яхши эканлигингни исботлаш – ҳақорат ҳисобланади. Бизнинг энг кучли эканлигимизни тушунишлари учун бошқалар даражасига тушишимиз шарт эмас. Яхшилаб тафаккур қилинг, кучингизни ўзингиз муносиб бўлган нарсалар учун тежанг. Гепард тезлигини фақат ов учун ишлатади, итларга ўзининг энг тезкор ва кучли эканлигини кўрсатиш учун эмас». Нималарга қодирлигингизни исботлаш учун беҳуда вақт сарфламанг».

А.АБДУВАЛИХЎЖАЕВ тайёрлади