Испания чемпионатида яна бир Стоичков гол урмоқда. Йўқ, бу футболчи «Барселона» ҳаётида ёрқин из қолдирган болгариялик ўша машҳур Христо Стоичковга қандайдир қариндошлик риштаси билан боғланган эмас. Шунчаки, унинг отаси вақтида Христони шахсий барида учратиб, ўғлига шундай исм қўйишини айтган.
Гап аввалги мавсум Ла Лигадан тушиб кетган «Эйбар» ҳужумчиси ҳақида кетмоқда. Муҳими, камтарин жамоа дарҳол яна юқорига қайтиш ҳаракатини бошлади. Аниқроқ айтсак, «Эйбар» 21та учрашувда 39 очко тўплаган ҳолда, Сегунда турнир жадвалида 2-ўринни эгаллаб турибди. Бу муваффақиятда 28 ёшли ҳужумчи Стоичковнинг ҳиссаси катта - у жорий мавсум 11та гол ва 2та самарали узатма тўплашга улгурди. Қуйидаги мақола шу йигит ҳақида.
Хуллас, Стоичков жорий мавсум Сегунда ўйинларида самарали ҳаракатлари билан «Эйбар»га нақ 18 очко келтирди. Таниш фамилия? Ҳа, вақтида болгариялик Христо Стоичков «Барселона» сафида порлаган ва ҳаттоки, «Олтин тўп» совринини қўлга киритганди. Аммо «Эйбар»да ўзини кўрсата бошлаган Стоичков ва Болгария футболи афсонаси ўртасида ҳеч қандай алоқа йўқ. «Эйбар» вакилининг асл исм-шарифи - Хуан Диего Молина Мартинес. Стоичков эса «Барселона»га мухлислик қилувчи отаси томонидан тахаллус сифатида берилган иккинчи ном. У Диего Мартинес туғилишидан олдин Барселонадаги барлардан бирига эгалик қилган, ҳаттоки, муассаса биносини «Барса»нинг расмий ранглари билан безаган. Дўстларининг айтишларича, у бутун умри давомида «Барселона» футболчиларидан бири шахсий барида меҳмон бўлишини орзу қилган. Қарангки, бу орзуси 1992 йили амалга ошган - Христо Стоичков унинг барига кирган. Ўша куни бахтиёр мухлис ҳаммага ваъда берган: «Агар ўғилчали бўлсам, унинг исми тайёр - Христо».
«Барса» фанати кейинчалик Сан-Роке (Кадис провинциясидаги кичик шаҳарча)га кўчиб ўтади ва 1 йилдан сўнг ўғилчали бўлиб, чақалоққа Христо ёки Стоичков номини расмийлаштиришни ўйлайди. Аммо турмуш ўртоғи ҳар икки вариантга мутлақо қарши чиқади. У ҳаттоки, эрига таҳдид ҳам солади: «Агар ўғлимизга Диего деб исм қўймасанг, сен билан яшамайман, ажрашаман». Натижада ота Диего вариантини қабул қилишдан бошқа чора тополмайди.
Мана, Диего Мартинес улғайиб, профессионал футболчига айланди ва отасининг ҳурматидан Стоичков тахаллусини олди.
Энди Хуан Диего Молина Мартинес ёхуд Стоичковнинг бу борадаги фикрларига эътибор қаратинг:
- Асл исмим - Диего. Лекин фақат онам ва қаллиғим учун шундай. Отам ҳам, унинг дўстлари ҳам менга ҳар доим Христо дея мурожаат қилишади. Бу ҳолат мени асло ташвишга солмайди. Фақат битта нарсадан бироз чўчийман - отам асл исмимни унутиб қўймаса, бас.
- «Мальорка» сафига қўшилганимда, жамоа физиотерапевтининг мени Христо Стоичков ўғли сифатида кўришини сезиб қолдим. Билишимча, атрофидагилар уни шунчаки, алдашган. Бу ҳазилни қўллаб-қувватладим ва физиотерапевтга вақти келса, уни отам билан таништириб қўйишимни айтдим. Менимча, у ҳақиқатни билгач, бироз ранжиди.
- Тўғриси, исмим ҳақидаги саволлардан чарчадим. Ҳеч қачон Христо билан таққослаш имконини берадиган муваффақиятларга эришиш ҳақида гапирмаганман. Фақат отам ҳурмати Стоичков тахаллусини олиб юраман. Менинг бор ҳақиқатим - шу.
- Қизиқ лаҳза: ўйинлардан бирида рақибга «подкат» усулини қўлладим, у шунда мени ҳақоратлади: «Бадбашара». Кейин жамоадошларидан бири югуриб келиб, унга танбеҳ берди: «Эй, эшакча, бу ахир Христо Стоичковнинг қариндоши-ку». Бунга шунчаки, бош ирғаб қўйдим, кейин кийиниш хонасига киргач, қаҳ-қаҳа отиб, кулиб юбордим.
- Ўзим Христо Стоичков билан ҳеч қачон учрашмаганман. Лекин у билан кўришиб, отамни қайтадан таништиришни хоҳлардим. Бу унинг ҳаётидаги энг бахтли кун бўлишига шубҳам йўқ.
- Биламан, «Мальорка маъмурлари футболкам ортига «Стоичков» ёзувини тушириш жараёнида роса кулишган. Тўғриси, айнан шу клубда исмимга нисбатан жуда кўп истеҳзоларни ҳис қилгандим.
А.АҲМЕДОВ тайёрлади
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20