Харви Эллиотт - 4 ёшидаёқ «Ливерпуль» мухлислари сафидан жой олган ва клуб афсонасига айланиш мақсадида тинмай изланаётган ноёб иқтидор соҳиби. У - Англия Лига кубоги (15 ёшу 174 кунлик) ва АПЛ (16 ёшу 30 кунлик)нинг энг ёш дебютанти. 17 ёшида эса «Блэкберн» таркибида тўп суриб, Чемпионшип грандлари додини берди. Мана, 18 ёшли вундеркинд жорий мавсумдан «Ливерпул»нинг асосий таркибига кириб, таниқли рақобатчиларига ўйин бермаяпти. Қандай қилиб? Эллиотт иқтидорининг ноёблиги ва сири нима? Йигитча айнан қайси сифатлари эвазига вақтдан ўзиб кетмоқда? Gol.ru сайти шу қизиқарли саволларга жавоб беришни лозим топиб, Эллиотт фаолиятини ёритишга қарор қилди.
2021 йил август. Харви орзусидаги жамоа ўйинида ўзи учун нотаниш позицияда майдонга тушганига қарамай, бор салоҳиятини ишга солди. Умуман, у қисқа вақт ичида ҳаммадан яхшироқ тайёргарлик кўрди. Йигитча АПЛ 2-туридан эътиборан «қизиллар»нинг бошланғич таркибида майдонга тушмоқда. Тьяго, Кейта ва Чемберлен рақобатда унга тенг келолмадилар. Одатда футболчиларнинг муайян мураббий услубига мослашишлари учун бир неча ой кетади. Эллиоттга эса Юрген Клопп талабига мос ўйинни йўлга қўйиб олиши учун мавсумолди тайёргарлигининг ўзи кифоя қилди. Харви чиндан ҳам, ўта ишончли ҳаракатланмоқда. У тўп билан кўп муомалада бўлади, суръатни оширади, ҳаттоки, шерикларига кўрсатма беришга ҳам журъат этади. Ҳимояда эса қатъий интизомга тўлиқ риоя қилади, қачон қаерда туришни яхши билади. Юрген Клопп табиийки, янги шогирдидан ғоят мамнун: «Ҳамма мен билан Харви хусусида гаплашишни истайди, буни тўғри тушунаман. 18 ёшли йигитчанинг тажрибали футболчидек етук ўйин кўрсатаётгани ҳаммани бирдек ҳайратга солмоқда. Лекин мен сира ажабланмаяпман. Чунки Эллиотт машғулотларда ҳам шундай. У айни пайт бемалол 95 дақиқа бир маромда ўйнай олади, бу жамоа учун жуда муҳим. Агар Харви айни спорт формасини йўқотмаса, тез орада бутун футбол оламини лол қолдиради».
Эллиотт янги мавсумдан эътиборан марказий ярим ҳимоячи позициясида ўйнамоқда. У бунга қадар доимо ҳужумкор футболчи сифатида гавдаланарди. Умуман, Харви турли нуқталарда тўп сура оларди, аммо асосан ўнг қанот вингери ролини бажарарди. Лекин марказий ҳимоя ҳудуди унга мутлақо бегона эди. Клопп эса йигитча айнан марказда кўпроқ манфаат келтиришини олдиндан кўра олди: «Харви жуда ёш ва ҳали кўп нарсаларни ўрганиши лозим. Мавсумолди йиғинларида ҳам асосан ўзи ўрганган орқа чизиқда ҳаракатланди. Лекин унинг янада фаолроқ бўлиши, тўп билан кўпроқ муомала қилишини истадик. Тўғриси, йигитчанинг ички потенциалини кўра олганим ўзимга ҳам ёқди». Янги юлдузча билан 5 йил ҳамкорлик қилган «Фулхэм»нинг ўйинчилар маҳоратини ошириш бўлими раҳбари Дэн Томас фикрларига эътибор қаратинг: «Ҳамиша Харвининг универсалликка мойил эканлиги яққол кўзга ташланарди. Унинг учун қанотларнинг фарқи йўқ эди. Шунингдек, ҳужумчилар ортида ёки «сохта тўққизлик» позициясида ҳам ишончли ўйнарди. Ўзининг ёқтирган юмуши - ўнг қанотдан олға интилиш. Чунки тўпни чап оёғида яхши назорат қилади. Лекин тан олишим керак, уни ҳозир «Ливерпуль» қўллаган позицияда сира синаб кўрмагандик». Эллиоттнинг ўзи бу борада нима дейди? «Янги позицияга мослашишда қийналганим рост. Ўйин давомида қачон қаерда бўлиш, қайси паллада суръатни ошириш, тўпни кимга оширишни аниқ билишим талаб этиларди. Ҳимояда ҳам шундай. Муҳими, янги роль ўзимга ёқиб қолди. Айниқса, жамоадошларимни тўп билан тез-тез таъминлаш. Юрген Клопп ва унинг ёрдамчиси Пеп Линдерс эмин-эркин тўп суришимни уқтиришмоқда. Албатта, тактикадан четга чиқмаган ҳолда. Асосийси, тўпни эгаллагач, ўзимни кўрсатиш имкониятига эгаман, мураббийлар бунга монеълик қилишмаяпти» - демак, йигитчанинг ҳали янада ўсишини тахмин қилиш мумкин.
Эллиотт «Блэкберн»дан қайтгач, 6 ҳафталик таътил олганди. Бироқ атиги 2 ҳафталик ҳордиқ билан кифояланди, қолган вақтни ёшлар жамоасида шуғулланишга сарфлади (бу пайт «Ливерпул»нинг асосий футболчилари таътилдан ҳали қайтишмаганди). Орадан атиги 1 ой ўтгач эса, «қизиллар» у билан 2026 йилгача мўлжалланган янги шартномани расмийлаштиришди. Ёш футболчи асосий жамоа машғулотларида қатнашгани ҳолда, ёшлар сафида тўп сурган дастлабки мавсуми ҳақида тўлқинланиб гапиради: «Айниқса, Милнер катта ёрдам берди. Футболда у каби узоқ вақт қолишни истайман. Милнер ва Хендерсонни чинакам профессионал сифатида таърифлайман. Улар яхши ўйнаш эмас, жамоадошлари салоҳиятидан кўпроқ фойдаланиш ҳақида бош қотирадилар. Залда эса кўпроқ Муҳаммад Салоҳ ва Садио Мане билан бирга шуғулланаман. Мо - қирол! Машғулотларда унга қарши тўп суриб, кўп нарса ўргандим».
2020 йил октябрь. «Блэкберн» Эллиоттни ўтган мавсум Чемпионшип старти арафасида ижара асосида олганди. Йигитча эса бирданига асосий таркибдан жой олиб, 2-турдаёқ 1тадан гол ва самарали узатмага муаллифлик қилди. Шу тариқа Харви мавсум якунига қадар ўз номига 7та гол ва 11та самарали узатма ёзиб қўйди. Чемпионшипда фақат 3 нафар футболчи ундан кўпроқ голга ассистентлик қилди. Бундан ташқари, Эллиотт топ-чемпионатларда ўйнайдиган 18 ёшдан кичик футболчилар орасида энг яхши тўпурар бўлди. The Atheltic нашри Харвининг «Блэкберн»даги ўйинига ажойиб изоҳ берганди: «У тўпни эгаллаган вақти ақлга сиғмас даражада ҳаракатланади. Харви одатда рақибини тезлик ёки куч эвазига енгишни ўйламайди, шунчаки, кескинликни оширадиган узатма йўлини қидиради. У шундай ўйинга ихтисослашган».Эллиоттда тўпни қабул қилиш учун энг қулай ҳудудни танлаш қобилияти ҳам зўр. Кўпинча марказий ҳимоячи позициясигача ортга қайтади. Кейин тезкорлик билан ҳужумни ривожлантиради ва қулай вазият ҳосил қилган жамоадошини тўп билан таъминлайди. Баъзан сал худбинлик билан ўйнаса, янада яхши бўларди. Чунки ўзи қулай вазиятда турганида ҳам, тўпни шерикларига оширишни маъқул кўради. Буни «Ливерпуль» мураббийлари ҳам аллақачон сезишган.
2019 йил сентябрь. 16 ёшли Харви «Ливерпуль» машғулотида илк марта иштирок этди. Пеп Линдерс ўша кунни алоҳида хотирлайди: «Юрген билан Харвини роса муҳокама қилгандик. У ўз маҳорати билан лол қолдирганди. Ваҳоланки, 16 ёшли ўсмир Муҳаммад Салоҳ ва Садио Мане каби юлдузлар ёнида ўзини бироз йўқотиб қўйганди. Муҳими, Харви тезда ўзини ўнглаб, бизни довдиратиб ҳам қўйди. У шунчалик ишончли ҳаракатландики, худди 30 ёшга яқинлашиб қолган ўйинчидек тасаввур уйғотди. Харви - митти жавоҳиримиз».
Дарвоқе, ўша дастлабки машғулотдан 2 ой олдин Эллиотт ва унинг оила аъзоларини «Сантьяго Бернабеу»га таклиф этишганди. «Реал» ёш иқтидор соҳибини Серхио Рамос билан учраштириш орқали ўз томонига оғдиришни кўзлаганди. Бироқ Харви буюк юлдуз билан учрашишни истамади. Маълум бўлишича, у Киевда бўлган ЧЛ финалини стадионда кузатган ва Салоҳга ишлатган ғирромлигидан кейин Серхиони ёмон кўриб қолган экан.
2018 йил. 15 ёшли Эллиотт «Фулхэм» ёшлар жамоасида муваффақиятли тўп суриб, асосий таркиб машғулотларига қўшилди. «Миллуол»га қарши кубок беллашувида эса ўз ёши тоифасидаги барча рекордларни янгилади. Харви ўйинлардан сўнг уйига қайтар, эрталаб мактабга, у ердан 12-16 ёшлилар гуруҳи машғулотига йўл оларди. Лекин «Фулхэм» мураббийи Славиша Йокановичнинг айтишича, болакай бирор марта «чарчадим» иборасини ишлатмаган: «Балки инглиз тилида нотўғри ифодалаётгандирман, аммо Харви ижобий маънода «такаббур». Ўзи ёш бола бўла туриб, худди катталардек тўп сурарди. Гўё, «Кўриб қўйинглар, жуда яхши ўйинчиман» қабилида...».
2016 йил. 13 ёшли Харвининг жисмоний ҳолатидан қониқмаган Дэн Томас бу ҳақда отасини огоҳлантирган ва у ўғли учун хусусий мураббий ёллаганди. Таътил пайти болакай ўша мураббий раҳбарлигида шуғулланиб, тезлик, чидамлилик ва суръат бобида ижобий ўзгаришларга эришди. Академияга қайтганида, ҳатто устозлари ҳам ҳайратда қолишди.
2015 йил. Дэн Томас 12 ёшли Эллиоттга тўғри йўлни кўрсатганди: «Харвининг дастлабки машғулотини яхши эслайман. Унинг тўп билан муомаласи, алдамчи ҳаракатлари фантастикадан қолишмасди. Ўзи нозик ва жисмонан анча заиф бўлсада, ўйинни яхши тушунарди. Лекин кўзга ташланмасди. Уни фақат биз - мураббийлар кўриб турардик».
2013 йил. 10 ёшли Харвига «КПР»да Скотт Чикелдей устозлик қилган: «Илк бор кўрганимда, болакай чап қанот ҳимоясида ўйнарди. У майдондаги энг ношуд боладек кўринганди, чунки бошқаларга нисбатан 1 ёш кичик эди. Кейин Харвини менга тавсия этишди. Аввалига ювошгина болада эътиборга лойиқ бирор жиҳатни пайқамадим ва академия менежерига уни ўз тенгдошлари гуруҳига қайтаришни сўрадим. Менежер эса Харвини машғулот пайти кўришни тавсия этди. Эртасига базага келсам, болакай аллақачон машқ қилишни бошлаб юборган экан, унинг тўп билан муомаласини кўриб, ҳайратдан қотиб қолдим: «Шундай иқтидор нега ҳимояда ўйнаяпти?» Ундан катта майдонда ҳам ўйнай олиши ҳақида сўраганимда, шунга ҳаракат қилаётгани, қояларга чиқиб-тушиш, спринт билан шуғулланиш орқали жисмоний қувват ва чидамлиликни ошираётганини айтганди...»
Хуллас, Харви Эллиотт аввало отаси, кейин Скотт Чикелдей, Дэн Томас каби мураббийлар саъй-ҳаракатлари туфайли шу мақомга кўтарилди. Энди навбат - малака ва фидойилик бобида улардан қолишмайдиган Юрген Клоппга.
МУҲАММАДСОДИҚ тайёрлади
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20