Transfermarkt портали «А» серия футболчилари трансфер баҳосини янгилаб чиқди. Диққатга сазовор томони, трансфер суммаси бўйича энг катта ўсишга эришганлар орасида «Рома»даги ҳамюртимиз Элдор Шомуродов 5-ўринда қайд этилди. Ҳамюртимизга белгиланган баҳо 7 миллиондан 14 миллион еврога кўтарилди. Умуман, бу ўзбек футболи учун рекорд кўрсаткичдир. Transfermarkt портали Шомуродовга қуйидагича изоҳ берди: «Рома» томонидан 17,5 миллион еврога харид қилинган ўзбек ҳужумчиси ўзига билдирилган ишончни оқламоқда. У Тэмми Абрахамнинг асосий ўринбосари - «жокер» ролини муносиб уддалаб, «бўрилар» ҳужумини кучайтирди. Шу омиллар Шомуродов трансфер суммасини икки баробар ошишига хизмат қилди».

- «А» сериянинг энг қимматбаҳо футболчиси - Лаутаро Мартинес («Интер»). Аргентиналик ҳужумчининг трансфер суммаси 80 миллион еврога тенг.

- Маттейс де Лигт («Ювентус»)нинг баҳоси 5 миллион арзонлашганига қарамай, у 2-ўринда - 75 миллион евро.

- Кучли учликда «Ювентус»нинг яна бир вакили Федерико Кьеза бор - 70 миллион евро.

- «Рома»нинг энг қимматбаҳо футболчиси - Лоренцо Пеллегрини (45 миллион евро). 

- «А» серияда трансфер баҳоси бўйича энг катта ўсиш қайд этган футболчи - «Милан» вакили Фикайо Томори. Унинг баҳосига 12 миллион қўшилди.

- Нархи энг кўп тушган футболчилар рейтингининг 1-ўрни «Ювентус» дарвозабони Войцех Шеснига берилди: -10 миллион евро.

Дарвоқе...

Элдор Шомуродов ўтган ҳафта «Ўйинчоқлар куни» муносабати билан ташкил этилган хайрия акцияси дои­расида Римдаги шифохонага борди ва бемор болакайлар билан учрашиб, уларга совғалар улашди.