«Барселона» футбол клуби собиқ ярим ҳимоячиси Ривалдо Каталония жамоасининг уй стадиони - «Камп Ноу»га ташриф буюриб, кўк-анорранглилар раҳбарияти билан учрашди. Бу ҳақда «Барселона» расмий сайти хабар берди.

Ривалдо клуб президенти Хосеп Мария Бартомеу, вице-президент Жорди Местре ва раҳбариятнинг бошқа аъзолари билан «Барселона афсоналари» лойиҳасидаги доимий иштирокини муҳокама қилган. У Каталония жамоаси брендини бутун дунёда оммалаштириш мақсадида ташкил этилган.

«Мен «Камп Ноу» стадионига ҳар доим катта қувонч билан келаман. «Барселона»да беш йил ўйнадим ҳамда клуб тарихига кирдим. «Барселона» юрагимда доимо қолади. Президентга клуб учун исталган ишга тайёрлигимни билдирдим. Мен яхши спорт формасидаман ва ҳар куни машқларда иштирок этаман. Лойиҳа доирасида ташкиллаштириладиган учрашувларда қатнашишга тайёрман», - дея Ривалдонинг сўзларидан иқтибос келтиради Marca.

Маълумот учун, Ривалдо «Барселона» таркибида 1997-2002 йилларда тўп сурган бўлиб, жамоа билан икки бора Испания чемпионига айланган. Бундан ташқари, Европа суперкубоги ва Испания кубогини ҳам қўлга киритган.

Tribuna.uz