Ўзбек футболи 110 йиллигини нишонламоқда. Шу ўтган давр мобайнида бу спорт тури мамлакатимизда тараққий топиб, кўплаб мухлислар орттирди. Айниқса, ХХ асрдаги ютуқларни мамнуният билан эътироф этиш жоиз. Махсус мухбиримизнинг Қашқадарё вилояти футбол ассосацияси биринчи вице-президенти Шуҳрат Игамбердиев билан суҳбати шу мавзуни ҳам ўз ичига олди.

- Шуҳрат Неъматович, ўзбек футболи, хусусан, Қашқадарё ушбу спорт турига ошно бўлган йилларни қандай эслайсиз?

- Ҳар бир соҳанинг тарихи бўлгани сингари, вилоят футболининг ҳам босиб ўтган шонли йўли бор. Бу асосан ХХ асрнинг 40-50-йилларига бориб тақалади. Қарши, Шаҳрисабз шаҳарларида кўча, маҳалла жамоалари пайдо бўлди, иккинчи жаҳон урушидан сўнг биргина вилоят марказида «Сокол», «Автомобилист», «Локомотив», «Буревестник» номли жамоаларга асос солинди. Шаҳар ва вилоят миқёсидаги мусобақаларда асосан ана шу жамоалар бўй кўрсатди. 1970 йилларда Қарши шаҳридаги «Меҳнат» стадионида таъмирлаш ишлари амалга оширилди, жамоаларимиз иштирокига мухлислар қизиқиши янада ортди. Ўша йилнинг кузида «Динамо» (Минск) клуби ва Қарши терма жамоаси ўртасидаги ўртоқлик учрашуви шаҳарга катта футбол ҳавосини олиб келди.

- Мустақиллик спортга, жумладан, футболга бўлган муносабатни тубдан ўзгартирди...

- Тўғри. Футболга давлат даражасида эътибор берилиши хорижлик мутахассислар томонидан ҳам алоҳида эътироф этилган. 1997 йилда «Насаф» жамоасининг Ўзбекистон миллий чемпионатида иштирок этиши, Қарши шаҳридаги «Меҳнат» стадионининг қайта таъмирланиши, «Машъал», «Шўртан» жамоаларининг республика биринчилигидаги иштирокини мамнуният билан таъкидлаймиз. Вилоятимизнинг шаҳар ва туманларида ҳам стадионлар барпо этилиб, футбол жамоалари шакллантирилди, бир йўла 3 жамоамизнинг олий лига баҳсларида иштирок этиши таъминланди. «Насаф», «Машъал», «Шўртан» ўз инфратузилмасига эга бўлди. Махсус футбол мактаблари иқтидорли ёшларни камол топтирди.

- Вилоятдаги жамоаларнинг имкониятлари ҳақида фикрингиз қандай?

- Воҳамиз етакчиси - «Насаф» бу йил уч фронтда кураш олиб боради, жамоа ўз олдига юксак мақсадларни қўйган. Про лига вакиллари - «Машъал», «Шўртан» ҳам бу йил Суперлигага қайтиш ниятида. «Насаф»нинг фарм клуби Биринчи лигада омадини синаб кўрса, Иккинчи лигада вилоятимизнинг йигирмата жамоаси қатнашади. Бундан ташқари, «Насаф» ва «Севинч» жамоаларининг бирлаштирилганлиги туфайли аёллар жамоамиз ҳам чемпионлик ва кубокка эришишни мақсад қилган. «Насаф» футзал жамоамиз эса таркибини иқтидорли ўйинчилар билан мустаҳкамлаш эвазига юқори ўринларни кўзламоқда. Соҳил футболи бўйича ҳам вилоятимизда ибратли тажриба тўпланган. 2021 йилги республика чемпионатида «Адолат» (Қарши) жамоамиз чемпионлик шоҳсупасига кўтарилди. 2022 йилда соҳил футболи бўйича вилоят чемпионатини ташкиллаштирамиз, унда 12та жамоа иштирок этади. Мактабгача таълим муассасаларининг футбол фестивали ўтказилади. Спорт, футбол мактаблари олимпия захиралари коллежи, футбол интернати, футбол маҳорат мактаби тарбияланувчилари ўртасида беллашувлар бошлаб юборилди. U-12, U-14, U-16 ёш тоифалари, қизлар жамоаларининг вилоят биринчилиги, кубок баҳслари янги иқтидорларни кашф қиляпти. Олий ўқув юртлари талабалари, МФЙ, корхона, муассаса, ташкилотлар ўртасидаги мусобақалар ҳам мунтазамлик касб этмоқда. Ҳаваскорлар футбол лигаси, фахрийлар жамоаларининг ўйинлари ҳам юқори савияда ташкил этилмоқда.

- 2022 йил 25 майдан 10 июнгача Қарши шаҳрида U-23 терма жамоалари ўртасида Осиё кубоги финал босқичи гуруҳ ўйинлари ўтказилади. Бундай миқёсдаги турнир мезбонлиги айнан Қаршига берилгани бежиз эмас.

- Албатта, бу каби нуфузли мусобақага мезбонлик қилишимиз катта воқеа, ўйинлар кўтаринки руҳда ўтишидан умидвормиз. Бунинг учун пухта тараддуд кўрилмоқда. Меҳмонларни кутиб олиш, уларни жойлаштириш, бўш вақтларини мазмунли ўтказиш бўйича тадбирлар режаси белгиланган. «Марказий» стадиони ҳар томонлама тайёрланмоқда, таъмирлаш ишлари ниҳоясига етказиляпти. «Геолог», «Меҳнатчи» ареналари ҳам мавсумга шайланмоқда. Вилоят марказидаги «Ҳаёт», «Оқсарой», «Афросиёб», «Грант», «Сарбон», «Буюк карвон», «Ҳисор», «Султон», «Қарши» меҳмонхоналари жаҳон андозаларига мос ҳолда жиҳозланмоқда. Бу борада вилоят ҳокими, вилоят футбол ассосацияси президенти Муроджон Азимов бошлиқ ташкилий қўмита кенг кўламли ишларни бажармоқда. Ўзбекистон футбол ассоциацияси ва Осиё футбол конфедерацияси вакиллари тайёргарлик жараёни билан танишиб боришмоқда. Умид қиламизки, мазкур турнирнинг юқори савияда ўтишини таъминлаймиз.

- Баҳор фасли мусобақаларга бойлиги билан алоҳида ажралиб туради...

- Дарҳақиқат, бу фаслда кўплаб беллашувлар кўтаринки руҳда ўтказилади. Қарши шаҳридаги «Геолог» стадионида 8 март - Халқаро хотин-қизлар куни муносабати билан 12-14 ёшли қизлар ўртасида футбол фестивали ташкил этилди. Футбол маҳорат мактаблари тарбияланувчилари ўртасидаги ЎФА биринчилигида Сурхондарё, Қашқадарё жамоалари куч синашяпти. Унда 32та жамоа қатнашмоқда. Икки даврадан иборат баҳслар май ойигача давом этади. Бундан ташқари, «Нав­рўз» кубоги, 9 май - Хотира ва Қадрлаш куни, Мустақиллик байрами муносабати билан баҳслар уюшқоқлик билан ўтишига ишончимиз комил.

- Вилоят футболида ечимини кутаётган муаммолар ҳам борми?

- Маълумки, футболнинг халқ таълими тизимидаги тараққиётини таъминлаш ҳам долзарб вазифалардан бири. Бунинг учун ушбу тизим лигасини ташкил этишда вилоят Халқ таълими бошқармасида ташаббускорлик сезилмаяпти. Вилоятда бу борада «Ёшлик» спорт жамияти фаоллигини оширишимиз зарур. Собиқ «Меҳнат» стадионидаги футбол майдонини терма жамоалар марказига айлантириш, бунинг учун таъмирлаш ишларини амалга ошириш лозим. 5 ёш тоифасидаги вилоят терма жамоалар маркази 2005-2009 йилларда таваллуд топган ёшларни ҳам ўз бағрига олади. Иккинчи лига ўйинларига шаҳар, туман ҳокимликлари эътиборни кучайтиришлари шарт. Бу уюшмаган ёшларни бирлаштиришда муҳим восита ҳисобланади. Бир вақтлари ушбу лигада 19 жамоа бўлган, 2020-2021 йилларда кўрсаткич 12тага тушиб кетгани ташвишли ҳолат. Вилоятда футбол билан шуғулланадиган 27та муассаса бор экан, бу масалага бефарқ қараб бўлмайди. Шунингдек, жойлардаги БЎСМлар тасарруфидаги футбол мактабларини жонлантириш керак. Аксарияти таъмирга муҳтож, спорт анжомлари етарли эмас. Шаҳар, туман молия бўлимлари билан ҳамкорликда ишлаш вақти келди. Биргина Қарши шаҳридаги 1-сонли мактабда сунъий қопламали майдоннинг қаровсиз ҳолатга келиб қолганлигини нима билан изоҳлаш мумкин? Режалар юксак, ниятлар улуғвор. Жамоамиз билан ЎФА томонидан кўрсатилаётган ғамхўрликка жавобан бутун куч ва имкониятларимизни ишга соламиз.

Ҳусан ТЕМИРОВ суҳбатлашди