Газетамиз саҳифалари орқали ўзаро дўстлик алоқаларини боғлаган футболчилар билан сизларни яқиндан таништириб келаётган эдик. Ушбу анъанани давом эттирамиз. Навбатдаги саҳифамиз қаҳрамонлари - «Қўқон-1912» аъзолари Суҳроб Бердиев ва Ориф Мамажонов. Лойиҳамиз иштирокчиларига одатга кўра, бир хил саволлар билан мурожаат қилдик. Эътиборлиси, улар дўстлари берган жавоблардан бехабарлар. Кўрайлик-чи, бир-бирларини қанчалик яхши билишар экан?

1. Ўртангиздаги дўстлик қачондан бошланган?

2. Дўстингизнинг айнан қайси хислатини қадрлайсиз?

3. Белгиланган учрашувга вақтида келадими?

4. Дўстингиз ёлғон гапириб турадими?

5. Туғилган куни қачон?

6. Қайси фаслни яхши кўради?

7. Дўстингиз қайси таомни хуш кўриб истеъмол қилади?

8. Ишонувчанми?

9. Мағлубиятни қандай қабул қилади?

10. Футболдан ташқари қизиқишларини биласизми?

11. Дўстингизнинг орзуси...

Суҳроб Бердиевнинг жавоблари:

1. Ориф билан 2012 йили «Олмалиқ» жамоасида танишганмиз. Сафардаги ўйинларга борганимизда ҳам бир хонада яшаймиз. У энг яқин сирдошларимдан бири ҳисобланади. Ўйиндан олдин ва кейин албатта, биргаликда учрашувни муҳокама қиламиз. Кўз тегмасин, 5 йилдан бери дўст бўлиб келяпмиз.

2. Барча ижобий хислатларини қадрлайман. Инсонни эшитишни билади. Гапингизни ярмидан бўлмайди. Сўзларимни охиригача тинглаганидан кейингина ўз фикрини айтади. Ҳазилни кўтара олади.

3. Кўпроқ у биринчи келади. Менда бироз кеч қолиш одати бор. Ҳеч шу камчилигимни йўқота олмаяпман. Бу борада дўстимга ҳавас қиламан.

4. Шу кунгача бирор марта ҳам ёлғон гапирганини эшитмаганман, билмаганман.

5. 1990 йилнинг 5 февраль куни таваллуд топган. Мендан икки ойга катта. Таъбир жоиз бўлса, мендан битта кўйлак кўпроқ кийган. Балки, шунга бўлса керак, кўпинча ундан маслаҳат сўраб тураман. Дўстимни ҳар доим биринчилардан бўлиб табриклашга ҳаракат қиламан.

6. Баҳорни ёқтиради. Ёмғирли кунларда сайр қилишни хуш кўради. Айнан шу фаслда чемпионатимиз бошланиши учун ҳам яхши кўрса керак, деб ўйлайман.

7. Паловни хуш кўради. Ўзи ҳам пазанда, қўли жуда ширин.

8. Ўта ишонувчан. Айнан шу ишонувчанлиги ва кўнгли бўшлиги баъзан панд бериб қўйган.

9. Мағлубиятлар жуда қаттиқ таъсир қилади. Юракка яқин олади. Мағлубиятни эсдан чиқариши, енгиб ўтиши қийин кечади. Бундай ҳолатларда унга далда бериш, кўнглини кўтаришга ҳаракат қиламан.

10. Футболдан ташқари бўш вақтини асосан оиласи даврасида ўтказади. Ўйин ва машғулотлардан кейин дарҳол уйига ошиқади. Катта теннисга жуда қизиқади.

11. Энг катта орзуси - миллий терма жамоа либосида майдонга тушиш. Кўп ёлғиз қолиб гаплашган пайтларимизда шу ҳақда гапиради.

Ориф Мамажоновнинг жавоблари:

1. Аниқ эсимда, Суҳроб билан 2012 йили «Олмалиқ»да ўйнаб юрган кезларимиз танишганмиз. Ёшимиз тенг бўлгани учун дўстлашиб кетишимиз осон кечган. Беш йилдан бери қалин дўстмиз. Орада бир йил бошқа-бошқа жамоаларда ўйнадик: мен «Қўқон-1912»да, Суҳроб эса «Шўртан»да. Тақдир экан, ўтган йилдан яна бир жамоада ўйнаш бахти насиб қилди.

2. Ростгўй, соддадил, ҳеч қачон ёлғон гапирмайди. Қўлидан келганча ёрдам беришга интилади. Ҳеч қачон «билмайман», деган жавобни бермайди. Ҳеч бўлмаганда, ўша масала бўйича ўз фикрини билдиради.

3. Тўғрисини айтсам, учрашувларга биринчи мен етиб келаман. Унинг озгина кеч қоладиган одати бор.

4. Шахсан мени алдамаган. Бошқалар билан муносабатда ҳам ёлғон ишлатмаган бўлса керак, деб ўйлайман. Чунки унинг характери шундай. Ёлғон гапирмоқчи бўлса, юзи қизаради. Бир-икки марта кўнглимга тегмаслиги учун ёлғон ишлатган. Лекин бу яхшилик йўлида ишлатилган сўз бўлгани учун ёлғонга тенглаштирилмайди.

5. Суҳроб билан бир йилда туғилганмиз: мен 5 февраль, у эса 12 апрелда. Шунинг учун бўлса керак, жуда қалин дўстмиз. Бир-биримизни ҳам майдонда, ҳам унинг ташқарисида бир қарашдаёқ тушунамиз.

6. Кузни яхши кўради. Хазонрезги, ёмғирли кунларда сайр қилишни ёқтиради.

7. Паловни яхши кўради. Лекин ўзи пазанда эмас, таом пиширишни билмайди.

8. Менга ўхшаб ўта ишонувчан.

9. Ютқазишни умуман истамайди. Шу боисми, мағлубиятли ўйинларда тушкун ҳолатга тушиб қолади. Аммо эсдан чиқаришга уринади. Кўп кўрганман, йўл қўйган хатоларини таҳлил қилади.

10. Кўпинча бўш вақтини тренажёр залида ўтказишга интилади. Ўз устида кўп ишлайди.

11. Барча футболчиларнинг олий орзуси - миллий терма жамоа сафида майдонга тушиш. Унда ҳам шу истак биринчи ўринда туради.

К.АЛИМОВ ёзиб олди