Туркияда машғулот олиб бориш жамоа учун яхши. Клубнинг эса, биринчи навбатда, футболчиларни ПФЛ рўйхатидан ўтказиш ҳақида ўйлаши тўғрироқ. Чунки трансферлар ойнаси якунига оз қолди. Ҳозирча чемпионат учун фақатгина «Динамо» ва «Металлург» ўз футболчиларини рўйхатдан ўтказди. «Бун­ёдкор», АГМК, «Нефтчи», «Навбаҳор» эса шартномаларнигина тақдим этган, холос. Бу клублар футболчилар хориждан қайтиши билан уларни тиббий кўрикдан ўтказиши керак. Вақт тиғизлигини ҳисобга олсак, навбат масаласи катта саҳнага чиқади. Суперлига клублари орасидан энг оғир ҳолат «Сурхон»­да, бизда хавотир мавжуд. Янги ҳомийлар катта ишни бошлашга тайёр, аммо амалдагилар билан келишиш чўзиляпти. Уларда асосий масала жамоа келажаги эмас, вазиятдан чиқиб кетишга интилиш бўлиб кўриняпти.

***

- Футболчиларни рўйхатдан ўтказиш масаласида 3та клубда ФИФА тақиқи бор: «Андижон», «Бухоро», «Насаф». Қарши жамоасида муаммо нисбатан камроқ. Чунки «Насаф»нинг асосий футболчилари бир неча йиллик шартномага эга, улар билан янги мавсумни бошлаб олиш мумкин. Аммо янгиларни рўйхатдан ўтказиш учун ФИФА тақиқи олиниши керак. Клуб ҳаракатда. Янгилар рўйхатдан ўтишмаса, Бердиевга осон бўлмаслиги катта эҳтимол: Суперлига кучаймоқда.

«Бухоро» ҳам ҳаракатда. Биздаги маълумотга кўра, муаммоли бўлиб турган тожикистонлик уч футболчидан икки нафари билан келишувга эришилган. Яна бирининг масаласи қолган. Шунингдек, «Бухоро»нинг яна бир қарзи мавжудки, у тўлаб берилмагунича, биз клубнинг хорижлик персоналларини рўйхатдан ўтказмаймиз. Ишонамизки, бухороликлар вазиятдан чиқишга улгуришади.

***

- «Қизилқум», «Қўқон-1912», «Олимпик», «Нефтчи» ва «Сурхон» мавсумнинг қатор турларини ўз аренасида ўтказолмайди. Айрим кишилар мазкур ҳолатни турлича талқин қилаётганидан келиб чиқиб, масалага аниқлик киритиб ўтамиз. Биз клубларга 1,5 йилдан буён қўйиб келинаётган талаб бўйи­ча иш кўрмоқдамиз. Шу асосда прожекторларни белгиланган меъёрга олиб келмагани учун икки клубга уй учрашувларини ўтказиш бўйича тақиқ қўйилган.

«Қўқон-1912» бу борада аллақачон иш бошлаган. Катта эҳтимол билан апрель ойи ўрталарига бориб, жамоа ўз стадионига қайтиши мумкин. Ҳаммаси иш қачон ҳал этилишига боғлиқ. «Сурхон» билан боғлиқ ҳолат ижобий бартараф этилса, янги инвесторлар клуб стадионини қайта таъмирдан чиқаришни режалаштиришган. «Қизилқум»да ўзгаришлар катта. Навоий Кон-металлургия комбинати жамоа учрашувларини ўтказувчи стадионни яхши кўринишга келтиришни мақсад қилган. «Нефтчи» стадион майсасини яхшилаш ишларини аллақачон бошлаб юборган. Биз тахминан сентябрь ойларига бориб «Истиқлол» стадиони газони «Навбаҳор» стадионидаги каби бўлганини кўришимиз катта эҳтимол. «Олимпик»да ҳам шундай вазият. «Жар» стадиони майсасини алмаштириш, прожекторларини яхшилаш ишлари давом этмоқда.

Кўриб турганингиздек, икки қадам олдинга юриш учун бир қадам ортга ташлашимиз керак. Муҳими, ҳаммаси яхшиликка. Стадионлар бўйича янги низомни март-апрель ойларига тайёр қилсак, 2023 йилги мавсумда яна бошқа стадионлар майсаси ҳам яхшиланади. Шунинг учун ҳам ҳозирги принциплар керак.

***

- Тақвим масаласида саволлар келиб тушяпти. Ўйинларнинг шанба ва якшанба кунларига тўғри келмаётгани кучли бешлик билан боғлиқ. Май сўнгига қадар «Спорт-ТВ» ва «УзРепорт» кучли бешлик учрашувларини трансляция қилади. Айнан ўша вақт биз Суперлига учрашувларини ўтказсак, ТВ дастурлар, мухлислар эътибори, реклама берувчилар каби масалаларда ютқазиб қўямиз. Учрашувлар бегим кунлари ўтаётган бўлса-да, ўйинлар иш вақтига тўғри келмайди. Биз шундай босқичга етиб келдикки, энди прожектори йўқ стадионларда Суперлига учрашувлари ўтказилмайди. Шундан келиб чиқиб, учрашувларни соат 18:00дан эрта бошлаш ниятида эмасмиз. Биз фақатгина халқаро тақвим мажбур қилган ҳолатдагина, шунингдек, июнь, июль, август ойларидагина учрашувларни шанба-якшанба кунларига белгилашга ҳаракат қиламиз.