-  «Бани Яс» БАА чемпионатида ўртамиёналардан бири эканлиги билан бошлаймиз. Клуб тахминан 10 йилда бир бора яхши мавсум ўтказиб, ОЧЛга чиқади, бироқ кейин муваффақиятсизлик бошланади. «Бани Яс» айни пайт турнир жадвалининг 6-поғонасида бормоқда, 5-ўриндаги иштирокчидан 5 очко ортда қолган ҳолда. Боз устига, уни 11-ўриндаги клубдан атиги 3 очко ажратиб турибди.
Бироқ айни шу ҳолат чалғитмаслиги керак. Одатда БАА клублари бир мавсумда икки ёки уч турнирга эътибор қаратишга ўрганмаган. Бошқача айтганда, муайян жамоанинг чемпионатда ишлари унча юришмаса, у бор кучини кўпинча БАА Президенти кубоги ёки ОЧЛга ташлайди. Ёки аксинча. Мисол учун, «Ал-Жазира»да шундай бўлганди - клуб камида 2 марта ички турнирлар йўлида ОЧЛни қурбон қилган.

«Бани Яс» Президент кубогида ярим финалга чиқиб улгурди ва ўз юришини давом эттиришни истаса керак. Шундай экан, катта эҳтимолки, клуб кубок турнири (ғалаба кейинги мавсум ОЧЛда ўйнаш ҳуқуқини беради) йўлида чемпионатни қурбон қилади. Шу жойда савол туғилади: «Бани Яс» ОЧЛни ҳам қурбон қиладими ёки аксинча, бор кучини қитъа турнирига ташлайди? Ўйлайманки, жамоа иккинчи вариантни танлайди ва «На-саф»да енгил ўйин бўлмайди. Шунинг учун Ўзбекистон кубоги эгасининг бу қарама-қаршиликдаги имкониятини 50га 50 кўринишида баҳолаш керак. «Бани Яс» ҳисобидаги 50 фоизда эса уй майдони факторининг улуши катта. Гарчи Абу-Даби Амирлигидаги кичик шаҳарча жамоасида мухлислари жуда кам бўлсада...

***

- Дарвоқе, «В» гуруҳида «Ал-Жазира» ва «Мумбай Сити»нинг йўллари туташганига эътибор қаратинг. Абу-Даби клуби президенти - шайх Мансур бин Зайд ал Наҳиён City Football Group асосчиси ҳисобланади. «Мумбай Сити» эса шу гуруҳга киради. Айтганча, City Football Group яна ОЧЛнинг жорий мавсумида ўйнайдиган «Мельбурн Сити» ва «Йокагама Маринос»га ҳам эгалик қилади, фақат улар «Шарқ» минтақасида. УЕФАда бундай ҳолат дарҳол реакция келтириб чиқарарди. Дейлик, ЧЛга бирданига 2та «Ред Булл» - Зальцбург ва Лейпцигники чиққанида шундай бўлганди. Якунда «Ред Булл» компанияси Зальцбург клуби тузилмасига ўзгартириш киритиш ва унинг соҳиблигидан воз кечишга мажбур бўлганди. Боз устига, ЦСКА ва «Челси» ЧЛнинг битта гуруҳига тушганидаёқ УЕФАда суриштирув ишлари олиб борилган. Ўша ҳолатда Роман Абрамовичнинг «Сибнефть» билан тузилган ҳомийлик шартномаси орқали ЦСКА раҳбариятига эҳтимолий таъсири ўрганилган. ОФКда эса ҳозирча бўлажак ОЧЛда клубларнинг эҳтимолий манфаатлар можаросига муносабат билдирилмаяпти.

А.НИКИМБАЕВ, «Футболиум»